ទង្វើឆ្កួតៗតែគួរឲ្យស្រលាញ់ដែលកើតឡើងនៅពេលយើងលួចស្រលាញ់នរណាម្នាក់

2017-11-22 02:59:11
ចំនួនមតិ 0 | ចំនួនចែករំលែក 0

លួចស្រលាញ់នរណាម្នាក់គឺជាអារម្មណ៍ដែលអ្នកណាក៏ធ្លាប់ឆ្លងកាត់នោះដែរ។ នៅពេលស្ថិតក្នុងស្ថានភាពបែបនេះ យើងនឹងសកម្មភាពចម្លែកៗទាំងពេលខ្លះមិនដឹងខ្លួន ហើយខាងក្រោមនេះគឺជាសកម្មភាពទាំងនោះ។

១. តាមដានបណ្ដាញសង្គមរបស់គេ

ទទួលស្គាល់ទៅថា នេះគឺសកម្មភាពដំបូងគេបង្អស់ដែលអ្នកធ្វើនៅពេលអ្នកលួចស្រលាញ់គេ។ អ្នកនឹងជីកកកាយពី Facebook រហូតដល់ Instagram របស់គេដើម្បីរកឲ្យឃើញថាគេមានសង្សារឬនៅ ហើយចូលចិត្តធ្វើអ្វីខ្លះពេលទំនេរ។ និយាយរួមទៅអ្នកហាក់ដូចក្លាយជាភ្នាក់ងារ FBI តែម្ដង។

២. ឈរចាំកន្លែងដែលគេឧស្សាហ៍ដើរឆ្លងកាត់

នេះគឺជាសកម្មភាពដែលគួរឲ្យអស់សំណើចបំផុត។ ដើម្បីបានជួបមុខគេ អ្នកសុខចិត្តទៅឈរចាំនៅកន្លែងដើរគេឧស្សាហ៍ទៅមកបើទោះបីជាវានៅឆ្ងាយពីផ្ទះ ឬសាលាអ្នកក៏ដោយ។

៣. អួតពីគេទៅកាន់មិត្តភ័ក្ដិ

បើទោះបីជាអ្នកទាំង២មិនទាន់ជាអ្វីនឹងគ្នាក៏ដោយ ក៏អ្នកដើរអួតប្រាប់គេពីចំណុចល្អរបស់អ្នកដែលអ្នកលួចស្រលាញ់ដែរ។ គេពូកែអញ្ចេះ គេពូកែអញ្ចោះ អ្នកនិយាយដូចអ្នក និងគេស្និទ្ធស្នាលនឹងគ្នាណាស់ចឹង ទាំងដែលមិនដែលនិយាយរកគ្នាផង។

៤. សរសេរឈ្មោះគេដោយមិនដឹងខ្លួន

ពេលលួចស្រលាញ់នរណាម្នាក់ ហាក់ដូចអារម្មណ៍របស់គេគឺពោរពេញទៅដោយរូបភាពរបស់គេគ្រប់ពេលវេលា។ ជំនួសឲ្យការគូសវាសផ្ដេសផ្ដាសពេលទំនេរ អ្នកនឹងសរសេរឈ្មោះគេដោយមិនដឹងខ្លួន ហើយក៏មិនដឹងថាហេតុអ្វីក៏យើងធ្វើដូចនេះដែរ។

៥. មើលតារានិករ

គេតែងនិយាយថា អ្នកដឹងថាខ្លួនលួចស្រលាញ់គេនៅពេលអ្នកចាប់ផ្ដើមស្វែងរកថាតារានិកររបស់អ្នកទាំង២សមគ្នាឬអត់ ទាំងដែលខ្លួនមិនមែនជាមនុស្សអប្បិយជំនឿក៏ដោយ។ អ្នកអាចប្រើរយៈពេលរាប់ម៉ោងដើម្បីមើលថា តារានិកររបស់អ្នកត្រូវគ្នាប៉ុន្មានភាគរយ ហើយត្រូវធ្វើយ៉ាងម៉េចទើបមានសុភមង្គលជាមួយគ្នា។