ចាំទុក! បើស្រឡាញ់ប្ដី កុំឲ្យប្ដីរកលុយតែម្នាក់ឯងឲ្យសោះ!

2017-11-06 08:59:57
ចំនួនមតិ 0 | ចំនួនចែករំលែក 0

អូយ...!! គួរឲ្យច្រណែនណាស់ រៀបចប់ហើយក៏មិនបាច់ធ្វើការ មានប្ដីចាំរកលុយមកចិញ្ចឹម ចង់បានអីក៏បាន ដោយមិនបាច់បញ្ចេញកម្លាំងធ្វើការ...

ស្ដាប់ប្រយោគនេះទៅ ហាក់ដូចមានតែរឿងវិជ្ជមាន។ ប៉ុន្តែតាមបទពិសោធន៍ដែលខ្ញុំជួបប្រទះការពិតការទម្លាក់ភារៈរកលុយទៅឲ្យតែភាគីម្ខាងៗ វាក៏គ្រោះថ្នាក់ខ្លាំងដែរ។ សំណួរគឺថា បើថ្ងៃមួយអ្នកដែលរកលុយកើតមានការប្ដូរចិត្តទៅស្រឡាញ់អ្នកផ្សេង ឬគេសម្រេចចិត្តមិនផ្ដល់លុយឲ្យអ្នក ជីវិតអ្នកដែលមិនដែលចេញធ្វើការនឹងទៅជាយ៉ាងណា...?

រូបតំណាង

ខ្ញុំធ្លាប់មើលសន្លឹកបៀរឲ្យមនុស្សជាច្រើនដែលចង់ត្រលប់ទៅរកមនុស្សដែលខ្លួនស្រឡាញ់វិញ ទាំងខ្លួនឯងមិនបានស្រឡាញ់គេ នៅជាមួយគេក៏ទើសទាល់ ប៉ុន្តែចូលចិត្តភាពស្រណុកសុខស្រួលដែលបានមកដោយការមិនធ្វើការ។ តាមពិតទៅ ការមិនបណ្ដោយឲ្យអនាគតរបស់ខ្លួនធ្លាក់ចូលទៅក្នុងដៃភាគីម្ខាងទៀត គឺជាការកសាងអំណាចទប់ទល់ម្យ៉ាង ដើម្បីឲ្យដៃគូជីវិតរបស់អ្នកបានយល់ថា អ្នកក៏មានផ្លូវជ្រើសរើស និងត្រៀមខ្លួនរួចរាល់ក្នុងការដើរលើផ្លូវមួយរបស់ខ្លួនឯងជានិច្ច បើសិនមិនបានទទួលការយកចិត្តទុកដាក់ល្អ។

ផ្ទុយទៅវិញ ការរស់នៅដោយមិនចាំបាច់ទទួលខុសត្រូវផ្នែកសេដ្ឋកិច្ច ឬលុយកាក់នេះនឹងមានគុណវិបត្តិច្រើនជាងអ្វីដែលមនុស្សភាគច្រើនគិត។ បើសិនអ្នកមិនធ្វើការរកប្រាក់ អ្នកនឹងមានអារម្មណ៍ថាតម្លៃរបស់ខ្លួនឯងថយចុះបន្តិចម្ដងៗ ហើយនៅពេលវាធ្លាក់ដល់កម្រិតទាបបំផុត អ្នកនឹងលែងមានជំនឿចិត្តទាល់តែសោះលើខ្លួនឯង។

កាន់តែទំនេរ កាន់តែស្រួល គឺកាន់តែគ្រោះថ្នាក់ដល់ទំនាក់ទំនងប្ដីប្រពន្ធ

ជាពិសេស បើសិនជាអ្នកដែលរកចំណូលបង្គោលជួបវិបត្តិ ដូចជាបាត់បង់ការងារ រកស៊ីខាតដើម ឬមានជំងឺឈឺថ្កាត់ ក្នុងឋានៈអ្នកជាប្រពន្ធ ឬប្ដី បើសិនមិនធ្លាប់គិតរឿងសន្សំប្រាក់ទេអ្នកនឹងមិនអាចជួយអ្វីដល់គេបានឡើយ។ ការឈឺចាប់ពីការជាដៃគូប៉ុន្តែមិនអាចជួយអ្វីបាននឹងធ្វើឲ្យអ្នកមានអារម្មណ៍ដូចស្លាប់ទាំងរស់។ មិនតែប៉ុណ្ណោះ នៅពេលមានរឿងឈ្លោះគ្នា បើមានការរំលើកគុណសម្បត្តិ អ្នកនឹងនិយាយអ្វីមិនចេញ គឺបានត្រឹមតែចាញ់គេរហូត។

ប៉ុន្តែករណីខ្លះពិបាកដែរ ព្រោះមនុស្សស្រីជាច្រើនក៏មានស្វាមីដែលចង់ធ្វើខ្លួនជាវីរបុរស បែប “អូនមិនបាច់ធ្វើការទេ ចាំបងចិញ្ចឹម” ដល់ពេលដែលនាងសុំចេញមុខរកលុយចិញ្ចឹមគ្រួសារម្នាក់ទៀត ស្វាមីក៏ខឹងថាប្រពន្ធមើលងាយសមត្ថភាពរបស់គេ។ រឿងបែបនេះទម្រាំសម្របសម្រួលគ្នាបានគឺត្រូវប្រើពេលយូរ ជាពិសេសជាមួយអ្នកដែលមានការជឿជាក់លើខ្លួនឯងជ្រុល។

រូបតំណាង

ចុះគួរដោះស្រាយបែបណា…?

ច្បាប់នៃស្នេហាដែលមនុស្សលើលោកនេះយល់ទាំងអស់គ្នាគឺ អ្នកត្រូវព្យាយាមធ្វើយ៉ាងណាឲ្យជីវិតស្ថិតនៅចំណុចមួយដែលគ្មានភាគីម្ខាងទៀត អ្នកក៏អាចរស់បាន។ ព្យាយាមសាងភារៈឲ្យគូជីវិតឲ្យបានតិចបំផុត។ អ្នកអាចបង្កើតមុខរបរតូចតាចផ្ទាល់ខ្លួនដើម្បីរកចំណូលចិញ្ចឹមជីវិត។ មិនថាមានអ្វីកើតឡើងក៏ដោយ អ្នកត្រូវចេះគ្រប់គ្រងរឿងលុយកាក់នេះឲ្យបាន ហើយផ្ដល់ជំនួយដល់មនុស្សជាទីស្រឡាញ់នៅពេលគេជួបការលំបាក។

“ស្រឡាញ់ប្ដីកុំឲ្យប្ដីរកលុយតែម្នាក់ឯង” មិនមែនសរសេរឡើងដើម្បីប្ដីរបស់អ្នកនោះទេ ប៉ុន្តែគឺដើម្បីអ្នកទៅវិញទេ។ ក្នុងជីវិតមនុស្ស រឿងអ្វីក៏អាចកើតឡើងដែរ។ ពាក្យសម្ដីរបស់មនុស្សដែលយើងស្រឡាញ់ នៅពេលណាមួយវាក៏ប្រៀបដូចជាខ្យល់ដែលចេញពីមាត់របស់គេ គ្មានអ្វីអាចធានាបានថាគ្រប់យ៉ាងមិនផ្លាស់ប្ដូរនោះឡើយ។ អ្វីដែលយើងធ្វើបានគឺត្រូវត្រៀមចិត្តត្រៀមកាយសម្រាប់ទទួលយកគ្រប់ស្ថានការណ៍ដែលអាចកើតឡើង ៕

ប្រភព៖ vittarot ប្រែសម្រួល៖ ស្វាយ វ៉ាន់ថន