ទង្វើ ១០យ៉ាង មានតែប្ដីចោលម្សៀតទេដែលធ្វើដាក់ប្រពន្ធកើត

2017-11-29 02:31:06
ចំនួនមតិ 0 | ចំនួនចែករំលែក 0

គ្មានមនុស្សស្រីណាថាមិនចង់បានស្វាមីល្អនោះទេ ប៉ុន្តែពេលខ្លះក្រោយរៀបការរួច ដោយសារតែការហត់នឿយជាមួយបញ្ហាជីវភាព ការខ្វែងគំនិតគ្នាញឹកញាប់ បានធ្វើឲ្យទំនាក់ទំនងប្តីប្រពន្ធដែលធ្លាប់តែផ្អែមល្ហែមប្រែប្រួល និងឃ្លាតឆ្ងាយពីគ្នាពីមួយថ្ងៃទៅមួយថ្ងៃ។ ខាងក្រោមនេះជាទង្វើ១០យ៉ាងរបស់ប្តី ដែលបញ្ជាក់ថាគាត់កំពុងតែបំផ្លាញក្តីស្រឡាញ់របស់ប្រពន្ធបន្តិចម្តងៗ ដោយមិនដឹងខ្លួន៖

រូបតំណាង

**១. រិះគន់**

រិះគន់ ព្រមទាំងចាប់កំហុសប្រពន្ធគ្រប់ពេល មិនថារឿងតូច ឬធំនោះទេ។ ប្តីល្អគួរតែចេះលើកទឹកចិត្ត សរសើរចំពោះការប្រឹងប្រែងរបស់ប្រពន្ធខ្លួន ហើយបើនាងធ្វើខុសមែន គាត់គួរតែប្រាប់ ឬណែនាំនាងដោយត្រង់ៗ មិននិយាយបែបចាក់ដោត។

២. គ្រប់គ្រង

គាត់ត្រូវដឹងគ្រប់សកម្មភាពរបស់ប្រពន្ធ កន្លែងដែលនាងទៅ នាងកំពុងធ្វើអ្វី ជាមួយអ្នកណា នាងចំណាយប្រាក់លើអ្វីខ្លះ និងសម្រេចចិត្តជំនួសនាងស្ទើរគ្រប់រឿង។ ទោះនាងជាស្រីដែលរៀបការហើយ ប៉ុន្តែនាងក៏ត្រូវការសេរីភាពផ្ទាល់ខ្លួនខ្លះដែរ។

៣. ចាត់ទុកប្រពន្ធដូចឧបករណ៍

ចំពោះរឿងលើគ្រែ មិនខ្វល់ពីអារម្មណ៍របស់ប្រពន្ធ ធ្វើតាមធ្វើដែលខ្លួនចង់បានគ្រប់ពេល។ មនុស្សស្រីខុសពីមនុស្សប្រុស ភាពស្និទ្ធស្នាល ការថ្នាក់ថ្នម គឺជារឿងសំខាន់ ដូច្នេះអ្នកដែលជាប្តីមិនត្រូវចាត់ទុកនាងជាតុក្កតានោះទេ។

៤. ទុកប្រពន្ធមិនសំខាន់

ការងារ មិត្តភ័ក្ដិ ការកម្សាន្តផ្ទាល់ខ្លួន សុទ្ធតែសំខាន់ជាងប្រពន្ធ។ នៅជិតក៏មិនសូវនិយាយស្តីរក នៅឆ្ងាយក៏មិនសូវខ្វល់ខ្វាយ ខល ឬផ្ញើសារសួនាំ។

៥. ប្រើពាក្យសម្ដីអាក្រក់ៗដាក់ប្រពន្ធ

និយាយស្តីពាក្យសម្ដីមិនសមរម្យ ឬប្រើភាសាអសុរសដាក់ប្រពន្ធញឹកញាប់។ មនុស្សស្រីឆាប់ទទួលអារម្មណ៍ណាស់ ដូច្នេះភាសាបែបធ្ងន់ៗពិតជាធ្វើឲ្យនាងឈឺចាប់ខ្លាំង និងចងចាំគ្មានថ្ងៃបំភ្លេចបាន។

៦. ញៀនរឿងអាសអាភាស

ការញៀនជាមួយរឿងប្រភេទនេះ ផ្តល់ផលអាក្រក់យ៉ាងច្រើនចំពោះគ្រួសារ។ វាអាចបំផ្លាញចំណងអាពាហ៍ពិពាហ៍ និងអនាគតថែមទៀតផង។

៧. រំពឹងខ្ពស់

ប្រៀបធៀបប្រពន្ធជាមួយអ្នកដទៃមិនថា សម្រស់ ការគ្រប់គ្រងលុយកាក់ ភាពជាម្តាយ ឬបញ្ហាផ្សេងទៀត។ ទង្វើបែបនេះពិតជាធ្វើឲ្យមនុស្សស្រីបាក់ទឹកចិត្ត និងបាត់បង់ភាពជឿជាក់លើខ្លួនឯងខ្លាំងបំផុត។

៨. មិនជួយការងារក្នុងផ្ទះ

ប្រកាន់ខ្លួន មិនជួយសម្រាលបន្ទុកប្រពន្ធ ទោះបីមានពេលទំនេរក្ដី។ ទោះប្តីជាមេគ្រួសារ ឬមានប្រាក់ខែច្រើនប៉ុណ្ណាក៏ដោយ មិនមានន័យថាគាត់ត្រូវអង្គុយមើលទូរទស្សន៍ ដោយមិនជួយការងារក្នុងផ្ទះខ្លះសោះនោះដែរ។

៩. ឆេវឆាវ បញ្ចេញកំហឹងញឹកញាប់

ស្រែក កំហក គប់ចានឆ្នាំង គំរាម ឬដល់ថ្នាក់វាយតប់ សុទ្ធតែជាអំពើហិង្សាដែលមិនអាចលើកលែងបាន។ ប្រពន្ធដែលមានប្តីរបៀបនេះ ប្រាកដជាមានវិបត្តិផ្លូវចិត្ត ឆាប់ភ័យ ឬបាក់ស្បាតជាក់ជាមិនខាន។

១០.កុហក ផិតក្បត់

ចែចង់ ឬលួចមានស្រីក្រៅ ដោយមិនខ្វល់ពីអារម្មណ៍ប្រពន្ធ។ ទង្វើបែបនេះ មិនបានបញ្ជាក់ថាគាត់ជាមនុស្សប្រុសឡូយ អស្ចារ្យនោះទេ ប៉ុន្តែវាបង្ហាញពីភាពទន់ខ្សោយ ដែលមនុស្សប្រុសមិនអាចគ្រប់គ្រងតណ្ហាខ្លួនឯងបាន និងធ្វើឲ្យមនុស្សមួយគ្រួសារទឹកភ្នែកដោយសារ ៕