គូស្នេហ៍មានជំងឺចម្លែកដូចគ្នាប្រារព្ធខួបអាពាហ៍ពិពាហ៍២២ឆ្នាំ កំពុងល្បី

2017-02-25 08:34:25
ចំនួនមតិ 0 | ចំនួនចែករំលែក 0

ប្ដីប្រពន្ធមួយគូបានកើតជំងឺកម្រម្យ៉ាងពីកំណើតធ្វើឲ្យមានមុខមាត់ជ្រួញ និងភ្នែកមើលទៅស្រឡេវទាំងពីរនាក់ ហើយធ្លាប់ធ្វើឲ្យមនុស្សជាច្រើនរិះគន់ មាក់ងាយរាប់ឆ្នាំ តែពួកគេនៅរឹងប៉ឹងជានិច្ច។

អ្នកស្រី Maryanne អាយុ៤៥ឆ្នាំ និងលោក Tommy Pilling អាយុ៥៩ឆ្នាំ ត្រូវបានជឿថាជាគូស្នេហ៍ដំបូងគេកើតជំងឺមានអវយវៈខុសប្លែកធម្មតា ឬហៅ Down Syndrome ដែលយកគ្នាធ្វើជាប្ដីប្រពន្ធ ដោយបានរៀបការតាំងពីឆ្នាំ ១៩៩៥។

ងាកទៅមើលប្រវត្តិស្នេហ៍របស់ពួកគាត់បន្តិច គឺអ្នកទាំងពីរស្គាល់គ្នា១៨ខែ រួចសម្រេចរៀបការនៅខែកក្កដា ឆ្នាំ១៩៩៥ នៅវិហារ St Mary ក្នុងសង្កាត់ Shoeburyness ទីក្រុង Essex ប្រទេសអង់គ្លេស។ កាលថ្ងៃ Tommy សារភាពសុំរៀបការ គឺជាថ្ងៃអ្នកស្រីរំភើបចិត្តខ្លាំង រហូតញញឹមបិទមាត់មិនជិត។

អំឡុងកំពុងស្រលាញ់គ្នា ពេលពួកគេដើរកាន់ដៃគ្នាតាមទីសាធារណៈ តែងតែមានអ្នកជុំវិញសម្លឹងមើលលើក្រោម និងថាពួកគេមិនអាចរៀបការបានទៀតផង។ មនុស្សជាច្រើនព្រួយបារម្ភពីកំណើតកូន ឬចៅរបស់ពួកគេ ថាអាចកើតជំងឺបន្តបែបនេះមកទៀត។

អ្នកស្រីនិយាយថា៖ "ថ្ងៃរៀបការរបស់ខ្ញុំ ជាថ្ងៃល្អបំផុតក្នុងមួយជីវិតនេះ។ ពេល Tommy សារភាព ខ្ញុំរំភើបចិត្ត ហើយក៏មិនបង្អង់យូរនឹងឆ្លើយតបជាមួយពាក្យយល់ព្រមដែរ។ ប្ដី និងខ្ញុំមិនដែលទាស់ទែងគ្នាទេ។ ខ្ញុំស្រលាញ់ប្ដីខ្ញុំខ្លាំងណាស់។"

ទោះជាអ្នកដទៃមិនពេញចិត្តការយកគ្នាជាគូយ៉ាងនេះក្ដី ក៏ពួកគេអាចរស់នៅប្រកបដោយសុភមង្គលរយៈពេល២ទសវត្សដែរ។ ចំណែកនាថ្ងៃខួបអាពាហ៍ពិពាហ៍ប៉ុន្មានថ្ងៃកន្លងទៅនេះ ពួកគេបានទទួលពាក្យជូនពរពីមនុស្សជុំវិញ និងតាមអ៊ីនធឺណិតយ៉ាងច្រើនទៀតផង៕