ជូនចំពោះមនុស្សស្រីដែលតែងតែគិតថាខ្លួនមិនល្អគ្រប់គ្រាន់

2020-03-20 09:05:00
ចំនួនមតិ 0 | ចំនួនចែករំលែក 0

ជូនចំពោះមនុស្សស្រីដែលតែងតែគិតថាខ្លួនមិនល្អគ្រប់គ្រាន់៖

ខ្ញុំយល់ច្បាស់ពីអារម្មណ៍របស់អ្នក ខ្ញុំក៏ធ្លាប់ឆ្លងកាត់វាដូចគ្នា។ អ្នកប្រហែលជាគិតថាអ្នកកំពុងឆ្លងកាត់វាតែម្នាក់ឯង ព្រោះតែអ្នកវិលវល់ជុំវិញរឿងរ៉ាវជាច្រើន។ យ៉ាងណាមិញ មិនមែនតែអ្នកទេ គឺមានមនុស្សស្រីរាប់ពាន់អ្នកដែលធ្លាប់ឆ្លងកាត់នូវអារម្មណ៍មួយនោះ។

រូបតំណាង

**វាពិតជាពិបាក ខ្ញុំដឹង!**

វាពិបាក ការដែលអ្នកខំធ្វើអ្វីគ្រប់យ៉ាងដើម្បីនរណាម្នាក់ស្មោះអស់ពីចិត្ត ១០០% ហើយទទួលបានវិញត្រឹមតែ ៥០% ។ វាពិបាក ការដែលជានិច្ចកាលគេធ្វើឱ្យអ្នកមានអារម្មណ៍ថាអ្នកគ្មានតម្លៃសម្រាប់គេ ឬ អាចនិយាយថាមិនល្អគ្រប់គ្រាន់សម្រាប់គេ។ តែអ្នកត្រូវដឹងថា ជួនកាលអ្នកមិនត្រូវបណ្តោយឱ្យរឿងរ៉ាវស្មុគស្មាញ គំនិតអវិជ្ជមាន ក៏ដូចជាមនុស្សដែលមិនស្គាល់តម្លៃរបស់អ្នក ស្ថិតនៅក្នុងជីវិតអ្នកយូរពេកឡើយ។ ទាំងអស់នេះហើយដែលបង្រៀនឱ្យអ្នកចេះងើបឈរ និង រស់នៅបានយ៉ាងល្អដោយខ្លួនឯង។ ទាំងអស់នេះហើយដែលធ្វើឱ្យអ្នកកាន់តែរឹងមាំឡើងៗ។

រូបតំណាង

ខ្ញុំចង់ប្រាប់អ្នកថាហេតុផលចម្បងបំផុតដែលអ្នកគួរតែស្រឡាញ់ខ្លួនឯងឱ្យបានច្រើននោះគឺ ព្រោះអ្នកជាមនុស្សស្រីម្នាក់ដ៏អស្ចារ្យ។ អ្នកធ្លាប់បានប្រឈមមុខនឹងរឿងរ៉ាវច្រើនយ៉ាង តែអ្នកមិនដែលចុះចាញ់ មិនដែលរាថយ មិនដែលបោះបង់ចោលខ្លួនឯង និងមនុស្សជាទីស្រឡាញ់។

ពេលខ្លះ មនុស្សដែលមានចិត្តស្មោះត្រង់ដូចជាអ្នក បែរជាឧស្សាហ៍ជួបនូវរឿងមិនសមបំណងជាច្រើនទៅវិញ ហើយ ភាគច្រើនអ្នកដទៃមិនសូវយល់ច្បាស់ពីជម្រៅចិត្តអ្នក រហូតដល់ធ្វើឱ្យអ្នកគិតថា ខ្លួនជាមនុស្សដែលមិនល្អគ្រប់គ្រាន់ទៅវិញ។

រូបតំណាង

ដូច្នេះ សម្រាប់អ្នកដែលមានអារម្មណ៍បែបនេះ ខ្ញុំចង់ប្រាប់អ្នកថា អ្នកគឺជាមនុស្សស្រីដែលមានចិត្តល្អ គួរឱ្យស្រឡាញ់ ហើយសំខាន់បំផុតនោះគឺ អ្នកគឺល្អគ្រប់គ្រាន់ហើយ។ បើអ្នកដទៃមើលមិនឃើញពីតម្លៃ និងទឹកចិត្តរបស់អ្នក វាមិនមែនជាកំហុសអ្នកឡើយហើយអ្នកក៏គ្មានការខាតបង់អ្វីនោះដែរ គេទេដែលត្រូវខាតបង់ពិតប្រាកដ ដែលមើលមិនឃើញមនុស្សល្អដូចជាអ្នក៕

ចុចអានបន្ត៖ ៣វិធីយកឈ្នះមនុស្សច្រណែន ឈ្នានីសអ្នក ដោយមិនបាច់សងសឹក

ប្រភព៖ Unwritten ប្រែសម្រួល៖ Siyou Tang