ត្រឹមតែជាអ្នកស្គាល់គ្នាប៉ុណ្ណោះ យើងមានសិទ្ធិអីទៅប្រចណ្ឌគេ
- 2020-02-21 03:03:00
- ចំនួនមតិ 0 | ចំនួនចែករំលែក 0
ត្រឹមតែជាអ្នកស្គាល់គ្នាប៉ុណ្ណោះ យើងមានសិទ្ធិអីទៅប្រចណ្ឌគេ
អារម្មណ៍មួយដែលឃើញមនុស្សខ្លួនឯងកំពុងលួចស្រឡាញ់ Post ពីអ្នកផ្សេង និយាយពីអ្នកផ្សេង ពេលនោះដូចជាគេយកបន្លាមកចាក់ដោតចំបេះដូងខ្ញុំអីចឹង តែខ្ញុំមានតែទ្រាំឃើញ ទ្រាំស្ដាប់ទាំងក្នុងទ្រូងស្ទើរធ្លាយមកក្រៅទៅហើយ។
ខ្ញុំចង់ខឹងគេណាស់ ខ្ញុំចង់ប្រចណ្ឌគេណាស់ ខ្ញុំចង់ប្រាប់គេថាខ្ញុំអន់ចិត្តណាស់ តែគិតចុះគិតឡើងខ្ញុំគ្មានឋានៈអីទាំងអស់ក្រៅពីពាក្យថា «ត្រឹមអ្នកស្គាល់គ្នា»។ បែបនេះគឺគ្មានសិទ្ធិអីទាំងអស់ គ្មានអីត្រូវទៅអន់ចិត្តជាមួយគេឡើយ គេធ្វើអី ទាក់ទងអីជាមួយអ្នកណាក៏ខ្ញុំគ្មានសិទ្ធិរវីរវល់ទាំងអស់។
អារម្មណ៍ដែលទ្រាំឈរមើលបែបនេះខ្ញុំពិបាកទ្រាំណាស់ តែសួរថាខ្ញុំអាចធ្វើអីកើត? ម៉េចមិនក្លាយជាសង្សារនឹងគ្នាទៅ? ធ្វើសង្សារគ្នាបានដោយរបៀបណា បើមនុស្សមានចិត្តតែម្ខាង សួរថាវាវេទនាប៉ុណ្ណា។ ខ្ញុំមិនយល់ខ្លួនឯងដូចគ្នា ហេតុអីទៅស្រឡាញ់មនុស្សដែលមិនគួរស្រឡាញ់ ហេតុអីទៅស្រឡាញ់មនុស្សដែលគ្មានផ្លូវអាចជួបគ្នាបាន?
ហេតុអីមិនដើរចេញ? មិនមែនមិនដើរចេញទេ តែដើរចេញមិនរួច កាន់តែដកខ្លួនកាន់តែឈឺចាប់ កាន់តែស្រឡាញ់គេលើសដើម។ គិតទៅហេតុអីមកជួបរឿងបែបនេះ? កាន់តែគិតខ្ញុំកាន់តែពិបាកចិត្ត។
មិនមែនជាសង្សារនឹងគ្នាទេ ដូច្នេះអ្វីដែលអាចធ្វើបានគឺធ្វើខ្លួនធម្មតា នឹងព្យាយាមកាត់ចិត្តតែប៉ុណ្ណោះ។ កុំបង្ខំខ្ញុំឲ្យឈប់ស្រឡាញ់ភ្លាមៗអី ព្រោះពេលនេះខ្ញុំកំពុងព្យាយាមបន្តិចម្ដងៗ រហូតថ្ងៃមួយវាអាចជាសះស្បើយ។
រកសុភមង្គលអ្នកឲ្យឃើញទៅ កុំខ្វល់ថាខ្ញុំឈឺចាប់ប៉ុណ្ណាព្រោះខ្ញុំនឹងរីករាយនៅពេលអ្នករកឃើញភាពរីករាយដូចគ្នា។ ខ្ញុំជឿថាថ្ងៃមួយខ្ញុំគង់តែឈប់ស្រឡាញ់អ្នកទេ ដូច្នេះកុំបារម្ភអី ព្រោះយើងត្រឹមតែជាមនុស្សស្គាល់គ្នាតែប៉ុណ្ណោះ។
ស្រឡាញ់មនុស្សដែលមិនគួរស្រឡាញ់គឺជាកំហុសមួយ តែយើងមិនអាចបន្ទោសអ្នកណាបានទាំងអស់ ព្រោះរឿងវាបានកើតឡើងទៅហើយ អ្វីដែលអាចធ្វើគឺព្យាយាមលាងកំហុសនេះឲ្យអស់ទៅគឺបានហើយ៕
ចុចអាន៖កុំឆោតទៀតអី! មនុស្សស្រីកាន់តែលះបង់ម្នាក់ឯង នឹងកាន់តែត្រូវគេបន្ទាបតម្លៃ