មុនរៀបការជាមួយអ្នកណាម្នាក់ អ្នកត្រូវតែដឹងរឿងទាំងនេះមុនសិន

2017-11-06 03:18:03
ចំនួនមតិ 0 | ចំនួនចែករំលែក 0

មង្គលការជារឿងមួួយដែលសឹងតែមនុស្សទាំងអស់មិនអាចចៀសបាន ប៉ុន្តែមុនពេលអ្នកសម្រេចចិត្តរៀបការជាមួយនរណាម្នាក់អ្នកត្រូវគិតគូរ និងពិចារណាឲ្យមែនទែនដើម្បីកុំឲ្យមានការសោកស្ដាយទៅថ្ងៃក្រោយ។ ខាងក្រោមនេះជារឿងមួយចំនួនដែលអ្នកត្រូវដឹង មុនទទួលយកមង្គលការ ៖

១. ស្ថានភាពសេដ្ឋកិច្ច

វាជារឿងមួយដែលសំខាន់សម្រាប់គូស្នេហ៍ដែលចង់រៀបការបង្កើតគ្រួសារ ព្រោះអ្នកក៏មិនអាចគ្មានលុយសោះសម្រាប់ចាប់ដៃគ្នាឡើយ។ អ្នកត្រូវតែគិតគូរក្នុងការចំណាយ និងរៀបចំយ៉ាងណាឲ្យគ្រួសារបានសុខស្រួលដែរ មិនមែនចាប់ដៃគ្នាហើយគ្មានអ្វីជាប់នឹងខ្លួនសោះទេ។ ត្រូវមានការងារ មុខរបរណាមួយឲ្យបានជាក់លាក់ដើម្បីអាចប្រាកដថាគាត់ និងអ្នកអាចផ្គត់ផ្គង់គ្រួសារបាន។

រូបតំណាង

**២. អារម្មណ៍នឹងការទទួលខុសត្រូវពេលមានកូន**

រៀបការហើយ យូរឬក៏ឆាប់អ្នកប្រាកដជាត្រូវយកកូន ដូច្នេះអ្នកគួរតែប្រាកដថាគាត់ និងអ្នកអាចទទួលខុសត្រូវលើការមើលថែរក្សា ស្រឡាញ់ថ្នាក់ថ្នមកូនៗបាន។ បើគាត់ ឬក៏អ្នកគ្មានអារម្មណ៍ល្អចំពោះក្មេង ឬក៏ខ្ជិលមិនចង់មើលថែកូននោះ អ្នកគួរតែពិចារណាលើការរៀបការម្ដងទៀត។

៣. ប្រវត្តិនៃសុខភាព

សុខភាពជារឿងសំខាន់ណាស់ ដូច្នេះមុននឹងសម្រេចចិត្តរៀបការជាមួយនរណាម្នាក់ អ្នកត្រូវប្រាកដថាគាត់គ្មានជំងឺឆ្លង ជំងឺតពូជ ឬក៏ជំងឺកាមរោគផ្សេងៗ។ វាមិនមែនជារឿងសម្រាប់តែអ្នកទាំងពីរទេ តែវាអាចបន្ត និងផ្ដល់ផលលំបាកដល់កូន និងអ្នកជំនាន់ក្រោយបាន។

រូបតំណាង

៤. ការស្រឡាញ់ និងអារម្មណ៍ដែលមាន

តើនោះពិតជាការរៀបការដោយចេញពីចិត្ត? ហើយគាត់ ឬក៏អ្នកអាចស្រឡាញ់គ្នាបានរហូតដែរឬក៏អត់? បើសិនជាវាគ្រាន់តែជាអារម្មណ៍មួយពេល ឬក៏ដោយសារអ្នកត្រូវការគាត់ដើម្បីជួយអ្នក នោះអ្នកមិនគួររៀបការទេ។ ត្រូវសិក្សាពីចិត្តខ្លួនឯង និងគាត់ឲ្យបានច្បាស់មុននឹងរៀបការ។

៥. អត្តចរិត

គាត់ជាមនុស្សបែបណា? មានភាពរឹងមាំសម្រាប់គ្រួសារឬនៅ? គាត់ជាចូលចិត្តប្រើកម្លាំងបាយទេ? ចូលចិត្តផឹកស៊ីកម្រិតណាដែរ? ទាំងនេះសុទ្ធតែអ្នកត្រូវដឹង ព្រោះពេលការហើយអ្នកត្រូវរស់នៅជាមួយគាត់ ហើយបើគាត់ជាមួយមនុស្សចូលចិត្តផឹកស៊ី ស្រវឹងមកវាយដំ ឬក៏ដើរលេងបំផ្លាញទ្រព្យគ្មានចេះគិត តើអនាគតគ្រួសារនឹងទៅជាយ៉ាងណា?