តិចនិក ៤ យ៉ាងជួយថែរក្សាស្បែកមុខឱ្យនៅក្មេងបានយូរ មិនងាយស្គាល់ស្នាមជ្រីវជ្រួញ

2020-02-17 04:05:00
ចំនួនមតិ 0 | ចំនួនចែករំលែក 0

មនុស្សស្រីគ្រប់រូបតែងប្រាថ្នាស្បែកមុខម៉ដ្ឋ រលោង និង ក្មេងជាងវ័យជាដើម។ យ៉ាងណាមិញ ពេលខ្លះ ការពិតមិនបានដូចការប្រាថ្នានោះទេ។ នារីដែលមានវ័យចាប់ពី ៣០ឆ្នាំឡើងទៅ ភាគច្រើនតែងជួបប្រទះនូវបញ្ហារឿងស្នាមជ្រីវជ្រួញនៅលើផ្ទៃមុខ ហើយពេលនោះហើយដែលសម្រស់ចាប់ផ្តើមថយចុះជាបណ្តើរៗ បើមិនបានថែទាំឱ្យបានខ្ជាប់ខ្ជួន។ ដូច្នេះ បើអ្នកចង់រក្សាស្បែកមុខឱ្យនៅក្មេងបានយូរ គួរធ្វើការការពារផ្ទៃមុខដោយតិចនិកទាំង ៤ សំខាន់ៗនេះ៖

១. លាងគ្រឿងសំអាងឱ្យបានស្អាតពីផ្ទៃមុខ

រូបតំណាង

ការលាងសម្អាតផ្ទៃមុខគឺជារឿងសំខាន់ ជាពិសេសសម្រាប់សុភាពនារីដែលនិយមផាត់មុខជាប្រចាំ។ ផលិតផលលាបមុខរបស់អ្នកអាចនឹងស្អិតជាប់រន្ធមុខ ប្រសិនបើមិនត្រូវបានលាងជម្រះឱ្យបានស្អាតល្អ។ មិនត្រឹមតែប៉ុណ្ណោះ វាអាចបង្កជាបញ្ហាស្បែកមុខនានា ដែលរួមមាន ស្បែកមុខស្រអាប់ កើតមុន និង ងាយជ្រួញជាដើម។ ដូច្នេះ អ្នកត្រូវលាងសម្អាតស្បែកមុខ ដោយធ្វើការជូតទឹកលាងជម្រះMake Up ជាមុនសិន រួចបន្ថែមជាមួយការដុសសាប៊ូ ឬ ហ្វូមលាងមុខដែលគ្មានជាតិកាត់ខ្លាំងដល់ស្បែកមុខ ជាការស្រេច។

២. ផឹកទឹកឱ្យបានច្រើន ចៀសវាងប្រភេទភេសជ្ជៈផ្សេង

រូបតំណាង

តែ កាហ្វេ និង សុរា សុទ្ធសឹងជាប្រភេទភេសជ្ជៈដែលងាយធ្វើឱ្យផ្ទៃមុខមានសភាពជ្រីវជ្រួញ។ ទឹកគឺជាប្រភពនៃភាពសំណើម ទាំងដល់រាងកាយ និង ស្បែក ដូច្នេះ អ្នកគួរពិសារទឹកឱ្យបានច្រើនជំនួសភេសជ្ជៈទាំងនោះដែលអាចប៉ះពាល់ដល់ស្បែកមុខក្នុងរយៈពេលយូរ។

៣. ចៀសវាងការញុំាជាតិផ្អែម

រូបតំណាង

ការទទួលទានជាតិផ្អែម ឬ ស្ករច្រើនងាយបង្កឱ្យស្បែកមានសភាពជ្រីវជ្រួញដូចគ្នា ពីព្រោះជាតិស្ករអាចទៅបំផ្លាញភាពតឹងណែននៃស្បែកមុខនារីដែលមាននាទីការពារភាពជ្រីវជ្រួញនៃស្បែក។ ដូច្នេះ បើអ្នកមិនចង់ឃើញស្បែកមុខមានសភាពចាស់ជាងវ័យ គួរកាត់បន្ថយការញុំាំរបស់ផ្អែមចោលខ្លះ ព្រោះភាពជ្រីវជ្រួញគឺងាយនឹងកើតឡើង តែមិនងាយនឹងបាត់ទៅវិញឡើយ។

៤. លាបឡេការពារកម្តៅថ្ងៃជាប្រចាំ

រូបតំណាង

ឡេការពារកម្តៅថ្ងៃគឺជាផលិតផលដែលនារីគ្រប់រូបត្រូវលាបលើផ្ទៃមុខរាល់ពេលចេញដំណើរទៅខាងក្រៅជារៀងរាល់ថ្ងៃ។ វាមានតួនាទីជួយការពារស្បែកមុខពីការរងនូវកម្តៅកាំរស្មីUV ដែលអាចធ្វើឱ្យស្បែកមុខងាយរងនូវបញ្ហាដូចជា ការឡើងអាចម៍រុយ ជាំ ឬ មានស្នាមជ្រីវជ្រួញជាដើម។ អ្នកអាចជួយការពារស្បែកមុខរបស់អ្នកពីបញ្ហាមុខទាំងអស់នេះតាមរយៈការលាបនូវឡេកម្តៅថ្ងៃជាប្រចាំឱ្យបានខ្ជាប់ខ្ជួន មុននឹងត្រូវខូចស្បែកមុខអស់ដោយសារការមិនយកចិត្តទុកដាក់៕