បើមិត្តប្រុសហ៊ានធ្វើចំណុចទាំងនេះ គួរតែដាច់គ្នាឱ្យហើយទៅ ព្រោះ...

2017-08-23 01:06:37
ចំនួនមតិ 0 | ចំនួនចែករំលែក 0

ក្នុងរឿងស្នេហា ត្រូវចងចាំថា ភាគីទាំងសងខាងត្រូវតែយល់ពីគ្នា ចេះឱ្យតម្លៃគ្នា មិនថាក្នុងកាលៈទេសៈណា ឬមានរឿងអ្វីក៏ដោយ។ ហើយភាគច្រើន អ្នកដែលអាចនឹងក្លាយជាភាគីរងគ្រោះក្នុងរឿងស្នេហា គឺជាខាងស្រីដែលអាចត្រូវខាងប្រុសបំពាន ឬធ្វើរឿងមិនគប្បីមួយចំនួនដាក់។ ដូច្នេះ បើពេលកំពុងទាក់ទងគ្នា សង្សាររបស់អ្នកបានធ្វើរឿងដូចខាងក្រោមនេះ ស្រីៗគួរតែពិចារណាឡើងវិញ ព្រោះវាកំពុងបង្ហាញថា គេនៅមិនទាន់ទុកយើងសំខាន់ ឬបានប្រគល់ក្ដីស្រលាញ់ពិតប្រាកដឱ្យយើងទេ។

១- គេតែងបង្ខំអ្នកឱ្យធ្វើរឿងដែលអ្នកមិនចូលចិត្ត

ឧទាហរណ៍ថា គេចូលចិត្តលេងកីឡា ហើយអ្នកមិនចូលចិត្ត ប៉ុន្តែគេតែងបង្ខំអ្នកឱ្យទៅអង្គុយចាំមើលគេ ឬលើកទឹកចិត្តគេ ទាំងដឹងថា វាជាអ្វីដែលអ្នកធុញ និងមិនចង់ធ្វើក៏ដោយ។ ជាគូស្នេហ៍ មិនគួរឱ្យរឿងនេះកើតឡើងទេ ព្រោះវាហាក់ដូចជាការបង្ខំមនុស្សម្នាក់ឱ្យមកស្រលាញ់យើងអ៊ីចឹង។ បើអ្នកចង់ធ្វើអ្វីដែលខ្លួនឯងចូលចិត្ត គួរតែទុកពេលឱ្យភាគីម្ខាងទៀតបានធ្វើរឿងដែលគេចូលចិត្តដូចគ្នា ជាជាងនៅក្បែរគ្នាគ្រប់ពេលទាំងគេមិនសប្បាយចិត្ត។

២- គេសុំឱ្យអ្នកចំណាយពេលជាមួយគេច្រើនជាងជាមួយមិត្តភ័ក្ដិ ឬគ្រួសារ

សម្រាប់នារី មិត្តភ័ក្ដិនិងក្រុមគ្រួសារគឺជាមនុស្សសំខាន់មួយក្នុងជីវិត ប៉ុន្តែបើប្រុសម្នាក់នោះស្រាប់តែបង្ខំឱ្យអ្នកចំណាយពេលជាមួយគេច្រើនជាងជាមួយអ្នកផ្សេងនោះ បានន័យថា គេជាមនុស្សអាត្មានិយម ហើយថ្ងៃក្រោយទៅ គេអាចនឹងឱ្យអ្នករើសរវាងគេនិងគ្រួសារ ឬមិត្តភ័ក្ដិអ្នកជាមិនខាន។ បើអ្នករើសយកគ្រួសារ គេសុខចិត្តបែកគ្នាក៏ថាបាន។

៣- ពេលអ្នកយំ តែងប្រាប់ឱ្យឈប់យំ ជាជាងលួងឬលើកទឹកចិត្ត

អ្នកណាៗក៏អាចមានរឿងដែលត្រូវយំ ហើយពេលកំពុងស្ថិតក្នុងស្ថានភាពនេះ អ្វីដែលត្រូវការបំផុតគឺកម្លាំងចិត្ត និងការលួងលោម។ ប៉ុន្តែបើគេបែរជាបានតែប្រាប់ឱ្យអ្នកឈប់យំ ហើយមិនបានលើកហេតុផល ឬពាក្យពេចន៍លើកទឹកចិត្ត ឬដំណោះស្រាយអ្វីសោះ នោះបានន័យថា គេមិនបានទុកការឈឺចាប់របស់អ្នកជារឿងសំខាន់ឡើយ ហើយគេក៏នឹងមិនមានចិត្តជួយដោះស្រាយបញ្ហាជាមួយអ្នកនៅថ្ងៃអនាគតដែរ។

៤- សុំឱ្យអ្នកនិយាយកុហកដើម្បីជួយការពារគេ

ក្នុងនាមជាមនុស្សស្រលាញ់គ្នា អ្នកមិនត្រូវជួយកុហកដើម្បីការពារកំហុសរបស់គេឡើយ។ បើពួកគេធ្វើខុស គេត្រូវហ៊ានទទួលខុសត្រូវ និងដោះស្រាយដោយក្លាហាន ព្រោះបុរសដើមទ្រូង៥ហត្ថ មិនអាចសុំឱ្យមនុស្សស្រីចេញមុខការពារខ្លួន ហើយខ្លួនឯងនៅសម្ងំធ្វើមិនដឹងរឿងពីក្រោយខ្នងបែបនេះទេ។

៥- គេសុំឱ្យអ្នកឈប់ធ្វើអ្វីដែលជាក្ដីស្រមៃរបស់ខ្លួន

ការងារ ឬមហិច្ឆតារបស់អ្នកគឺអ្នកត្រូវតែសម្រេចឱ្យបានដោយខ្លួនឯង មិនមែនត្រូវបានកំណត់ ឬបង្គាប់បញ្ជាថាគួរបន្តឬបោះបង់ដោយមនុស្សដែលអ្នកស្រលាញ់ទេ។ លើកលែងតែមានការពិគ្រោះឬសុំយោបល់ ទើបអាចជាការសម្រេចចិត្តដ៏ល្អ។ ប៉ុន្តែបើនៅសុខៗ គេស្រាប់តែមកប្រាប់ថាឱ្យអ្នកឈប់ធ្វើវាដើម្បីបាននៅក្បែរគេ វាគឺជារឿងដែលមិនគួរធ្វើជាដាច់ខាត។

៦- គេប្រាប់ឱ្យអ្នកប្ដូរសាសនា ឬនិន្នាការនយោបាយ

ជំនឿតែងកើតឡើងក្នុងចិត្តមនុស្សម្នាក់ៗ តាមហេតុផលរៀងៗខ្លួន ហើយក៏គ្មានអ្នកណាអាចបង្ខំឱ្យផ្លាស់ប្ដូរ ឬជឿងាយៗដែរ។ បើមិត្តប្រុសអ្នកជាមនុស្សកាន់សាសនាផ្សេង ហើយអ្នកជឿលើសាសនាផ្សេង អ្នកទាំងពីរគួរតែពិភាក្សាគ្នាជាមុនសិន ដើម្បីដឹងថាគេអាចទទួលយកអ្វីដែលយើងមាននេះដែរឬក៏អត់។

ផ្ទុយទៅវិញ បើការកាន់សាសនាខុសគ្នា ឬនិន្នាការនយោបាយខុសគ្នា គឺជាឧបសគ្គមួយសម្រាប់ស្នេហារបស់អ្នក រហូតគេត្រូវប្រាប់ថា ទាល់តែប្ដូរមកតាមគេទើបអាចរស់នៅជាមួយគ្នាបាននោះ អ្នកគួរគិតឡើងវិញ ថាគួរផ្លាស់ប្ដូរដើម្បីគេ ឬដើរតាមអ្វីដែលខ្លួនគិតថាត្រឹមត្រូវ ហើយស្វែងរកមនុស្សផ្សេងដែលអាចទទួលយកបានវា?

ប្រភព៖ thoibao ប្រែសម្រួល៖ សរ សុគន្ធី