ឈប់យល់ច្រឡំទៀតទៅ របស់ទាំងនេះមិនអាចការពារអ្នកពីវីរុសកូវីដ-១៩បានឡើយ

2020-03-16 06:54:14
ចំនួនមតិ 0 | ចំនួនចែករំលែក 0

ស្របពេលដែលជំងឺបង្កដោយវីរុសកូរ៉ូណាប្រភេទថ្មី ឬហៅថា កូវីដ-១៩ ត្រូវបានគេរកឃើញដំបូងនៅក្នុងទីក្រុងវូហាន ប្រទេសចិន ហើយបានរាលដាលដល់ប្រទេសជាច្រើននៅជុំវិញពិភពលោកនៅរយៈពេលថ្មីៗនេះ គេសង្កេតឃើញមានការផ្សព្វផ្សាយពីវិធីសាស្ត្រការពារមួយចំនួនដែលមិនត្រឹមត្រូវ គ្មានវេជ្ជបញ្ជាច្បាស់លាស់ពីក្រុមសុខាភិបាល វាកាន់តែបង្កឲ្យមានគ្រោះថ្នាក់ដល់អ្នកដទៃថែមទៀត។ តួយ៉ាងការការពារខ្លួនពីវីរុសកូរ៉ូណាមិនត្រឹមត្រូវមួយចំនួន ដែលអ្នកទាំងអស់គ្នាគួរដឹងរួមមាន៖

ជាក់ស្ដែងយោងតាមការអះអាងរបស់អង្គការសុខភាពពិភពលោក WHO បានបញ្ជាក់ថា ការការពារខ្លួនដោយការមុជទឹកក្ដៅមិនបានជួយអ្នកពីការឆ្លងវីរុសកូវីដ-១៩ បានឡើយ។ ជាទូទៅខ្លួនប្រាណរបស់អ្នកមានកម្ដៅខ្លួនថេរពី ៣៦,៥ អង្សារ ទៅ ៣៧អង្សារ ហើយបើអ្នកមុជទឹកក្ដៅខ្លាំង ឬទៅស្ទីមស៊ូណាលើសកម្រិតសុខភាពខ្លួនឯង វានឹងធ្វើឲ្យអ្នកគ្រោះថ្នាក់។ យ៉ាងណាមិញ ការសម្អាតរាងកាយជាមួយទឹកក្នុងសីតុណ្ហភាពធម្មតា ដែលមានសាប៊ូ គឺអាចកម្ចាត់មេរោគលើខ្លួនរបស់អ្នក។

ជាងនេះទៀត នៅលើបណ្ដាញសង្គម ក៏ឃើញមានបង្ហោះពីវិធីការពារគ្មានក្បួនខ្នាតត្រឹមត្រូវជាច្រើនទៀតដូចជា ការញ៉ាំខ្ចី ខ្ទឹម ស ម្ទេស ម្រេច និងការផឹកទឹកអាល់កុលជាដើម ទាំងអស់នេះសុទ្ធតែគ្មានប្រសិទ្ធភាព និងប៉ះពាល់ដល់សុខភាពជាយថាហេតុ។

បញ្ជាក់ វិធីបញ្ចៀសហានិភ័យពីវីរុសកូរ៉ូណាពីអ្នកជំនាញសុខភាពណែនាំ ដែលអ្នកនិងគ្រួសារអាចអនុវត្ត ដើម្បីការពារខ្លួនរួមមាន៖

១. លាងដៃឲ្យបានញឹកញាប់ជាមួយសាប៊ូ និងទឹក ឬប្រើទឹកលាងដៃដែលមានជាតិអាល់កុល

២. ខ្ទប់មាត់ និងច្រមុះរបស់អ្នកដោយប្រើកែងដៃ ឬក្រដាសជូតមាត់ នៅពេលក្អកឬកណ្តាស់ ហើយបោះចោលក្រដាសជូតមាត់ទៅក្នុងធុងសំរាមបិទជិត

៣. ជៀសវាងប៉ះពាល់ផ្ទាល់ជាមួយអ្នកដែលមានរោគសញ្ញាដូចជា ផ្តាសាយ ឬគ្រុនក្តៅ

៤. ទៅជួបគ្រូពេទ្យប្រសិនបើអ្នកក្តៅខ្លួន ក្អក ឬមានអារម្មណ៍ថាពិបាកដកដង្ហើម។

គួរបន្ថែមថា ចំពោះការពាក់ម៉ាសត្រូវបានណែនាំឲ្យប្រើប្រាស់ ប្រសិនបើអ្នកមានរោគសញ្ញាផ្លូវដង្ហើម (ក្អក ឬកណ្តាស់) ដើម្បីកុំឲ្យឆ្លងទៅអ្នកដទៃ ។ ប្រសិនបើអ្នកគ្មានរោគសញ្ញាអ្វីទេ នោះអ្នកមិនចាំបាច់ពាក់ម៉ាស់ឡើយ។