គ្រាន់តែធ្វើរឿងទាំងនេះ ប្តីប្រពន្ធដឹងតែលែងចង់គេងបែកគ្នា

2017-07-04 12:33:00
ចំនួនមតិ 0 | ចំនួនចែករំលែក 0

វាមិនមែនជារឿងចម្លែកទេ ដែលប្តីប្រពន្ធខ្លះរៀបការជាមួយគ្នាយូរទៅ ក៏ស្រាប់តែចង់គេងបែកគ្នា ដោយសារតែហេតុផលមិនត្រូវគ្នាមួយចំនួន។ ប្រការនេះ មិនមែនជាការរៀបគម្រោងក្បត់គ្នានោះទេ ប៉ុន្តែគ្រាន់តែបរិយាកាសគេងជាមួយគ្នាមិនអំណោយផលប៉ុណ្ណោះ។ ដូចនេះ ដើម្បីអាចឲ្យប្តីប្រពន្ធគេងជាមួយគ្នា ប្រកបដោយភាពកក់ក្តៅជាប្រចាំថ្ងៃ អ្នកអាចធ្វើរឿងទាំងនេះបាន៖

១. កំណត់ម៉ោងពេលចូលគេងឲ្យបានច្បាស់លាស់

ប្តីប្រពន្ធគួរតែស្រុះស្រួលគ្នា រឿងម៉ោងចូលគេង និងភ្ញាក់ពីគេង។ បើមិនកំណត់នោះទេ ម្នាក់ៗអាចទាស់សម្តីគ្នា នៅពេលដែលម្នាក់ចង់គេង តែម្នាក់ទៀតនៅចង់បន្តការងារដែលបង្កជាការរំខាន។

២. គោរពតាមកាលវិភាគនៃពេលសម្រាក

កំណត់ម៉ោងគេងហើយ ភាគីទាំងសងខាងត្រូវគោរពតាមកាលវិភាគនោះជាប្រចាំ លើកលែងតែមានករណីពិសេសណាមួយ។ ត្រូវរម្លឹកគ្នាទៅវិញទៅមក ឲ្យគេងឲ្យបានគ្រប់គ្រាន់ដើម្បីរក្សាសុខភាព។

៣. តុបតែងបន្ទប់គេង

អ្នកអាចកែច្នៃបន្ទប់គេង ឲ្យរ៉ូមែនទិក ដោយរក្សាភាពស្ងប់ស្ងាត់ និងមានសីតុណ្ហភាពត្រជាក់ល្មម។ ធ្វើបែបនេះ ទោះជាស្វាមីមានអារម្មណ៍ហត់ពីថ្ងៃយ៉ាងណា ក៏គាត់គង់តែចង់ថ្នាក់ថ្នមអ្នកជានិច្ច។

៤. ដាក់សម្ភារៈអេឡិចត្រូនិកនៅឲ្យឆ្ងាយពីខ្លួន

ទូរសព្ទ កុំព្យូទ័រ កុំដាក់ជិតខ្លួន។ ធ្វើបែបនេះ មិនត្រឹមតែមិនប៉ះពាល់ដល់សុខភាពប៉ុណ្ណោះទេ តែថែមទាំងមិនរំខានពេលអ្នក និងស្វាមី កំពុងតែល្អូកល្អិន ឬកំពុងតែគេងស្កប់ស្កល់ជាមួយគ្នា។

៥. ជៀសវាងញ៉ាំទឹកច្រើនជ្រុល មុនពេលជិតចូលគេង

បើអ្នកញុំាទឹកច្រើនពេក នោះវាអាចធ្វើឲ្យអ្នកឧស្សាហ៍ងើបចូលបន្ទប់ទឹកញឹក ដែលបង្កការរំខានដល់ដំណេករបស់ស្វាមីនិងខ្លួនអ្នកផ្ទាល់។

៦. ហាត់ប្រាណប្រចាំថ្ងៃ

ការហាត់ប្រាណអាចឲ្យអ្នកមានអារម្មណ៍ និងសុខភាពល្អ។ ដូច្នេះ អ្នកអាចគេងលក់បានស្រួល ហើយមិនស្រមុកទៀត។

៧. ពូកខ្នើយត្រូវឲ្យមានភាពទន់ល្មើយ

បើពូក ខ្នើយរឹងកំព្រឹស អ្នកក៏គេងមិនស្រួល ហើយស្វាមីរបស់អ្នក ក៏គ្មានអារម្មណ៍ចង់ធ្វើអ្វីផ្សេងនោះដែរ ព្រោះគាត់នឹងទើសទាល់ចំពោះភាពមិនកក់ក្តៅនេះ។ រៀបចំគ្រែគេងជាមួយនឹងសម្ភារៈដែលមានភាពទន់ល្មើយ និងពណ៌ស្រស់ស្អាត គឺល្អបំផុតសម្រាប់ដំណេកដែលប្រកបដោយផាសុកភាព។

ចុចអាន៖ រៀបការរួចភ្លាម កូនក្រមុំដាច់ខាតកុំធ្វើរឿងទាំងនេះ ព្រោះអាចនាំបញ្ហាមិនចេះចប់

អានបន្ត៖ ប្រពន្ធមានផ្ទៃពោះ ប្ដីទ្រាំអត់បាន រកស្រីខាងក្រៅ ចុងក្រោយកើតរឿងស្មានមិនដល់

ប្រភព៖ healthywomen ប្រែសម្រួល៖ ភារី