ប្រាក់ខែតិច ចាយយ៉ាងម៉េចឲ្យសល់លុយសន្សំ មិនជំពាក់គេ?

2017-07-31 09:51:55
ចំនួនមតិ 0 | ចំនួនចែករំលែក 0

អ្នកណាៗក៏ចង់មានប្រាក់សន្សំខ្លះទុកប្រើប្រាស់នៅពេលមានអាសន្ន ឬទិញទ្រព្យរបស់អ្វីមួយដែលយើងចង់បាន។ ប៉ុន្តែមានមនុស្សជាច្រើននាក់ ធ្វើការយូរហើយមិនមានប្រាក់សន្សំសោះ ថែមទាំងមានបំណុលជុំទិសទៀត។ ដូច្នេះថ្ងៃនេះ Kanha នឹងបង្ហាញជូនវិធីងាយៗចំនួន ៥ដែលអ្នកណាៗក៏ធ្វើបាន។ សាកល្បងធ្វើតាម ជីវិតអ្នកនឹងផ្លាស់ប្ដូរបានមិនគួរឲ្យជឿ។

៥. សន្សំសិន សឹមចាយតាមក្រោយ

ក្នុងថ្ងៃបើកប្រាក់ខែ ត្រូវដកលុយមួយចំណែកមកសន្សំភ្លាម ដោយចំនួនដែលសន្សំត្រូវសមហេតុសមផលជាមួយប្រាក់ចំណូលដែលរកបាន មិនច្រើនពេក ឬមិនតិចពេក។ ការដាក់លុយសន្សំជាមុននេះជាវិធីល្អជាងការដែលចាយហើយ សល់ប៉ុន្មាន ទើបសន្សំ ព្រោះភាគច្រើនយើងតែងចាយច្រើនភ្លេចខ្លួនរហូតអស់លុយតែម្ដង។

៤. បែងចែកគណនីប្រាក់សន្សំ និងគណនីប្រាក់ចំណាយ

បើកគណនីសន្សំប្រាក់ដាច់ដោយឡែកពីគណនីសម្រាប់ការចំណាយផ្សេងៗ។ នៅពេលយើងដកលុយពីប្រាក់ខែមកសន្សំ គឺត្រូវបញ្ចូលក្នុងគណនីសន្សំនោះភ្លាម ហើយគណនីសន្សំនោះមិនគួរធ្វើកាតអេធីអឹមនោះឡើយ។

៣. កំណត់លុយចាយតាមថ្ងៃ

យកប្រាក់ខែដែលដកប្រាក់ចំណាយប្រចាំខែផ្សេងៗរួចអស់ហើយមកបែងចែកសម្រាប់ទុកចាយក្នុងមួយថ្ងៃៗ។ វិធីនេះនឹងជួយឲ្យយើងកំណត់ចំនួនប្រាក់ដែលចំណាយក្នុងមួយថ្ងៃៗបាន។

២. កុំមើលងាយប្រាក់មួយកាក់មួយសេន

លុយរាយមួយរយ ពីររយរៀល ត្បិតតែជាចំនួនតិច ដែលមនុស្សជាច្រើនមិនចង់បាន ឬបានមកហើយដាក់រាយមាយមិនខ្វល់ ប៉ុន្តែបើយើងសាកល្បងទុកលុយរាយទាំងនោះឲ្យបានច្រើន យូរៗវាគង់ក្លាយជាលុយច្រើនដូចគ្នា។

១. កាត់បន្ថយប្រាក់ចំណាយមិនចាំបាច់

សាកល្បងហាមឃាត់ចិត្តខ្លួនឯងកុំឲ្យទិញរបស់ណាដែលមិនចាំបាច់ និងគ្មានប្រយោជន៍ដូចជា តែ កាហ្វេ ស្រា បារី ដែលក្រៅពីបង្ហិនលុយហើយ គ្រឿងទាំងអស់នេះក៏ផ្ដល់ផលមិនល្អដែរសម្រាប់សុខភាពថែមទៀតផង។ នៅពេលយើងកាត់ចិត្តមិនទិញវាបានហើយ យើងអាចយកលុយទាំងនោះទៅដាក់ក្នុងគណនីប្រាក់សន្សំ នោះចំនួនប្រាក់សន្សំរបស់យើងនឹងកើនឡើងមិនគួរឲ្យជឿ ៕

ប្រភព៖ Spiceee ប្រែសម្រួល៖ ស្វាយ វ៉ាន់ថន