រឿងមួយចំនួនដែលអ្នកប្រហែលមិនទាន់ដឹងពីភរិយាប្រធានាធិបតីថ្មីរបស់បារាំង
- 2017-05-11 03:14:17
- ចំនួនមតិ 0 | ចំនួនចែករំលែក 0
រឿងមួយចំនួនដែលអ្នកប្រហែលមិនទាន់ដឹងពីភរិយាប្រធានាធិបតីថ្មីរបស់បារាំង
ក្រៅពីនយោបាយ រឿងស្នេហារបស់លោក Emmanuel Macron ប្រធានាធិបតីថ្មីរបស់បារាំង និងអ្នកស្រី Brigitte Trogneux ក៏បានធ្វើឲ្យល្បីរន្ទឺមិនស្ទើរដែរព្រោះអ្នកទាំងពីរមានអាយុខុសគ្នាដល់ទៅ២៤ឆ្នាំឯណោះ។ ទោះយ៉ាងណា ប្ដីប្រពន្ធមួយគូនេះនៅតែជម្នះការរិះគន់បាន។ ខាងក្រោមនេះគឺជារឿងមួយចំនួនពីអ្នកស្រី Trogneux ដែលអ្នកប្រហែលមិនទាន់ដឹង៖
១. អ្នកស្រី Trogneux ធ្លាប់ធ្វើជាគ្រូបង្រៀនរបស់លោក Macron ៖ អ្នកស្រីបង្រៀននៅទីក្រុង Amiens ភាគខាងជើងប្រទេសបារាំង ជាកន្លែងដែលអ្នកស្រីបានជួបនឹងក្មេងប្រុស Macron។
២. មិនមាននរណាដឹងថាពួកគេក្លាយជាគូស្នេហ៍តាំងពីពេលណាទេ៖ ព្រោះអ្នកទាំងពីរមិនដែលបង្ហាញវាជាសាធារណៈ។ ទោះយ៉ាងណា លោក Macron ធ្លាប់និយាយថាលោកសារភាពស្នេហ៍ទៅអ្នកគ្រូ Trogneux តាំងពីលោកអាយុ ១៧ ឆ្នាំម្ល៉េះ។ ទោះឪពុកម្ដាយមិនពេញចិត្តតែលោកនៅតែជម្នះដោយប្រាប់ទៅអ្នកគ្រូ Trogneaux ថា «ទោះមានរឿងអ្វីកើនឡើង ខ្ញុំនឹងរៀបការជាមួយអ្នកឲ្យបាន»។
៣. អ្នកស្រីបានលែងលះស្វាមីដើម្បីលោក Macron៖ ការលែងលះបានធ្វើឡើងនៅឆ្នាំ ២០០៦ដែលពេលនោះអ្នកស្រីមានកូនបីនាក់រួចទៅហើយ។ មួយឆ្នាំក្រោយមក អ្នកស្រីបានរៀបការជាមួយលោក Macron ។ អ្នកស្រីបានផ្លាស់មករស់នៅទីក្រុង ប៉ារីស និងបន្តបង្រៀននៅទីនេះរហូតដល់ឆ្នាំ ២០១៥ ទើបអ្នកស្រីឈប់បង្រៀនដើម្បីចំណាយពេលជួយកិច្ចការស្វាមីដែលជារដ្ឋមន្ត្រីសេដ្ឋកិច្ចបារាំងនៅពេលនោះ។
៤. អ្នកស្រីជាអ្នកជ្រោមជ្រែងសំខាន់បំផុតក្នុងការដណ្ដើមដំណែងប្រធានាធិបតីនេះ៖ នៅបារាំង វាមិនមែនជារឿងធម្មតាទេដែលភរិយាបេក្ខភាពប្រធានាធិបតីចេញមុខជ្រោមជ្រែងស្វាមីច្រើនបែបនេះ។ អ្នកស្រីបានជួយរៀបចំសន្ទរកថារបស់លោក Macron ហើយថែមទាំងជួយរៀបចំឫកពាក្នុងពេលបង្ហាញវត្តមានម្ដងៗផងដែរ។
៥. កូនរបស់អ្នកស្រីក៏បានចូលរួមជួយលោក Macron ដែរ៖ កូនដើមទាំងបីនាក់ត្រូវបានអះអាងថាតែងមានទំនាក់ទំនងល្អជាមួយលោក Macron។ ពួកគេតែងមានមុខនៅកន្លែងលោក Macron ថ្លែងសន្ទរកថាជានិច្ច៕