ងាយៗ! របៀប​ធ្វើ​​ "ការ៉េម​ចេក​ដូងខ្ចី" ​ឆ្ងាញ់ហើយ​ទុក​បាន​យូរ (មាន​វីដេអូ)

  • 2020-03-25 06:40:00
  • ចំនួនមតិ 174 | ចំនួនចែករំលែក 539

ជាក់ស្ដែង អ្នក​ណាៗ​ក៏​ធ្លាប់​បាន​សាក​នូវ​រសជាតិ​ដ៏​ឈ្ងុយ​ឆ្ងាញ់​នៃ​ការ៉េម​ចេក​ដែរ ទាំង​កុមារ​តូចៗ និង មនុស្ស​ធំ។ យ៉ាងណាមិញ បច្ចុប្បន្ន ការ៉េម​ចេក​ប្រភេទ​នេះ​គឺ​ពិបាក​នឹង​រក​ទិញ​ណាស់ មិន​សូវ​ឃើញ​មាន​គេ​ធ្វើ​លក់​ដូច​មុន​ឡើយ។ បើ​និយាយ​ពី​រសជាតិ ពេល​ខ្លះ ការ​ទិញ​ពី​គេ​ស្រាប់​គឺ​មិន​សូវ​ត្រូវ​មាត់​ដូច​ធ្វើ​ខ្លួន​ឯង​ញុំា​ទេ ព្រោះ​អាច​ថែម​ថយ​គ្រឿង​តាម​ចំណង់​ចំណូល​ចិត្ត​ផ្ទាល់។ តោះ! ឥឡូវ​មក​ដឹង​ពី​គ្រឿងផ្សំ និង វិធី​ធ្វើ​ការ៉េម​ចេក​ខ្ទិះដូង​ទាំងអស់​គ្នា៖

រូបតំណាង

គ្រឿងផ្សំ៖

  • សណ្ដែក​ដី​លីង បុកម៉ដ្ឋល្មម ៤ ស្លាប​ព្រា​បាយ
  • សាច់​ខ្នុរ​ កន្លះ​កូន​ចាន​ចង្កឹះ
  • សាច់​ដូង​ខ្ចី កោស​រួច កន្លះ​កូន​ចាន​ចង្កឹះ
  • ខ្ទិះដូង ១ កូន​ចាន​ចង្កឹះ
  • ទឹកដោះគោខាប់ ១ កូន​ចាន​ចង្កឹះ (អាច​បន្ថយ ឬ បន្ថែម​តាម​ចំណង់​ចំណូល​ចិត្ត)
  • ចេក ៦ ផ្លែ ធំ​ល្មម

សម្ភារៈត្រូវត្រៀម៖

  • ឈើ​ដោត​ការ៉េម (មាន​ក៏បាន អត់​ក៏​បាន)
  • ថង់​តូចៗ​ច្រក​ការ៉េម
  • ថង់ប្លាស្ទីកធំមួយ
រូបតំណាង

វិធី​ធ្វើ៖

ជំហាន​ទី​ ១៖ យក​ចេក​មក​វះ​សំបក​ចេញ រួច​កាត់​ជា ៣ កង់

ជំហាន​ទី​ ២៖ យក​ថង់​បា្លស្ទីក​មួយ​ដាក់​លើ​ជ្រញ់ រួច​យក​ផ្លែ​ចេក​ដែល​កាត់​រួច​ពី​លើ​ថង់​នោះ ហើយ​សង្កត់​វា​ឲ្យ​សំប៉ែត​ល្មម ម្តង១​កង់​ៗ

ជំហាន​ទី ៣៖ ដាក់​ចេក​មាន​រាង​សំប៉ែត​ទាំង​អស់ ចូល​ក្នុង​ចាន​ធំ​មួយ

ជំហាន​ទី ៤៖ ដាក់គ្រឿង​ផ្សំ​ដទៃ​ទៀត​ ដែល​រួម​មាន ទឹក​ដោះ​គោ​ខាប់ សណ្តែក​ដី​លីង​ សាច់​ដូង​ខ្ចី ខ្ទិះដូង សាច់​ខ្នុរ​ ចូល​ទៅ​ក្នុង​ចាន​ចេក​នោះ​ជាមួយ​គ្នា ហើយ ច្របល់​វា​ឲ្យ​សព្វ

រូបតំណាង

ជំហាន​ទី ៥៖ ច្រក​ល្បាយ​នៃ​ការ៉េម​នោះ ចូល​ទៅ​ក្នុង​ថង់​តូចៗ

ជំហាន​ទី ៦៖ បើ​ចង់​ឲ្យ​ងាយ​ស្រួល​កាន់​ញុំា អាច​ដោត​ឈើ​ចូល​ពី​ក្រោយ​តាម​ចន្លោះ​ថង់ ពេល​ច្រក​រួច

ជំហាន​ទី ៧៖ រៀប​ការ៉េម​ដែល​បាន​ច្រក​រួច​នៅ​លើ​ថាស ឬ ចាន ក្នុង​ទម្រង់​ផ្ដេក រួច​សឹម​ដាក់​វា​ចូល​ទូ​ទឹក​កក ដើម្បី​ឲ្យ​ការ៉េម​មាន​រូបរាង​ស្មើ​សាច់​ល្អ ​ក្រោយ​ពេល​កក៕

រូបតំណាង

ចុចអានបន្ត៖ តោះ! មក​រៀន​ធ្វើ​ទឹក​ដោះ​គោ​ជូរ​​ (យ៉ាអួ) ដោយ​ខ្លួន​ឯង ទុក​ញុំា​លេង​នៅ​ផ្ទះ

ប្រភព៖ YouTube ប្រែ​សម្រួល៖ Siyou Tang