៥វិធីសម្រួលអារម្មណ៍ពេលបាក់ទឹកចិត្តខ្លាំង
- 2017-10-05 03:30:35
- ចំនួនមតិ 0 | ចំនួនចែករំលែក 0
៥វិធីសម្រួលអារម្មណ៍ពេលបាក់ទឹកចិត្តខ្លាំង
មានបញ្ហាជាច្រើនដែលបានបំបាក់ទឹកចិត្តស្ត្រី មិនថារឿងស្នេហា គ្រួសារ សុខភាព ការងារឬមុខជំនួញនោះទេ។ បញ្ហាទាំងអស់នោះប៉ះពាល់ផ្លូវចិត្តស្ត្រីតាមទម្រង់និងបែបផែនផ្សេងៗគ្នា។ ដំណោះស្រាយគឺមានវិធីតែម្យ៉ាងគត់គឺរៀនសម្រួលអារម្មណ៍និងគិតរកដំណោះស្រាយផ្សេងៗដើម្បីអោយអារម្មណ៍បានធូរស្រាលឡើងវិញ។មានវិធីច្រើនយ៉ាងដែលស្ត្រីអាចពិចារណាដើម្បីបន្ធូរអារម្មណ៍។
១. យំអោយខ្លាំងៗពេលបេះដូងនោះឈឺចាប់ពេក
មានយោបល់ខ្លះគិតថាការយំស្រែកវាជារឿងអាម៉ាស់និងគ្មានប្រយោជន៍ព្រោះទោះបីជាយំរួចក៏មិនអាចធ្វើអោយបញ្ហាប្រសើរឡើងបានដែរ។ តែការគិតនេះផ្ទុយស្រលះ អ្នកឈឺចាប់ទើបដឹងថាការទ្រហោយំអាចជួយបន្ធូរភាពតានតឹងនិងធ្វើអោយអារម្មណ៍ប្រសើរឡើងវិញនឹងអាចគិតរកមធ្យោបាយចេញផងដែរ។
២. កុំស្ដាប់មតិអ្នកដទៃដែលធ្វើការប្រៀបធៀប
ជាការពិតណាស់អ្នកមិនអាចហាមអ្នកផ្សេងមិនអោយបញ្ចេញយោបល់ទេ តែត្រូវគិតថាទំហំនិងបែបផែននៃការឈឺចាប់ផ្សេងៗគ្នា។ អ្នកដទៃអាចប្រាប់អ្នកថាគេជួបរឿងពិបាកជាងនេះរាប់រយដង។ តែអ្នកមិនមែនជាគេទេ ដូចនេះកុំត្រងត្រាប់ស្ដាប់ ដើរចេញ ឬស្ដាប់តន្ត្រីបន្ធូរអារម្មណ៍ជាដើម។
៣. មិនត្រូវយកបញ្ហាទាំងនោះមកបន្ទោសខ្លួនឯងទេ
មិនមែនបានន័យថាអោយអ្នកយករួចខ្លួនទេ តែបើបន្ទោសខ្លួនឯងហើយតើបានអីមកវិញ។ គួរយកបញ្ហានិងកំហុសទាំងនោះមកធ្វើជាមេរៀន ដើម្បីបញ្ចៀសវាទៅថ្ងៃមុខ ហើយបង្ហាត់អ្នកអោយក្លាយជាមនុស្សរឹងមាំជាងមុនផងដែរ។
៤.ចាប់ផ្ដើមថ្ងៃថ្មីមួយជំហានម្ដង
ចាប់ផ្ដើមថ្ងៃថ្មីអ្នកដោយធ្វើរឿងសប្បាយៗដែលអ្នកចង់ធ្វើដូចជា មើលកុន ទិញទំនិញ ជួបមិត្តភ័ក្ដិជាដើមដើម្បី កម្សាន្តបន្ធូរអារម្មណ៍។ សូមកុំបង្ខំ តក់ក្រហល់រកវិធីដោះស្រាយបញ្ហាភ្លាមៗ ព្រោះខួរក្បាលត្រូវការសម្រាកដូចគ្នា។
៥. គិតដល់អ្នកនៅជុំវិញខ្លួន
ពិតណាស់ មានមនុស្សជាច្រើនដែលចាំជួយជ្រោមជ្រែងអ្នក ដូចជាក្រុមគ្រួសារឪពុកម្ដាយ បងប្អូនមិត្តស្និទ្ធស្នាល។ ត្រូវដឹងថាអ្នកមិនមែននៅម្នាក់ឯងទេព្រោះពួកគេចាំជួយចែករំលែកបញ្ហានិងការលំបាកនោះជាមួយអ្នកគ្រប់ពេល ៕