វ៉ាក់សាំងសំខាន់ៗបំផុតក្នុងជីវិតក្មេង ដែលឪពុកម្ដាយសម័យថ្មី អត់ដឹងច្បាស់ អាងតែពេទ្យ ប្រយ័ត្នស៊យធំ
- 2017-12-01 08:55:52
- ចំនួនមតិ 0 | ចំនួនចែករំលែក 0
វ៉ាក់សាំងសំខាន់ៗបំផុតក្នុងជីវិតក្មេង ដែលឪពុកម្ដាយសម័យថ្មី អត់ដឹងច្បាស់ អាងតែពេទ្យ ប្រយ័ត្នស៊យធំ
ឪពុកម្ដាយសម័យថ្មី មិនមានភាគច្រើនទេ ដែលដឹងថាកូនកើតមកត្រូវចាក់វ៉ាក់សាំងសំខាន់ៗដើម្បីការពារទារក ឬក្មេងពីជំងឺកាចសាហាវដែលយាយីដល់អនាគត និងជីវិតរបស់ក្មេង។ ឯបើអ្នកដែលត្រៀមធ្វើជាឪពុកម្ដាយគេទៀត រឹតតែត្រូវដឹងច្បាស់ពីបញ្ហានេះ។ កុំអាងតែគ្រូពេទ្យមួយមុខ បើទោះជាបច្ចុប្បន្នពេទ្យនឹងរៀបចំម៉ាកំផ្លេរឿងចាក់ថ្នាំបង្ការ ពេលកូនកើតមកក៏ដោយ។
ខាងក្រោម ជាវ៉ាក់សាំងសំខាន់ៗណែនាំដោយមជ្ឈមណ្ឌលការពារ និងគ្រប់គ្រងជំងឺ (CDC) ដើម្បីបង្ការគ្រប់កុមារទាំងអស់ចាប់ពីកើតដល់អាយុ ៦ ឆ្នាំ។ ថ្នាំបង្ការទាំងនេះ ក៏ត្រូវបានបញ្ចូលទៅក្នុងកម្មវិធីចាក់ថ្នាំបង្ការជាតិរបស់កម្ពុជាដែរ។
១. ជំងឺរលាកថ្លើមប្រភេទ B
ថ្វីបើទារកភាគច្រើន គ្មានហានិភ័យខ្ពស់ក្នុងការឆ្លងវីរុសរលាកថ្លើមប្រភេទ B ក៏ដោយ ការចាក់ថ្នាំបង្ការតាំងពីតូច គឺជាវិធីសាស្ត្រដ៏មានប្រសិទ្ធភាពបំផុត ដើម្បីធានាបានការការពារពេញមួយជីវិត។ ថ្នាំបង្ការវីរុសរលាកថ្លើមប្រភេទ B ត្រូវចាក់ ៣ ដង។ ដូសដំបូង គួរចាក់ក្នុងរយៈពេល ២៤ ម៉ោងបន្ទាប់ពីកើត។ ដូសទី២ ត្រូវចាក់ពី ១ ទៅ ២ ខែបន្ទាប់ ហើយដូសទី៣ ត្រូវចាក់ ពេលទារកមានអាយុ ៦ ទៅ ១៨ ខែ។
២. ជំងឺគ្រុនស្វិតដៃជើង
កុមារទាំងអស់ ត្រូវចាក់ថ្នាំបង្ការជំងឺគ្រុនស្វិតដៃជើង ដើម្បីជៀសវាងការផ្ទុះជំងឺនេះសាជាថ្មី។ ដូសទី ១ និងទី២ ត្រូវផ្ដល់ឱ្យទារកនៅអាយុ ២ និង ៤ ខែ។ ការចាក់លើកទី៣ ជាទូទៅត្រូវផ្ដល់ឲ្យទារកនៅអាយុ ៦ ទៅ ១៨ ខែ ហើយការចាក់លើកទី៤ ជាធម្មតា គឺពេលកុមារមានអាយុចាប់ពី ៤ ទៅ ៦ ឆ្នាំមុនពេលចូលរៀន។
៣. ជំងឺរាករូស
Rotavirus ជាមូលហេតុសំខាន់បំផុតនៃជំងឺរាករូស និងការបាត់បង់ជាតិទឹកធ្ងន់ធ្ងរចំពោះទារក និងកុមារតូចៗ។ វ៉ាក់សាំងប្រឆាំងនឹង Rotavirus មានពីរប្រភេទ គឺ RV5 និង RV1។ វ៉ាក់សាំងនេះស្ថិតក្នុងទម្រង់ជាទឹក និងត្រូវផ្ដល់ឱ្យទារកដោយបន្តក់តាមមាត់។ ដូសដំបូងនៃវ៉ាក់សាំងនេះ ត្រូវបានផ្តល់ឱ្យទារកចន្លោះពី ៦ ទៅ ១៥ សប្ដាហ៍។
៤. ជំងឺកញ្ជ្រឹល - ស្រឡទែន- ស្អូច (MMR)
ជំងឺកញ្ជ្រឹល ស្រឡទែន (ក្រឡទែន) និងស្អូច ជាជំងឺដែលអាចឆ្លងតាមទឹកមាត់ ឬស្លេស្មដែលអ្នកជំងឺក្អក ឬកណ្ដាស់។ ដូសដំបូងនៃ MMR ត្រូវផ្តល់ឱ្យទារកនៅអាយុ ១២ ទៅ ១៥ ខែ។ ការចាក់ថ្នាំបង្ការជំងឺកញ្ជ្រឹល ស្រឡទែន និងស្អូចលើកទី២ ជាធម្មតា គឺពេលកុមារមានអាយុចាប់ពី ៤ ទៅ ៦ ឆ្នាំមុនពេលចូលរៀន។
៥. Haemophilus Influenzae ប្រភេទ B (Hib)
Hib ជាមូលហេតុទូទៅបំផុតនៃជំងឺរលាកស្រោមខួរដោយបាក់តេរីចំពោះកុមារ។ វ៉ាក់សាំងនេះត្រូវផ្ដល់ឱ្យទារក ៣ ដងនៅអាយុ ២ ខែ ៤ ខែ និង ៦ ខែ ហើយចាក់រំឭកឡើងវិញនៅអាយុ ១២ ទៅ ១៥ ខែ។
៦. ជំងឺរលាកសួតដោយភ្នឺម៉ូកូក
Streptococcus pneumoniae (pneumococcus) អាចបណ្ដាលឱ្យមានការបង្ករោគធ្ងន់ធ្ងរ ដូចជា ជំងឺរលាកស្រោមខួរ និងជំងឺរលាកសួត ដែលអាចបណ្ដាលឱ្យមានគ្រោះថ្នាក់ដល់កុមារ។ គ្រប់ដូសទាំងអស់ ត្រូវផ្ដល់ឱ្យកុមារនៅអាយុ ២ ខែ ៤ ខែ និង ៦ ខែ និងនៅអាយុ ១២ ទៅ ១៥ ខែ។ ដូសដំបូងអាចផ្ដល់ឱ្យកុមាររហូតដល់អាយុ ៦ សប្ដាហ៍។
៧. ជំងឺរលាកខួរក្បាល (JE)
ជំងឺរលាកខួរក្បាល JE ជាជំងឺដ៏ធ្ងន់ធ្ងរដែលបណ្ដាលមកពីវីរុស JE។ វាឆ្លងតាមមូសដែលមានមេរោគខាំ។ វ៉ាក់សាំងនេះ មានទម្រង់ជាថ្នាំចាក់ ហើយត្រូវចាក់ ២ ដូសសម្រាប់ការការពារពេញលេញ។
ជារឿងសំខាន់ណាស់សម្រាប់កុមារដែលត្រូវតែទទួលបានការចាក់ថ្នាំបង្ការឲ្យបានពេញលេញ។ ជំងឺដែលអាចបង្ការបានដោយការចាក់វ៉ាក់សាំងអាចមានគ្រោះថ្នាក់ធ្ងន់ធ្ងរដល់ជីវិត ជាពិសេសចំពោះទារកនិងកុមារតូចៗ។ ឪពុកម្ដាយគួរតែដឹងពីបញ្ហានេះ ដើម្បីការពារកូនៗរបស់ពួកគេពីជំងឺធ្ងន់ធ្ងរទាំងនេះ។
បើមានសំណួរពាក់ព័ន្ធនឹងអត្ថបទនេះ ឬការថែរក្សាសុខភាព អាចទាក់ទងតាម៖
ចំណាំ៖ រាល់ថ្ងៃសុក្រ កញ្ញា នឹងចេញផ្សាយអត្ថបទសុខភាព ពីអ្នកជំនាញផ្នែកសុខភាពរបស់ទស្សនាវដ្ដី Healthwise Digest ពី DKSH៕