ចង់ដឹងទេ គ្រឿងអលង្ការសម្អាតម៉េចទើបភ្លឺចែងចាំង?

2017-01-25 02:23:45
ចំនួនមតិ 0 | ចំនួនចែករំលែក 0

គ្រឿងអលង្ការដែលមានដូចជាគ្រឿងប្រាក់ គ្រឿងមាស ប្លាទីន ត្បូង ត្បូងពេជ្រ និងគជ់ខ្យងចាំបាច់ត្រូវការការលាងសម្អាត និងថែរក្សាឱ្យបានត្រឹមត្រូវបំផុត ហើយការលាងសម្អាតនោះផងដែរត្រូវប្រុងប្រយ័ត្នបន្តិច ដើម្បីចៀសវាងកុំឱ្យមានការខូចខាតដោយប្រការណាមួយ។

១. គ្រឿងអលង្ការប្រាក់៖

សម្រាប់គ្រឿងអលង្ការប្រាក់ដែលសឹក និងប្រែពណ៌៖ យកសាប៊ូលាងចានដែលមានជាតិកាត់តិចតួចមកលាយជាមួយទឹក រួចយកក្រណាត់ស្អាតមួយមកជ្រលក់ក្នុងទឹកនោះ រួចយកទៅជូតត្រដុសពីលើគ្រឿងអលង្ការ បន្ទាប់មកលាងសម្អាតនឹងទឹកស្អាត។

ប្រសិនបើវាស្រអាប់ខ្លាំង៖ អ្នកត្រូវលាយមេម្សៅដុតនំ Baking Soda ជាមួយទឹកបន្តិច បន្ទាប់មកយកគ្រឿងអលង្ការរបស់អ្នកទៅជ្រលក់ក្នុងទឹកឱ្យសើម រួចយកក្រណាត់ជ្រលក់ក្នុងល្បាយដែលបានលាយ ត្រដុសឱ្យសព្វ រួចលាងសម្អាតជាការស្រេច។

២. គ្រឿងអលង្ការមាស ត្បូង និងពេជ្រ៖

គ្រឿងមាសដែលមានធូលីដីជាប់ស្អិត៖ យកសាប៊ូលាងចានមានជាតិកាត់តិចតួចលាយជាមួយទឹកសូដា រួចយកគ្រឿងមាសរបស់អ្នកមកត្រាំក្នុងល្បាយនេះរយៈពេលប្រហែល ៥នាទី។ កូរវាទៅមកជាញឹកញាប់ រួចយកច្រាសដុសធ្មេញមកដុសពីលើថ្នមៗ។ រួចបើកទឹកបង្ហូរពីលើគ្រឿងមាសនោះទើបកម្ទេចធូលីដីងាយនឹងចេញស្អាត។

៣. គ្រឿងអលង្ការគជ់ខ្យង៖

លាយសាប៊ូលាងចានដែលមានជាតិកាត់បន្តិចបន្តួចជាមួយនឹងទឹកក្ដៅឧណ្ហៗ រួចយកជក់ផាត់មុខទំហំតូចមួយមកជ្រលក់ក្នុងល្បាយរួចត្រដុសលើគជ់ខ្យងរបស់អ្នក រួចលាងសម្អាតជាមួយទឹកស្អាត។
អ្នកអាចប្រើវិធីនេះលាងសម្អាតគ្រឿងអលង្ការផលិតពីត្បូង Turquoise ពណ៌កាស្តាំងផងដែរ៕