ត្រចៀកកាំ ក្លាយជាតារាស្រីមានជាងគេនៅចិន ជាមួយទ្រព្យសម្បត្តិជាង៨០០លានដុល្លារ

2017-01-18 07:21:16
ចំនួនមតិ 0 | ចំនួនចែករំលែក 0

តារាសម្ដែងចិន Zhao Wei ដែលល្បីជាតួ ត្រចៀកកាំ ក្នុងរឿង "ព្រះនាងយេយេ" ត្រូវបានកាសែតចិនចុះផ្សាយថាជាតារាស្រីមានទ្រព្យច្រើនជាងគេនៅចិន ក្នុងដើមឆ្នាំ២០១៧នេះ បន្ទាប់ពីទ្រព្យសម្បត្តិរួមគ្នារបស់នាងនិងស្វាមី Huang You Long កើនឡើងដល់ ៥,៦ប៊ីលានយ័ន ស្មើនឹងប្រមាណ ៨១០លានដុល្លារអាមេរិក។ តាមរបាយការណ៍បានឲ្យដឹងថា ចំនួននេះគឺបានមកពីការសរុបចូលគ្នានៃចំណូលពីមុខជំនួញ តម្លៃអចលនទ្រព្យ និងភាគហ៊ុនដែលនាងមាន។ ក្នុងនោះការបណ្ដាក់ទុនរបស់នាងលើផ្នែកអចលនទ្រព្យមានចំនួន ៩៦លានដុល្លារ ខណៈភាគហ៊ុនផ្សេងៗមានចំនួនប្រមាណ ៦៥០លានដុល្លារ។

Zhao Wei និងស្វាមី

ប៉ុន្មានឆ្នាំចុងក្រោយនេះ Zhao Wei បានបណ្ដាក់ទុនក្នុងវិស័យជំនួញជាច្រើនរួមមានក្រុមហ៊ុន Alibaba Pictures, Talent Television and Film Co. Ltd (Tangde), រោងភាពយន្ត និងក្រុមហ៊ុនផលិតស្រា។ បើចែកឲ្យដាច់ ពេលនេះ ត្រចៀកកាំ អាចមានទ្រព្យសម្បត្តិច្រើនជាងប្ដី ដោយសារនាងគឺជាអ្នកក្ដោបក្ដាប់ភាគហ៊ុនក្នុងផ្នែកភាពយន្ត។ ភាពវ័យឆ្លាតក្នុងការបណ្ដាក់ទុន និងការដែលនាងមានស្វាមីជាអ្នកមានស្រាប់ ត្រូវបានគេគិតថាជាមូលហេតុដែលនាំឲ្យនាងក្លាយជាតារាស្រីមានទ្រព្យហូរហៀរបែបនេះ បើទោះជានាងមិនសូវសកម្មក្នុងអាជីពសម្ដែងដូចមុនក៏ដោយ ៕