៤ វិធី ជួយការពារស្បែកមិនឲ្យឡើងមុន ពេលត្រូវពាក់ម៉ាសយូរជាប្រចាំ

  • 2020-03-24 05:00:00
  • ចំនួនមតិ 13 | ចំនួនចែករំលែក 405

ក្នុង​អំឡុង​ពេល​ដែល​អ្នក ត្រូវ​ពាក់​ម៉ាស់​ឲ្យ​បាន​ខ្ជាប់ខ្ជួន ដើម្បី​ការពារ​ធូលី​​ដី ជាតិ​ពុល​រួម​ទាំង​វីរុស​ផ្សេងៗ​ ប៉ុន្តែ​សម្រាប់​ស្បែក​មុខ​​មួយ​ចំនួន បែរ​ជា​មាន​បញ្ហា​ទៅ​វិញ។ ដោយ​សារ​តែ​ញើស ជាតិ​កខ្វក់ និង​ការ​ហប់ អាច​ធ្វើ​​ឲ្យ​ប៉ះពាល់​ដល់​ស្បែក បណ្តាល​ទៅ​ជា​ការ​កើត​មុន ឬ​រោល​ជា​ដើម​។ ប្រសិន​បើ​អ្នក​ត្រូវ​ពាក់​ម៉ាស់​យូរ​ម៉ោង​ជា​ប្រចាំ គួរ​ដឹង​​វិធី​ខាង​ក្រោម​នេះ ដើម្បី​ថែរក្សា​ស្បែក​ឲ្យ​នៅ​តែ​​ស្អាត​ស្រស់​ថ្លា។

១. សម្អាត​មុខ​ឲ្យ​បាន​ស្អាត​ល្អ

ប្រសិន​​បើ​អ្នក​ត្រូវ​ពាក់​ម៉ាស់​យ៉ាង​ហោច​ណាស់ ៨​ ម៉ោង​ក្នុង​មួយ​ថ្ងៃ នោះ​កម្តៅ​​លើ​ផ្ទៃ​មុខ​​របស់​អ្នក​នឹង​កើន​ឡើង ហប់ ចេញ​ញើស នាំ​​ជាតិ​កខ្វក់​ចូល​ទៅ​ក្នុង​ស្បែក។ ទម្រាំ​​ទៅ​ដល់​ផ្ទះ​ដោះ​ម៉ាស់​ចេញ​ មុខ​អ្នក​ក៏​ឡើង​ប្រេង​ថែម​ទៀត។ ហេតុ​នេះ​ត្រូវ​ផ្តោត​លើ​ការ​សម្អាត​ផ្ទៃ​មុខ ឲ្យ​បាន​ស្អាត​​ល្អ ប្រើ​ប្រាស់​ផលិតផល​ត្រឹម​ត្រូវ ទើប​អាច​ការពារ​មុខ​មិន​ឲ្យ​កើត​មុន​។

២. ប្រើ​វិធី​ផ្សេង​បន្ថែម ក្រៅ​ពី​ការ​លាង​ជាមួយ​ហ្វូម​តែ​មួយ​មុខ

​​ការ​​លាង​មុខ​នឹង​ហ្វូម​​​តែ​មួយ​មុខ​នៅ​មិន​ទាន់​គ្រប់​គ្រាន់​​នៅ​ឡើយ​ទេ ព្រោះ​វា​បាន​សម្អាត​តែ​ផ្នែក​​ស្រទាប់​ខាង​លើ​​ប៉ុណ្ណោះ​។ គួរ​ជ្រើស​រើស​​ប្រភេទ​ម៉ាស់​ភក់​ឬ​ផលិតផល​ណា ដែល​អាច​ចូល​ទៅ​សម្អាត​ជ្រៅ​ ​ដើម្បី​ស្រូប​យក​​ជាតិ​ពុល កោសិកា​ចាស់ៗ ធ្វើ​ឲ្យ​ស្បែក​ភ្លឺ​ស្អាត​​ចេញ​ពី​ខាង​ក្នុង។ អ្នក​អាច​ប្រើ ២-៣ ដង​ ក្នុង​មួយ​សប្តាហ៍ ដើម្បី​ទទួល​បាន​ប្រសិទ្ធភាព ជួយ​ឲ្យ​ស្បែក​មុខ​ទន់​រលោង​បែប​ធម្មជាតិ។

៣. ផ្តល់​សំណើម​ដល់​ស្បែក

ដោយ​សារ​តែ​ស្បែក​មុខ​ត្រូវ​​ប៉ះ​​ជាមួយ​នឹង​ម៉ាស់​យូរ​ម៉ោង ដូច្នេះ​អ្នក​ត្រូវ​ផ្តល់​សំណើម​​ឲ្យ​បាន​គ្រប់គ្រាន់ ដើម្បី​ជួយ​ឲ្យ​ស្បែក​មាន​សុខភាព​ល្អ​។ ជ្រើស​រើស​ផលិតផល ដែល​អាច​រក្សា​សំណើម​បាន​យូរ ​អាច​ទប់​ជាតិ​ខ្លាញ់​លើ​មុខ ធ្វើ​ឲ្យ​ស្បែក​មាន​​តុល្យភាព និង​ជៀស​ផុត​ពី​បញ្ហា​នានា។

៤. ប្រើ​ផលិតផល​​ធម្មជាតិ​ដែល​អាច​ការពារ​មុន

​ពាក់​ម៉ាស់​​យូរ​ ហើយ​​អាកាស​ធាតុ​ក៏​ក្តៅ​ទៀត ជា​ហេតុ​ធ្វើ​ឲ្យ​មុខ​ឡើង​ប្រេង រន្ធ​​ញើស​ស្រូប​យក​​សារធាតុ​មិន​ល្អ បង្ក​ឲ្យ​​ចេញ​មុន​។ បើ​ជៀស​បាន​គួរ​​​ផ្អាក​ការ​ផាត់​មុខ​មួយ​រយៈសិន ហើយ​ងាក​មក​​យក​ចិត្ត​ទុក​ដាក់​ លាប​ផលិតផល​​បែប​​ធម្មជាតិ មាន​តួនាទី​ការពារ​បាក់​តេរី កា​ររោល​រ​មាស់ មិន​ធ្វើ​ឲ្យ​​ស្ទះ​រន្ធ​ញើស​វិញ​ប្រសើរ​​ជាង​៕

ចុចអានបន្ត៖ គ្មានឱកាសចេញទៅខាងក្រៅ តែអាចលេងស្ទីល Cute Cute នៅផ្ទះបាន ​​​​​​​​​​​​

ប្រភព៖ akerufeed ប្រែ​សម្រួល៖ ដេត ឈុនអ៉ី