លាហើយសក់បែកចុងបើអនុវត្តវិធី ៨យ៉ាងនេះបាន

2018-07-19 10:55:42
ចំនួនមតិ 0 | ចំនួនចែករំលែក 0

សក់បែកចុងជាបញ្ហាទូទៅដែលនារីគ្រប់រូបតែងជួបប្រទះ។ មានកត្តាជាច្រើនដែលធ្វើឱ្យសក់បែកចុង មិនមានសំណើម។ ប៉ុន្តែមាននារីខ្លះអាចទប់ទល់នឹងបញ្ហានេះបានដោយប្រើវិធីផ្សេងៗ។ ពេលនេះកញ្ញានឹងបញ្ហាអ្នកពីតិចនិកងាយៗខ្លះ ដែលធ្វើឱ្យអ្នកអស់កង្វល់រឿងសក់បែកចុង៖

១. បន្ថែមប្រេងធម្មជាតិ

សារធាតុគីមីធ្វើឱ្យសក់អ្នកស្ងួតគ្មានសំណើម មិនរលោងស្អាតហើយត្រូវចំណាយច្រើនទៀតផង។ ប្រើប្រេងបន្លែតែ២ឬ៣តំណក់ដើម្បីជំនួយដល់សុខភាពសក់ អ្នកក៏អាចសាកល្បងប្រេងដូង ប្រេងArgan យកមកម៉ាស្សានិងអប់ទុក៣០នាទី។ អ្នកនឹងទទួលបានសក់ដ៏ស្រស់ស្អាតភ្លឺរលោងពីធម្មជាតិ។

២. គួរតែកាត់សក់បែកចុងចោល៣ខែម្តង

បើអ្នកស្ទាយសក់មិនដាច់ចិត្តកាត់ហើយទុកឱ្យវាបែកចុងនោះ វាកាន់តែធ្វើឱ្យសក់អ្នកបែកចុងថែមទៀត។ អ្នកគួរតែតម្រឹមសក់បែកចុងចោលរៀងរាល់៣ខែម្តង ដើម្បីកុំឱ្យវាប៉ះពាល់ដល់សុខភាពសក់។

៣. ប្រើសាប៊ូពីធម្មជាតិ

ដើម្បីការពារសក់អ្នក សាប៊ូគឺមានតួនាទីយ៉ាងសំខាន់។ ហេតុនេះហើយអ្នកត្រូវប្រយ័ត្នបំផុតនៅពេលជ្រើសរើសសាប៊ូ។ សាប៊ូខ្លះធ្វើឱ្យសក់អ្នកកាន់តែបែកចុង អ្នកគួរតែជ្រើសរើសសាប៊ូណាដែលផ្សំឡើងពីធម្មជាតិហើយមានមុខងារសម្រាប់សក់បែកចុងតែម្តង។

៤. ប្រើក្រាស់ដែលសាកសម

ស្រីៗភាគច្រើនមិនសូវចាប់អារម្មណ៍រឿងក្រាស់សិតសក់ប៉ុន្មានទេ ដោយគិតថាសិតក្រាស់អីក៏បាន។ មិនចាំបាច់ទិញក្រាស់ថ្លៃៗនោះទេ អ្នកគួរតែជ្រើសរើសក្រាស់ណាដែលស្រួលសិតសម្រាប់អ្នក។ បើសក់អ្នកបែកចុងឬជ្រុះច្រើនគួរតែជ្រើសរើសក្រាស់ដែលមានធ្មេញធំបន្តិច។ នៅពេលយប់មុនពេលចូលគេង អ្នកគួរតែសិតសក់ដោយប្រើប្រេងធម្មជាតិជំនួយ។

៥. ប្រដាប់កៀបនិងផ្លុំសក់

ដល់ពេលដែលគួរតែកាត់បន្ថយវាហើយ។ របស់ទាំងពីរយ៉ាងនេះបំផ្លាញសក់អ្នកបានយ៉ាងឆាប់រហ័ស។ បើមិនចាំបាច់ទេនោះ នៅពេលកក់សក់ហើយគួរតែជូតឱ្យស្ងួតតាមដំណើរ។

៦. កង្វះសារធាតុចិញ្ចឹម

សក់បែកចុងក៏អាចបណ្តាលមកពីកង្វះវីតាមីន សារធាតុរ៉ែ ប្រូតេអ៊ីន និងអាស៊ីតខ្លាញ់ផ្សេងៗ។ ហើយកង្វះសារធាតុអស់ទាំងនេះក៏ដោយសារតែអ្នកញ៉ាំមិនបានគ្រប់គ្រាន់ ឬមកពីអ្នកតមអាហារដែលមានជីវជាតិអស់ទាំងនេះ។ ផ្លែឈើស្រស់ បន្លែ គ្រាប់ធញ្ញជាតិ ត្រី ផ្លែបឺរ គឺសុទ្ធសឹងតែជាជីវជាតិដ៏សំខាន់សម្រាប់សក់។

៧. ញ៉ាំទឹកឱ្យបានច្រើន

ទឹកមានតូនាទីផ្តល់សំណើមដល់សក់និងរាងកាយ។ ការដែលញ៉ាំទឹកយ៉ាងហោចណាស់៦កែវក្នុងមួយថ្ងៃ ជួយឱ្យសក់អ្នកមានសំណើមមិនបែកចុង។

៨. ម៉ាស្សាស្បែកក្បាល

ការម៉ាស្សាក្បាលជាប្រចាំក៏ជួយកាត់បន្ថយសក់បែកចុងបានដែរ។ វាធ្វើឱ្យសរសៃឈាមរត់ស្រួល ជួយឱ្យសក់លួតលាស់បានល្អមិនបែកចុង។ គួរតែម៉ាស្សាជាប្រចាំមួយថ្ងៃម្តង៕

ប្រភព៖ giaoducthoidai ប្រែសម្រួល៖ តាន់ ច័ន្ទលក្ខិណា