៧សញ្ញាគ្រោះថ្នាក់នៃជំងឺមហារីកមាត់ស្បូន ស្ត្រីគ្រប់រូបត្រូវសង្កេតតាមដាន
- 2020-02-12 05:05:00
- ចំនួនមតិ 0 | ចំនួនចែករំលែក 0
៧សញ្ញាគ្រោះថ្នាក់នៃជំងឺមហារីកមាត់ស្បូន ស្ត្រីគ្រប់រូបត្រូវសង្កេតតាមដាន
ជំងឺមហារីកមាត់ស្បូនគឺជាជំងឺស្ត្រីមួយប្រភេទដែលកំពុងគំរាមកំហែងយ៉ាងខ្លាំងដល់សុខភាពស្ត្រីនៅទូទាំងពិភពលោក។ ទោះបីរោគសញ្ញាជំងឺនេះមិនសូវជាលេចចេញខ្លាំង គួរឲ្យកត់សម្គាល់ដូចជំងឺមហារីកដោះក៏ដោយ ប៉ុន្តែវានៅតែមានវិធីក្នុងការដឹងជាមុន ប្រសិនអ្នកចេះសង្កេត។ ខាងក្រោមនេះជាសញ្ញាគ្រោះថ្នាក់៧យ៉ាងនៃជំងឺដ៏កាចសាហាវនេះ ដែលតម្រូវឲ្យអ្នកប្រញាប់ទៅពិគ្រោះជាមួយគ្រូពេទ្យជាបន្ទាន់៖
**១. ធ្លាក់សខុសប្រក្រតី**
នៅពេលដែលមហារីកចាប់ផ្តើមរីកដុះដាលនៅក្នុងមាត់ស្បូន កោសិកានៃជញ្ជាំងស្បូនត្រូវបានទម្លាយ ដែលធ្វើឲ្យអ្នកធ្លាក់ស មានសភាពជាទឹក ខុសពីធម្មតា។
២. កើតឫស
យោងតាមអ្នកជំនាញខាងរោគស្ត្រី Rosa Maria Leme បានឲ្យដឹងថា ការលេចចេញនូវ ជំងឺឫស មិនថាក្រៅឬក្នុងខ្លួនទេ វាអាចជារោគសញ្ញានៃហានិភ័យជំងឺមហារីកមាត់ស្បូនច្រើនករណី។
៣. ឈឺចាប់ ឬធ្លាក់ឈាម
ការលូតលាស់នៃកោសិកាមហារីក ធ្វើឲ្យជញ្ជាំងកស្បូនស្ងួត ដែលអាចបង្កឲ្យមានការឈឺចាប់ ឬធ្លាក់ឈាម។ ដូច្នេះវានឹងបណ្ដាលឲ្យមានការធ្លាក់ឈាមតាមរន្ធគូថ ផ្លោកនោម ឬធ្លាក់ឈាមខុសថ្ងៃនៃវដ្ដរដូវរបស់អ្នក។
៤. ស្លេកស្លាំង
ប្រសិនបើទម្លាប់នៃការញ៉ាំរបស់អ្នកមិនបានផ្លាស់ប្តូរ ហើយអ្នកមានអារម្មណ៍អស់កម្លាំង ល្ហិតល្ហៃ ទឹកមុខស្លេកស្លាំង ឬប្រសិនបេះដូងអ្នកលោតញាប់ ទាំងដែលអ្នកធ្វើការធម្មតា វាក៏ជារោគសញ្ញាមួយនៃជំងឺមហារីកមាត់ស្បូនដែរ។
៥. បញ្ហាប្រពន្ធទឹកនោម
ខណៈពេលដែលកស្បូនហើម ប្លោកនោមនិងក្រលៀនអាចត្រូវបានសង្កត់ បង្កឲ្យមានការរារាំងផ្លូវទឹកនោម។ ជាលទ្ធផល ប្លោកនោមរបស់អ្នកមិនអាចបត់បែនបាន បណ្តាលឱ្យមានការឈឺចាប់ ឬការឆ្លងមេរោគលើផ្លូវបង្ហូរទឹកនោម។
៦. ឈឺចុករោយ ជើង ត្រគាក ឬខ្នង មិនឈប់ឈរ
ដូចគ្នានេះផងដែរ ស្បូនហើមក៏ធ្វើឲ្យសរីរាង្គខាងក្នុងហើម។ សរសៃឈាមត្រូវបានសង្កត់ ធ្វើឲ្យចរន្តឈាមមិនអាចរត់ទៅដល់ឆ្អឹងត្រគាក និងជើង ដែលបណ្ដាលឲ្យមានការឈឺចាប់ ហើមជើង ព្រមទាំងកជើងជាដើម។
៧. ស្រកទម្ងន់
ការហើមនៃមាត់ស្បូន បានសង្កត់លើក្រពះ ធ្វើឲ្យអ្នកបាត់បង់ចំណង់ញ៉ាំអាហារ ដែលជាហេតុនៃការស្រកទម្ងន់ផងដែរ។
មិនប្រាកដថាគ្រប់ចំណុចខាងលើជារោគសញ្ញានៃជំងឺមហារីកមាត់ស្បូនទាំងអស់នោះទេ។ មានតែគ្រូពេទ្យ និងការពិនិត្យម៉ត់ចត់តាមបែបវេជ្ជសាស្ត្រប៉ុណ្ណោះ ទើបអាចបញ្ជាក់ច្បាស់។ ដូច្នេះបើអ្នកសង្ស័យកុំបង្អង់យូរ ប្រញាប់ទៅពិគ្រោះជាមួយគ្រូពេទ្យជាបន្ទាន់ ៕
ចុចអាន៖