ស្រីៗចូលចិត្តដើរផ្សារ មានជំងឺចង់ចាយលុយ?

2016-12-29 03:20:12
ចំនួនមតិ 0 | ចំនួនចែករំលែក 0

បើមើលពីរូបភាពខាងក្រៅ ស្ត្រីចូលចិត្តដើរផ្សារច្រើន គឺពិតជាស្ត្រីដែលចាយលុយខ្ជះខ្ជាយ ប៉ុន្តែជាក់ស្តែង វាផ្ទុយពីនេះទៅវិញ។ សាកអានពីទស្សនៈរបស់ស្ត្រីមួយចំនួនខាងក្រោមបន្តិចមើល៍ ហេតុអ្វីបានជានាងចូលចិត្តដើរផ្សារ ឬ Shopping?

មាលា អាយុ ២៧ឆ្នាំ ធ្វើការនៅធនាគារ បានប្រាប់ថា កញ្ញាចូលចិត្តដើរផ្សារ ហើយក៏មិនចាំបាច់ដើរមានគ្នាកំដរទេ «ខ្ញុំចូលចិត្តដើរផ្សារម្នាក់ឯង ទោះជាមិនប្រាកដថាទិញទំនិញអ្វី ប៉ុន្តែវាជាការសម្រាកលំហែមួយរបស់ខ្ញុំ បន្ទាប់ពីតប់ប្រមល់នឹងការងារពេញមួយថ្ងៃនោះ ខ្ញុំអាចដើរមើលទំនិញល្អៗ ស្អាតៗ បើត្រូវចិត្ត និងតម្លៃសមរម្យគឺខ្ញុំអាចទិញ ដោយមិនចាំបាច់មានផែនការទុកមុននោះទេ»។

នាងបានបដិសេធយ៉ាងខ្លាំងនៅពេលសួរថា តើនេះគឺជាការចាយខ្ជះខ្ជាយមែនទេ ព្រោះទិញទំនិញដោយមិនមានផែនការចង់បានផងនោះ? «ខ្ញុំមិនយល់ស្របទេ ព្រោះខ្ញុំយល់ថាខ្ញុំសន្សំសំចៃបានច្រើនទៅវិញ ព្រោះមិនទិញដោយប្រញាប់ប្រញាល់ ដែលធ្វើឲ្យអ្នកលក់កាត់ថ្លៃខ្ពស់ និងមិនចុះតម្លៃច្រើន ឬពេលខ្លះត្រូវបង្ខំចិត្តទិញទាំងមិនសូវពេញចិត្ត ប៉ុន្តែបើយើងមានពេលវេលាដើរផ្សារច្រើន យើងអាចស៊ើបសួរតម្លៃបានច្រើនតូប ដឹងតម្លៃសមរម្យងាយស្រួលតថ្លៃ និងទទួលបានទំនិញគុណភាពល្អថែមទៀត»។

ងាកមកស្ត្រីមានស្វាមី និងកូន ដែលធ្វើការនៅអង្គការ អ្នកស្រី ដាណា វិញក៏បានចូលរួមយោបល់ថា «ទោះបីជាខ្ញុំមានកូន ក៏នៅតែឆ្លៀតពេលដើរផ្សារញឹកញាប់ អាច១អាទិត្យ២ដងដែរ ព្រោះបើមិនដើរផ្សារ ធ្វើម៉េចមានរបស់ប្រើប្រាស់ ដូចជាខោអាវ ស្បែកជើង គ្រឿងតែងខ្លួនខ្លួនឯងផង កូនផង និងប្តីទៀត»។

ការចាយខ្ជះខ្ជាយមិនអាចសំដៅលើអ្នកដើរផ្សារច្រើនទេ ព្រោះអ្នកចូលចិត្ត shopping គឺជាមនុស្សដែលស្វែងរកជម្រើសច្រើនហើយកាន់តែល្អ ដែលផ្តល់មកនូវតម្លៃធូរថ្លៃ និងទំនិញគុណភាពខ្ពស់ នេះជាអាថ៌កំបាំងរបស់អ្នកនាង សត្យា ដែលធ្វើការផ្នែកពាណិជ្ជកម្ម បានបង្ហើបប្រាប់ ហើយនាងថាសកម្មភាពនេះ គឺជាចំណូលចិត្តរបស់ស្ត្រី ទោះមិនមានលុយទិញឲ្យតែបាន shopping ក៏សប្បាយចិត្ត។

រីឯ សុភា និស្សិតឆ្នាំទី២ នៃសាកលវិទ្យាល័យមួយនៅរាជធានីភ្នំពេញ ប្រាប់ដោយឥតលាក់លៀមថា ទោះបីជានាងគ្មានលុយច្រើន ក៏នាងចូលចិត្ត shopping ហើយនាងអាចសួរតម្លៃទុក រួចសន្សំលុយទិញរបស់ដែលនាងស្រឡាញ់នោះ នៅកន្លែងលក់មួយដែលនាងដឹងថាលក់ធូរថ្លៃជាងគេ។

បទពិសោធន៍ និងការយល់ឃើញរបស់ស្រ្តីទាំង៤នាក់ខាងលើបញ្ជាក់ថាការដើរផ្សារ Shopping វាមិនមែនជាជំងឺចង់ចាយលុយរបស់ស្ត្រីៗនោះទេ តែវាវិធីសាស្ត្រសន្សំលុយរបស់ស្ត្រីសម័យថ្មីនេះ។ ប៉ុន្តែបើស្ត្រីខ្លះចូលចិត្តដើរទិញទំនិញរាល់ថ្ងៃ ហើយទិញមកមិនប្រើប្រាស់ គិតតែទិញយកមកទុកចោល នោះហើយបានជាធ្វើឲ្យមនុស្សភាគច្រើនយល់ថា ការដើរផ្សារជាការចាយលុយខ្ជះខ្ជាយ។

ចុះប្រិយមិត្តស្រីៗយើងផ្សេងទៀត មានអីចង់ចូលរួម? ១អាទិត្យដើរផ្សារប៉ុន្មានដង? មកពីចង់ចាយលុយឬបានជាចង់ដើរផ្សារ?

អត្ថបទៈ ជូ ជូ