ប្រវត្តិពិត និងជីវិតស្នេហា Kim Tae Hee ភរិយាដ៏ស្រស់ស្អាតរបស់ Rain

2017-01-20 08:38:50
ចំនួនមតិ 0 | ចំនួនចែករំលែក 0

ព័ត៌មានធំជាងគេក្នុងពិភពសិល្បៈកូរ៉េនៅពេលនេះគឺគ្មានអ្វីក្រៅពីព័ត៌មានរៀបការរបស់គូស្នេហ៍តារាចម្រៀងនិងសម្ដែង Rain និង Kim Tae Hee នោះទេ។ បន្ទាប់ពីស្រឡាញ់ មើលចិត្តគ្នាអស់រយៈពេល ៤ឆ្នាំ តារាចម្រៀងប្រុសវ័យ ៣៤ឆ្នាំ និងតារាស្រីវ័យ ៣៦ឆ្នាំក៏បានរៀបការជាមួយគ្នានៅថ្ងៃព្រហស្បតិ៍ ទី១៩ ខែមករា។ នៅថ្ងៃនេះដែរ ក្រុមការងារ កញ្ញា សូមលើកជីវប្រវត្តិខ្លះៗរបស់តារាសម្ដែងស្រី Kim Tae Hee ដែលជាកូនក្រមុំរបស់ Rain ឲ្យប្រិយមិត្តបានស្គាល់កាន់តែច្បាស់តែម្ដង។

Kim Tae Hee កើតនៅថ្ងៃទី២៩ ខែមីនា ឆ្នាំ១៩៨០ នៅក្រុងប៊ូសាន ប្រទេសកូរ៉េខាងត្បូង មានបងស្រីម្នាក់ និងប្អូនប្រុសម្នាក់។ Kim Tae Hee គឺជាសិស្សពូកែម្នាក់ ហើយតាមរយៈលទ្ធផលសិក្សាល្អ ធ្វើឲ្យនាងអាចប្រឡងចូលរៀននៅមហាវិទ្យាល័យជាតិសេអ៊ូល (Seoul National University) ផ្នែកច្នៃម៉ូដ និងបានបញ្ចប់ការសិក្សានៅឆ្នាំ២០០៥។

សម្រាប់ការចូលប្រឡូកក្នុងវិស័យសិល្បៈ Kim Tae Hee បានចាប់ផ្ដើមដោយធ្វើជាតារាបង្ហាញម៉ូដ និងអ្នកផ្សព្វផ្សាយផលិតផលផ្សេងៗ។ បន្ទាប់ពីនោះ នៅឆ្នាំ២០០១ នាងក៏បានទទួលសម្ដែងភាពយន្តរឿង "Last Present” តែរឿងនេះក៏មិនបានធ្វើឲ្យនាងល្បីឈ្មោះបោះសំឡេងភ្លាមនោះដែរ។ តមក នៅឆ្នាំ២០០២ នាងបានទទួលសម្ដែងរឿងភាគ "Let's Go” ប៉ុន្តែរឿងដែលធ្វើឲ្យនាងចាប់ផ្ដើមល្បីខ្លាំងនោះគឺរឿងភាគ "Stairways To Heaven” ដែលតាមរយៈរឿងនេះធ្វើឲ្យនាងត្រូវបានគេស្គាល់ទូទាំងប្រទេសកូរ៉េ ព្រមទាំងនៅអាស៊ី និងបានទទួលពានរង្វាន់ Best New Actress ពីកម្មវិធី SBS Drama Awards។

ក្រៅពីស្នាដៃសម្ដែងល្អគួរឲ្យកោតសរសើរហើយ រូបសម្រស់របស់នាងក៏ជារឿងមួយដែលគ្រប់គ្នាលើកមកនិយាយមិនឈប់ដែរ ព្រោះ Kim Tae Hee មានទម្រង់ និងផ្ទៃមុខស្រស់ស្អាត កែវភ្នែកខ្មៅថ្លា រហូតទទួលបានរហស្សនាមថាជារាជិនីសម្រស់មួយរូបរបស់កូរ៉េខាងត្បូងថែមទៀត។

ចំពោះរឿងស្នេហា Kim Tae Hee និង Rain បានជួបគ្នាលើកដំបូងនៅពេលថតរូបផ្សព្វផ្សាយពាណិជ្ជកម្មជាមួយគ្នាកាលពីឆ្នាំ២០១២ ដោយចាប់ផ្ដើមរាប់អានគ្នាពីមិត្តភ័ក្ដិ រហូតក្លាយជាមិត្តយល់ចិត្ត។ ព័ត៌មានអ្នកទាំងពីរក្លាយជាគូស្នេហ៍នឹងគ្នា បានក្លាយជាប្រធានបទដ៏ក្ដៅគគុកក្នុងវិស័យសិល្បៈកូរ៉េខាងត្បូង ដោយសារ Rain មានកេរ្តិ៍ឈ្មោះល្បីខ្លាំងនៅ K-pop រីឯ Kim Tae Hee ក៏ជាតារាស្រីកំពូលសម្រស់ទៅទៀត។

ទោះយ៉ាងណា អំឡុងពេលដែលអ្នកទាំងពីរស្រឡាញ់គ្នា Rain ក៏កំពុងជាប់ភារកិច្ចចូលបំពេញកាតព្វកិច្ចយោធា ប៉ុន្តែបានបែកធ្លាយរូបភាពណាត់គ្នាជាមួយ Kim Tae Hee ធ្វើឲ្យមានពាក្យចចាមអារ៉ាមល្បីរន្ទឺថា Rain បានយកពេលវេលារាជការមកដើរលេងជាមួយមិត្តស្រី។ ទីបំផុត Rain ត្រូវគេពិន័យដោយត្រូវឃុំខ្លួនក្នុងជំរុំទាហានរយៈពេល ៧ថ្ងៃ។

ព័ត៌មានចចាមអារ៉ាមពីការរៀបការរបស់ Kim Tae Hee និង Rain បានកើតឡើងជាច្រើនលើកច្រើនសាប៉ុន្តែសាម៉ីខ្លួនបានចេញមកបដិសេធជានិច្ច រហូតមកដល់ពេលនេះវាក៏បានក្លាយជាការពិត ប៉ុន្តែអ្នកទាំងពីរបានសម្រេចចិត្តចូលរោងការយ៉ាងស្ងប់ស្ងាត់បំផុត ព្រោះចង់រក្សាភាពឯកជន។ នៅពេលប្រកាសពីដំណឹងរៀបការ Rain បានបញ្ជាក់ក្នុងសំបុត្រមួយច្បាប់ថា៖ "នាងគឺជាកាដូដ៏ពិសេសបំផុត ក្នុងជីវិតខ្ញុំ”។