ក្មេងស្រីបើមានប៉ុន្មានចំនុចនេះលេចឡើង អ្នកលែងជាកូនក្មេងទៀតហើយ!

2017-11-28 07:24:12
ចំនួនមតិ 0 | ចំនួនចែករំលែក 0

ភាព “ពេញក្រមុំ” សម្រាប់ស្ត្រី គឺជាដំណាក់កាលរំជើបរំជួល តែក៏គួរឲ្យខ្លាចបំផុតក្នុងជីវិតដែរ ។ស្ត្រីភាគច្រើនមិនទាំងដឹងថាខ្លួនបានពេញក្រមុំផង រហូតដល់ពេលចាប់មករដូវលើកដំបូង ។ តាមពិតស្ត្រីចាប់ពេញរូបរាងមុនពេលមករដូវទៀត ដោយការប្រែប្រួលអ័រម៉ូនក្នុងខ្លួនធ្វើឲ្យខ្លួនប្រាណ អារម្មណ៍ ស្មារតី និងរបៀបគិត ក៏ប្រែខុសប្លែកពីមុនឆ្ងាយដែរ អាចចំណាំបានងាយៗ ដូចខាងក្រោម ៖

១. ពេញទូទាំងរាងកាយហាក់ប្រែប្រួលលូតលាស់រហ័សខ្លាំង ៖ តើអ្នកមានចាប់អារម្មណ៍ថាស្រាប់តែ ភ្លាមៗអ្នកពាក់ខោអាវដែលធ្លាប់តែពាក់រាល់ដងលែងចុះទេ ? ព្រោះស្ត្រីចាប់ផ្តើមពេញវ័យអាចនឹងឡើងគីឡូ ហើយលូតកម្ពស់ប្លែកភ្នែកខ្លាំង។

២. ចាប់អារម្មណ៍អ្នកចាប់ផ្តើមមានក្លិនខ្លួន ៖ ក្នុងដំណាក់កាលទើបតែចាប់ផ្តើមពេញវ័យភ្លាមៗ អ័រម៉ូនក្នុងខ្លួនស្រ្តីមានសន្ទុះខ្លាំង ធ្វើឲ្យក្រពេញញើសកាន់តែសកម្ម។ ស្ត្រីនឹងចេញញើសច្រើនហើយប៉ះលាយឡំនឹងបាតេរីនៅលើស្បែក បង្កើតទៅជាក្លិនខ្លួនម្យ៉ាង មិនសូវជាគាប់ច្រមុះប៉ុន្មានទេ។ តែបញ្ហាក្លិនខ្លួនធម្មជាតិបែបនេះ មិនពិបាកដោះស្រាយឡើយ ដោយអ្នកអាចងូតទឹកសម្អាតខ្លួនជាមួយសាប៊ូរាល់ថ្ងៃ និងពាក់ខោក្នុងដែលធ្វើជាអំបោះកាតុង ជាការស្រេច។

**៣. ចាប់ផ្តើមឡើងដោះ ៖** ជាទូទៅស្ត្រីចាប់ផ្តើមឡើងដំនៅដើមទ្រូង (ដោះ) ក្នុងវ័យ ៩ ឬ ១០ឆ្នាំ។ នេះគឺជាការវិវឌ្ឍបន្តិចម្តងៗ ហើយដោះម្ខាងអាចឡើងធំជាងម្ខាងទៀត នេះជារឿងធម្មតា ។

៤. ចាប់ផ្តើមមានដុះរោមនៅជុំវិញកន្លែងឯកជន (ប្រដាប់ភេទ) ៖ ពេលចាប់ដុះរោមនៅកន្លែងសម្ងាត់នេះ បញ្ជាក់ថាស្ត្រីកាន់តែកៀកដល់ពេលពេញវ័យមែនទែនហើយ ។

៥. សាកឈរពីមុខកញ្ចក់ពិនិត្យមើលរូបរាងពេញវ័យរបស់ខ្លួន ៖ បន្ថែមពីលើការឡើងដោះ និងដុះរោម រូបរាងកាយអ្នកក៏ប្រែប្រួលខ្លាំងដែរ ហាក់ដូចជាហំណែនជាងមុន ។ ភាគច្រើនបើពីក្មេងអ្នកស្គមស្តើង ពេលពេញវ័យអ្នកអាចរៀងឡើងសាច់ ទៅជាមូលបន្តិចក៏មាន នៅត្រង់ ត្រកៀក កំភួញជើង ដើមដៃ ជើង តួដៃ និងប្រអប់ជើងជាដើម ។

៦. លេចចេញរោមជើង និងរោមក្លៀក ៖ អាចលេចចេញក្រោយអ្នកបានដុះរោមនៅកន្លែងសម្ងាត់បាន១ ឆ្នាំឬ ២ឆ្នាំហើយ ។

៧. ប្រដាប់ភេទចាប់ផ្តើមបញ្ចេញទឹករំអិលម្យ៉ាងតែមិនមានក្លិនខ្លាំងទេ (vaginal discharge) ៖ អាច ១ឆ្នាំទៅ ២ ក្រោយអ្នកឡើងដោះសញ្ញានេះនឹងចាប់លេចចេញមក ដោយពេលខ្លះ វាអាចខាប់ រ៉ាវ ពេលខ្លះដូចសម្បោរ ។

៨. ធ្លាក់ឈាមរដូវ ៖ ក្នុងចន្លោះ ៦ ខែបន្ទាប់ពីអ្នកមានធ្លាក់ទឹករំអិល អ្នកនឹងអាចមករដូវដំបូងបង្អស់ក្នុងជីវិតថ្ងៃណាមួយ។ ពេលជិតធ្លាក់ឈាមរដូវមែនទែន ស្ត្រីអាចមានអារម្មណ៍ ហើមពោះ ណែនៗពោះ ទោះអ្នកមិនបានញុំាច្រើនក៏ដោយ និងអាចមានអាការៈ ឈឺខ្នង ឈឺក្បាល ចុករោយដៃជើង ចុកពោះ តែត្រូវចាំថានេះជារឿងធម្មតា មិនមែនជារឿងគួរឲ្យបារម្ភខ្លាំងឡើង។ ប៉ុន្តែបើអាការៈទាំងនេះខ្លាំងរហូតទ្រាំមិនបាន នោះអាចខុសប្រក្រតី ដែលអ្នកគួររួសរាន់ទៅពិគ្រោះជាមួយគ្រូពេទ្យជំនាញ។

ជាទូទៅសម្រាប់ស្ត្រីដែលទើបតែមករដូវដំបូង នេះជាពេលវេលាលំបាកបំផុត តែសំណាងដែលសម័យនេះអ្នកអាចររកទិញសំឡីអនាម័យបានយ៉ាងងាយស្រួល ហើយមានច្រើនជម្រើសទៀត ។ ទោះជាបែបនេះក្តីស្ត្រីគួរជ្រើសប្រើសំឡីអនាម័យដែលល្អចំពោះសុខភាព ជួយការពារពីភាពរម៉ាស់ និងក្លិនមិនល្អ ហើយត្រូវប្រើឲ្យត្រឹមត្រូវ និងផ្លាស់ប្តូរក្នុងចន្លោះ ៥ម៉ោងម្តង។

៩. ស្បែកឡើងខ្លាញ់ និងចេញមុន ៖ ស្បែកមុខអ្នកចាប់ផ្តើមឡើងខ្លាញ់ច្រើនជាកាលពីមុន និងមានឡើងមុន ដោយសារខ្លួនប្រាណរបស់អ្នកបានប្រែប្រួល អ៉ីចឹងមុខរបស់អ្នកក៏ដូចគ្នាដែរ ដូច្នេះហើយទើបកន្លងមកគេតែងនិយាយថា "ឡើងមុន ឡើងខ្លួន" ។

១០. កត់ត្រាពីការប្រែប្រួលអារម្មណ៍ប្រចាំថ្ងៃ (សរសេរកំណត់ហេតុប្រចាំថ្ងៃ) ៖ ពេលចាប់ពេញក្រមុំជាដំណាក់កាលស្មុគស្មាញមួយ ព្រោះទាំងខ្លួនប្រាណ និងស្មារតីស្ត្រីនឹងប្រែប្រួលឡើងចុះ មិនទៀង ហើយមិននឹងនរ ចិត្តច្រើន ដូចជាឆេវឆាវ ឆាប់ខឹង ឆាប់អន់ចិត្ត ប្រចណ្ឌ ច្រណែនពេលគ្មានអ្នកខ្វាយខ្វល់ពីខ្លួន គ្មានជំនឿចិត្តលើខ្លួនឯងជាដើម ។

អ្នកគួរសរសេរ Diary /កំណត់ហេតុកត់ត្រាពីអារម្មណ៍ប្រចាំថ្ងៃ ហើយពេលក្រោយអ្នកអាចយកមកអាននឹងដឹងថាតែមួយ១ថ្ងៃសោះអារម្មណ៍ប្រែប្រួលកម្រិតណា។ អាការៈប្រែប្រួលអារម្មណ៍នេះកើតឡើងដោយសារការប្រែប្រួលអ័រម៉ូន។

១១. អ្នកចាប់ផ្តើមចេះលួចស្រលាញ់គេ ៖ នេះជាអារម្មណ៍រំភើប រំជើបរំជួលម្យ៉ាងដែលអ្នកមិនធ្លាប់មានពេលអ្នកនៅជាកូនក្មេង ។ នេះជាអារម្មណ៍នៃក្តីស្រលាញ់ ស្នេហាឬ អារម្មណ៍ផ្លូវភេទជាដើម ដែលភាគច្រើនវាកើតមានឡើងដោយមិនដឹងខ្លួនសម្រាប់ស្ត្រីទើបតែពេញវ័យថ្មោងថ្មី ។

(រូបតំណាង)

**អត្ថបទទាក់ទង** - [រឿងសាមញ្ញៗ តែប៉ះពាល់ខ្លាំងពេលមករដូវ ស្ត្រីភាគច្រើនអាចមិនដឹង](http://kanha.sabay.com.kh/article/988305#utm_campaign=onpage) - [ចេញដើរលេង បើភ្លេចដាក់របស់នេះតាមខ្លួនស្ត្រីយើងអាចជួបរឿងធំ](http://kanha.sabay.com.kh/article/985205#utm_campaign=onpage) - [ដល់ថ្ងៃហ្នឹងអត់ខ្វល់អាលីង! ធ្វើបានតែ ១១ ចំនុចនេះដឹងតែស្រួលខ្លួនខ្លាំងហ្មង](http://kanha.sabay.com.kh/article/990756#utm_campaign=onpage)

ប្រភព៖ Wikihow ប្រែសម្រួល៖ លីដា