កុំកាត់សក់ខ្លីដោយសារតែឈឺចិត្តរឿងស្នេហាឲ្យសោះ

2017-07-31 04:21:48
ចំនួនមតិ 0 | ចំនួនចែករំលែក 0

ខ្ញុំធ្លាប់អានឃ្លាមួយនិយាយថា៖ "មនុស្សស្រីណាដែលមានសក់វែងគឺជាអ្នកដែលមានសុភមង្គល ព្រោះពេលឈឺចិត្តរឿងស្នេហា មនុស្សស្រីតែងទៅកាត់សក់"។

ខ្ញុំអស់សំណើច តែនៅជ្រុងមួយ ឃ្លានេះត្រូវពិតមែន។ នៅពេលឈឺចាប់ មនុស្សស្រីតែងមានទំនោរចង់បំភ្លេចអតីតកាល។ ហើយរឿងទី១ដែលពួកគេធ្វើគឺផ្លាស់ប្ដូរខ្លួនឯង សក់ក្បាលគឺជាកន្លែងដំបូងបង្អស់ដែលពួកគេគិតដល់។

ខ្ញុំមានមិត្តភ័ក្ដិម្នាក់ ក្រោយពេលបែកគ្នានឹងមិត្តប្រុស នាងស្អាតជាងមុន ឡូយឆាយជាងមុន។ នាងចង់បញ្ជាក់ឲ្យផែនដីទាំងមូលដឹងថានាងមិនអីទាំងអស់។ ចង់ឲ្យសង្សារចាស់ដឹងថា គ្មានគេនាងនៅតែអាចរស់នៅបានដោយគ្មានបញ្ហា។

យ៉ាងណាក៏ដោយ ខាងក្រោយការផាត់មុខដ៏មុតស្រួចនោះ ក៏មិនអាចកែវភ្នែកដ៏ពិបាកចិត្តនោះបានឡើយ។ សំលៀកបំពាក់កាលីបៗទាំងនោះក៏គ្រាន់តែជារនាំងបិទបាំងរាងកាយដ៏ទន់ខ្សោយនោះដែរ។

ខ្ញុំមានសក់វែង ខ្ញុំជាស្រីមានសុភមង្គល ពិតមែនហើយ។ តែនេះមិនមែនមានន័យថាខ្ញុំមិនធ្លាប់ឆ្លងកាត់ការបែកបាក់នោះឡើយ។ ខ្ញុំក៏ធ្លាប់ឈឺចិត្ត មិនត្រឹមតែមួយដង តែច្រើនដងទៀតផង។ ផ្លាស់ប្ដូររូបរាងខាងក្រៅគ្រាន់តែជាដំណោះស្រាយបណ្ដោះអាសន្ន។

ខ្ញុំមិនហាមស្រីៗមិនឲ្យកាត់សក់នោះទេ តែគួរកាត់នៅពេលដែលចិត្តយើងចង់បានម៉ូដនោះពិតមែនមិនមែនដើម្បីបន្លប់ចិត្តខ្លួនឯងនោះឡើយ។ មិនដូច្នេះទេ គេប្រាកដជាដឹងថាយើងកាត់សក់ដោយសារតែឈឺចាប់ និងចង់បំភ្លេចអ្វីម្យ៉ាង៕