ពិបាកចិត្តយ៉ាងណា ក៏នៅតែអាចញញឹមពេញមួយថ្ងៃ តាមវិធីទាំងនេះ
- 2020-02-24 05:00:00
- ចំនួនមតិ 0 | ចំនួនចែករំលែក 0
ពិបាកចិត្តយ៉ាងណា ក៏នៅតែអាចញញឹមពេញមួយថ្ងៃ តាមវិធីទាំងនេះ
តើការងាររបស់អ្នកតម្រូវឲ្យរួសរាយញញឹមរាក់ទាក់រាល់ថ្ងៃមែនទេ? ឬមួយក៏អ្នកចង់ក្លាយជាមនុស្សរឹងមាំ អាចញញឹមមិនថាជួបទុក្ខលំបាកធំប៉ុនណា? ក្នុងហេតុផលបែបម៉េចក៏ដោយ ការរក្សាអារម្មណ៍ឲ្យមូលល្អ មិនមែនជារងងាយស្រួលឡើយ ហើយស្នាមញញឹមរឹតតែមិនងាយបញ្ចេញទៅទៀត។ ហេតុនេះហើយ អ្នកគួរចេះពីវិធីដើម្បីរក្សាចិត្តឲ្យនឹងន អាចញញឹមស្រស់ស្រាយពេញមួយថ្ងៃ ដោយពុំចាំបាច់បង្ខំខ្លួនឯង។
១. គិតពីអត្ថប្រយោជន៍នៃការញញឹម
មិនខាតបង់អ្វីទេ មានតែផ្តល់ផលចំណេញដូចជា៖
បង្ហាញពីភាពរួសរាយរាក់ទាក់ មានអំណោយទាន ធ្វើឲ្យមនុស្សជុំវិញខ្លួនសប្បាយរីករាយ។
ការញញឹមអាចជួយឲ្យអ្នកសប្បាយចិត្តនិងបានធូរទ្រូង។
ការងារអាចតម្រូវឲ្យអ្នកញញឹមដូច្នេះអ្នកកាន់តែអភិវឌ្ឍទ្វេដងលើជំនាញមួយនេះ។
ធ្វើឲ្យអ្នកជុំវិញខ្លួនមានអារម្មណ៍កក់ក្តៅ និងចង់រាប់រក។
អាចជួយបន្ធូរភាពតានតឹង។
ជួយលើកសម្រស់ឲ្យកាន់តែទាក់ទាញ ពេលថតរូបក៏ស្អាតបែបធម្មជាតិ។
២. គិតពីរឿងសប្បាយៗឲ្យបានញឹកញាប់
ត្រូវចាត់ទុកថា ការញញឹមគឺជាកាតព្វកិច្ចដែលត្រូវធ្វើរាល់ថ្ងៃ ជាពិសេសត្រូវគិតពីរឿងល្អៗដែលធ្វើឲ្យសប្បាយចិត្ត ប្រសើរជាងខ្វល់ខ្វាយតែពីបញ្ហានិងរឿងអពមង្គល៖
គិតពីមនុស្សដែលអ្នកស្រលាញ់និងគួរយកចិត្តទុកដាក់ជាមួយ។
គិតពីរឿងដែលធ្វើឲ្យអ្នករីករាយ មិនថានាពេលអតីតកាលឬពេលអនាគត។
គិតពីព្រឹត្តិការណ៍រំភើបដែលអ្នកចង់ឲ្យវាកើតឡើង។
គិតថាការញញឹមអាចជួយឲ្យជីវភាពប្រចាំថ្ងៃប្រសើរឡើង ជាពិសេសនៅកន្លែងធ្វើការឬរកស៊ីតែម្តង។
៣. ញញឹមដើម្បីយកលាភសំណាង
អ្នកគួរដាក់របស់អ្វីមួយដែលស្រលាញ់បំផុតតាមខ្លួន គ្រាន់តែឃើញហើយអាចធ្វើឲ្យអ្នកញញឹម គ្រប់ពេលវេលាគ្រប់ទីកន្លែង។ លើសពីនេះទៅទៀត ការញញឹមនឹងនាំលាភសំណាងរាប់មិនអស់មកឲ្យអ្នក។
៤. ដាក់កញ្ចក់ឆ្លុះនៅជិតខ្លួន
ពេលខ្លះគ្មានចិត្តចង់ញញឹមទេ ប៉ុន្តែគ្រាន់តែកញ្ចក់ក៏ព្យាយាមលើកទឹកចិត្តខ្លួនឯង ឬចង់វាស់ស្ទង់ពីសម្រស់របស់ខ្លួននៅពេលញញឹម។ បើបែបនេះមែន គួរទៅទិញកញ្ចក់មួយដាក់ ជាប់ខ្លួនឲ្យហើយទៅ។
៥. ត្រូវប្រាកដថាអ្នកញញឹមដោយភាពជឿជាក់
សម្អាតធ្មេញឲ្យបានទៀងទាត់និងស្អាតល្អ ដើម្បីបង្ហាញស្នាមញញឹមដោយភាពជឿជាក់ មានទំនុកចិត្តពេញលេញ ដោយមិនលាក់លៀមអៀនខ្មាស។
៦. សម្រាកខ្លះ
មុខរបស់អ្នកក៏មានពេលសម្រាករបស់វាដែរ។ គួររកកន្លែងស្ងប់ស្ងៀម ស្តាប់ចម្រៀង ឬសម្រាកបន្តិចសិន ព្រោះពេលទាំងនោះ ទោះអ្នកមិនញញឹមក៏គ្មាននរណាប្រកាន់នោះដែរ។
៧. ស្តាប់ចម្រៀងកន្ត្រាក់អារម្មណ៍
ចម្រៀងកម្សត់យឺតៗ អាចនឹងធ្វើឲ្យអ្នកកាន់តែចូលតួឬនឹកនាដល់បញ្ហាទុក្ខសោកកាន់តែខ្លាំង។ យល់ល្អគួររកបទចម្រៀងណា ដែលមានភ្លេងកន្រ្តាក់ ឬអាចជួយឲ្យអ្នកបន្ធូរភាពតានតឹងវិញប្រសើរជាងដាក់សម្ពាធបន្ថែម។
៨. បន្តរហូតធ្វើឲ្យវាក្លាយជាទម្លាប់
ដរាបណាអ្នកព្យាយាមហ្វឹកហាត់ជាប្រចាំ អ្វីក៏ដោយនឹងក្លាយទៅជាទម្លាប់។ ការញញឹមក៏ដូចគ្នា បើអ្នកនៅតែអាចរក្សាវាបាន មិនថាមានរឿងអ្វីកើតឡើង យូរៗទៅអ្នកនឹងក្លាយជាមនុស្សរឹងមាំ មិនញញើតនឹងឧបសគ្គ បញ្ហាធំយ៉ាងណាក៏នៅតែញញឹមជានិច្ច៕
ចុចអានបន្ត៖ ចង់ឲ្យគេស្រលាញ់ឲ្យតម្លៃ ដរាបណាអ្នកចេះឲ្យតម្លៃខ្លួនឯងតាមវិធីទាំងនេះសិន