សំលៀកបំពាក់៥យ៉ាងមនុស្សស្រីគួរចៀសវាងពេលចូលរួមមង្គលការ

2017-08-01 05:38:00
ចំនួនមតិ 0 | ចំនួនចែករំលែក 0

ពេលទៅញ៉ាំការគឺជាពេលវេលាដ៏ពិសេសសម្រាប់មនុស្សស្រីក្នុងការតែងខ្លួនឲ្យបានស្អាត ទាំងការតុបតែងមុខ សក់ និងសំលៀកបំពាក់។ យ៉ាងណាមិញមានសំលៀកបំពាក់មួយចំនួនដែលនារីៗមិនគួរស្លៀកទេពេលចូលរួមពិធីមង្គលការ។ ចង់ដឹងថាមានសំលៀកបំពាក់បែបណា និងមូលហេតុយ៉ាងណាខ្លះ សូមអានខាងក្រោមនេះតែម្ដង៖

១. រ៉ូបស

ពណ៌សអាចធ្វើឲ្យអ្នកដែលពាក់វាមើលទៅប្រណិត ស្រស់ស្អាត និងសុភាព។ ទោះយ៉ាងណា ក្នុងពិធីមង្គលការ ពណ៌សគឺជាពណ៌សម្រាប់កូនក្រមុំ ដូច្នេះអ្នកជាភ្ញៀវគួរចៀសវាងស្លៀករ៉ូបស (ពិសេសរ៉ូបវែង និងម៉ូដខ្លាំង) ដើម្បីកុំឲ្យជាន់គ្នានឹងកូនក្រមុំ។

២. រ៉ូបខ្មៅ

ទោះបីវាមើលទៅស្រស់ស្អាត មានលក្ខណៈផ្លូវការ ប៉ុន្តែបើតាមអប្បិយជំនឿ ពណ៌ខ្មៅនេះតំណាងឲ្យភាពងងឹត អពមង្គល ដែលក្នុងថ្ងៃមង្គលសម្រាប់កូនកំលោះកូនក្រមុំបែបនេះ អ្នកគួរតែចៀសវាង។

៣. រ៉ូបសិចស៊ីខ្លាំង

មង្គលការគឺជាពិធីជប់លៀងលក្ខណៈផ្លូវការមួយ មិនមែនជាពិធីជប់លៀងតាមឆ្នេរខ្សាច់អីនោះទេ ដូច្នេះបើអ្នកស្លៀកសំលៀកបំពាក់សិចស៊ីពេក ក៏មិនសូវល្អដែរ។ ជាការល្អមុនពេលជ្រើសរើសរ៉ូបទៅញ៉ាំការ គួរគិតដល់ពេលអង្គុយ និងឡើងជណ្ដើរផង ហើយធ្វើយ៉ាងណាកុំឲ្យឃើញអាវក្នុង។

៤. ឈុតខោវប៊យ

សំលៀកបំពាក់ខោវប៊យគឺជាជម្រើសដ៏ល្អសម្រាប់ការចេញដើរខាងក្រៅ ប៉ុន្តែក្នុងពិធីមង្គលការអ្នកគួរស្លៀកអ្វីដែលមើលទៅប្រណិតៗ ដើម្បីជាការផ្ដល់កិត្តិយសដល់ម្ចាស់កម្មវិធី។

៥. រ៉ូបប្រណិតជ្រុល

ពិតណាស់អ្នកណាក៏ចង់ស្អាតដែរពេលចូលរួមពិធីមង្គលការ ប៉ុន្តែត្រូវចាំថាអ្នកមិនមែនមកដើរលើកម្រាលព្រំក្រហម ឬមកទាក់ទាញចំណាប់អារម្មណ៍ ជាតួឯកស្រីក្នុងកម្មវិធីនោះទេ ដូច្នេះគួរជ្រើសរើសម៉ូដណាដែលល្មមចុះជំនុំនឹងគេឯងគឺគ្រប់គ្រាន់ហើយ ៕