ដឹងពីការអ៊ុតសក់មុន និងក្រោយលាបពណ៌សិន ទើបសម្រេចចិត្តទៅមិនស្ដាយក្រោយ

2018-05-25 04:00:00
ចំនួនមតិ 0 | ចំនួនចែករំលែក 0

ចង់ផ្លាស់ប្ដូរខ្លួនឯងឲ្យមើលទៅស្អាតប្លែកក្នុងរយៈពេលខ្លីគឺអាចធ្វើទៅបាន ដោយការប្ដូរស្ទីលតែងខ្លួនដូចជាកាត់សក់ អ៊ុតសក់និងលាបពណ៌សក់ជាដើម។ ការលាបពណ៌សក់គឺពេញនិយមណាស់សម្រាប់នារីៗភាគច្រើន។ ខ្លះទៀតក្រៅពីលាបពណ៌ហើយគឺចង់អ៊ុតត្រង់ឬរួញជាដើម។ ប៉ុន្តែយោងតាមការពន្យល់ពីអ្នកជំនាញផ្នែកសក់ លោកស្រីប៉ែន ពេជ្រចិន្ដា ម្ចាស់សាឡនយីហោ Pen Studio បានឲ្យដឹងថាអ៊ុតសក់ក្រោយលាបពណ៌សក់អាចមានបញ្ហាខ្លាំង ចំពោះប្រភេទសក់៣យ៉ាងនេះ។

១. ប្រភេទទីមួយគឺសក់លេងពណ៌Highlight

សក់លាបពណ៌ហាយឡាយជាទូទៅធ្វើឲ្យខូចសរសៃសក់ដោយសារប៉ះថ្នាំលាងសក់ Bleach។ អ្នកជំនាញដដែលបានឲ្យដឹងថា៖ សម្រាប់សក់ដែលហាយឡាយពី20% ទៅ30%នៃសក់ក្បាលប្រឈមនិងការខូចសក់ខ្លាំងក្រោយពេលអ៊ុត។ ដោយសារមុន Highlight គេត្រូវលាងសក់Bleach ឲ្យបាត់ពណ៌ខ្មៅជាមុនសិន ដែលជាហេតុធ្វើឲ្យសរសៃសក់យឺត ផុយ។ លុះពេលដាក់ថ្នាំអ៊ុតសក់ទៀតនោះនឹងកាន់តែធ្វើឲ្យសក់ខូច ផុយស្រួយ ទៅជាឆេះ។

២. ប្រភេទទី២គឺសក់លាបពណ៌

សម្រាប់សក់លាបពណ៌រួចចង់អ៊ុតសក់ គឺប្រឈមខ្លាំងពីការឆេះសំពោង និងសក់ខូចបែកចុងធ្ងន់ធ្ងរ។ អ្នកជំនាញដដែលបានណែនាំថា សក់លាបពណ៌អាចអ៊ុតបាន ក្រោយពី ២ ទៅ ៣ អាទិត្យលាបពណ៌រួច ហើយចំពោះសរសៃសក់វិញគឺបានតែចំពោះសរសៃសក់ដែលមិនខូច ឬស្ងួត។ ម៉្យាងទៀតអ៊ុតបានចំពោះសក់លាបដែលមិនលាង Bleach ។ បើមិនដូច្នេះទេ ពេលអ៊ុតរួចសក់និងមានសភាពស្អិតជំពាក់ខ្លាំងនិងផុយជ្រុះដាច។

៣. ប្រភេទទី៣គឺសក់ស្ងួត

លោកស្រីម្ចាស់ហាងសាឡនដដែលបានឲ្យដឹងថា កាលណាសរសៃសក់ស្ងួត គឺវាមានបញ្ហាស្រាប់ទៅហើយ។ សក់ស្ងួតធម្មតាតែងមានភាពសំពោងបែកចុងស្រាប់ ដូច្នេះនៅពេលអ៊ុតរួចនឹងកាន់តែធ្វើឲ្យខូចស្ងួតជាងនេះ។

បន្ថែមពីនេះលោកស្រីអ្នកជំនាញផ្នែកសក់បានប្រាប់ពីរបៀបខ្លះៗពីការថែរក្សាសក់អ៊ុតដូចជា៖ មិនត្រូវប្រើឧបករណ៍ក្ដៅធ្វើម៉ូដញឹកញាប់ និងគូរតែអប់សក់ឲ្យបានញឹកញាប់ក្រោយពេលកក់សក់ ហើយប្រើក្រែមការពារកម្ដៅលាបសក់ពេលធ្វើម៉ូដ ឬចេញក្រៅពាក់មួកជាដើមដើម្បីការពារសក់ខូចពីកម្ដៅថ្ងៃ។ ម៉្យាងទៀតក្រោយពេលលាបសក់រូចគួរទុកចន្លោះពី ១ ទៅ ២ ខែដើម្បីឲ្យសក់មានសុខភាពរឹងមាំសិន សឹមធ្វើការអ៊ុត៕

ចុចអាន៖ដល់ឃើញតារាស្រីទាំងនេះស្អាតប្លែកអីចឹង បានដឹងថាកាត់សក់ខ្លីលើកសម្រស់ខ្លាំងប៉ុណ្ណា

អត្ថបទ៖ Pencharm