ឈប់ងងុយទាំងកណ្តាលថ្ងៃជាមួយគន្លឹះ ទាំង៧ ដែលដាស់ស្មារតីស្វាងចែស

2020-01-30 08:55:00
ចំនួនមតិ 0 | ចំនួនចែករំលែក 0

តើអ្នកណាពិបាកក្នុងការគ្រប់គ្រងស្មារតីមិនឱ្យងងុយទាំងថ្ងៃនោះ។ ពេលខ្លះ កណ្តាលថ្ងៃចែស បែរជាមានអារម្មណ៍ថាហត់នឿយ អស់កម្លាំងបាត់ទៅហើយ។ អស់បារម្ភហើយពេលនេះ មិនចាំបាច់រកនឹកវិធីច្រើនទេ! សាកល្បងអនុវត្តនូវគន្លឹះទាំង ៧ ដែលជួយបំបាត់ការងងុយគេងក្នុងពេលមិនសមស្រប៖

១. ផឹកកាហ្វេ

រូបតំណាង

វិធីដំបូងដើម្បីបំបាត់ការងងុយគេង ឬ ដាស់ស្មារតីនោះគឺ ការទទួលទាននូវជាតិកាហ្វេអុីន ដែលមាននៅក្នុងភេសជ្ជៈប៉ូវកម្លាំង តែ ឬ កាហ្វេ។ ជាតិកាហ្វេអុីនមានផ្ទុកនូវសារធាតុដែលជួយពង្រឹងស្មារតី ប៉ូវកម្លាំង និង បំបាត់ការនឿយហត់ ឬ ងងុយ។ វាគឺជាវិធីដែលងាយស្រួល លឿន ហើយមានប្រសិទ្ធភាពពិតប្រាកដ។

២. ញុំាស្ករកៅស៊ូ

រូបតំណាង

មិនថានៅសាលា កន្លែងធ្វើការ ឬ ទីសាធារណៈ បើអ្នកមានអារម្មណ៍ថានឿយហត់ ហើយ គ្មានស្មារតីក្នុងការយកចិត្តទុកដាក់លើអ្វីមួយ អ្នកអាចសាកល្បងបាននូវវិធីដ៏ងាយមួយនេះ។ ដោយគ្រាន់តែយកស្ករកៅស៊ូមកទំពារអាចធ្វើឱ្យមុខរបស់អ្នកមានចលនាសាច់ដុំ ដែលអាចបង្កឱ្យចរន្តឈាមនៅក្នុងខួរក្បាលកើនឡើង។ អ្នកប្រហែលជាមិនបានចាប់អារម្មណ៍តែការទំពារស្ករកៅស៊ូនេះក៏ជាវិធីសាស្ត្រមួយដែលមានប្រសិទ្ធភាពក្នុងការជួយឱ្យអ្នកផ្តោតអារម្មណ៍បានល្អជាងមុនដែរ។

៣. ហាត់ប្រាណ

រូបតំណាង

ការធ្វើលំហាត់ប្រាណក៏អាចជួយបំបាត់នូវសភាពនឿយហត់ និង ងងុយរបស់អ្នកបានដែរ។ ពេលរាងកាយអ្នកធ្វើចលនា វាធ្វើឱ្យមានការកើនឡើងនៃចង្វាក់បេះដូង ព្រមទាំងធ្វើឱ្យឈាមរត់បានល្អនៅក្នុងខួរក្បាលរបស់អ្នកបានដែរ។

៤. ពត់ខ្លួន

រូបតំណាង

ពេលអ្នកមានអារម្មណ៍ថាគ្មានកម្លាំង នឿយហត់ និង ងងុយខ្លាំង អ្នកអាចធ្វើការសាកល្បងងើបឈរ ហើយ ពត់ខ្លួនប្រាណរបស់អ្នកមួយសន្ទុះដើម្បីសម្រួលនូវខ្យល់ដង្ហើមរបស់អ្នក និងផ្តល់នូវអុកស៊ីសែនគ្រប់គ្រាន់ដល់រាងកាយ ដែលជាផ្នែកមួយជួយដាស់តឿនស្មារតីអ្នកបាន។ ការពត់ខ្លួនក៏ជួយពន្លាតសរសៃ និង បំបាត់នូវភាពតានតឹងនៃសាច់ដុំផងដែរ។ ដូច្នេះ អ្នកអាចជ្រើសរើសវិធីពត់ខ្លួននេះរាល់ពេលអ្នកមានអារម្មណ៍ថាចង់ផ្តោតស្មារតីទៅលើកិច្ចការអ្វីមួយ។

៥. ស្តាប់ចម្រៀង

រូបតំណាង

ការស្តាប់ចម្រៀងត្រូវបានគេចាត់ទុកថាជាវិធីបំបាត់ការងងុយគេងយ៉ាងមានប្រសិទ្ធភាពដូចគ្នា។ យ៉ាងណាមិញ ដើម្បីទទួលបាននូវប្រសិទ្ធភាពនោះ មិនត្រូវស្តាប់បទអន្លង់អន្លោចឡើយ គឺជ្រើសរើសនូវតន្ត្រី ឬ បទណាដែលមានលក្ខណៈញាប់ ឬ ភ្លេងបែបញាក់កន្រ្តាក់អារម្មណ៍។

៦. ផ្លាស់ប្តូរទម្លាប់ប្រចាំថ្ងៃ

រូបតំណាង

បើអ្នកឧស្សាហ៍ងងុយគេង និង ហត់នឿយជាញឹកញាប់ គឺដល់ពេលហើយដែលអ្នកគួរតែផ្លាស់ប្តូរនូវទម្លាប់រសនៅប្រចាំថ្ងៃរបស់អ្នក ពោលគឺផ្លាស់ប្តូរកត្តា៣ សំខាន់ៗរួមមាន៖ ការគេង ការហូបចុក និង ការហាត់ប្រាណ។ ពេលអ្នកឧស្សាហ៍ធ្វើលំហាត់ប្រាណ រាងកាយរបស់អ្នកនឹងសុំាំទៅនឹងភាពរហ័សរហួន ហើយ ពោរពេញដោយកម្លាំង។ ដូចគ្នា ជាមួយនឹងចំណីអាហារដែរ បើអ្នកជ្រើសរើសបរិភោគនូវអាហារសុខភាពឱ្យបានច្រើន រាងកាយរបស់អ្នកនឹងមានផ្ទុកនូវសារជាតិគ្រប់គ្រាន់សម្រាប់ធ្វើសកម្មភាពពេញមួយថ្ងៃដោយមិនអស់កម្លាំងទាំងកណ្តាលថ្ងៃឡើយ។ ចំណុចសំខាន់ចុងក្រោយគឺ រាងកាយរបស់អ្នកត្រូវការសម្រាកឱ្យបានគ្រប់គ្រាន់ដើម្បីបំពេញនូវតួនាទីរបស់ខ្លួនពេញមួយថ្ងៃ ដូចនេះ អ្នកគួរធ្វើយ៉ាងណាគេងឱ្យបានច្រើនទើបល្អប្រសើរ។

៧. សម្រាករយៈពេលខ្លី (ក្រោម២០នាទី)

រូបតំណាង

បើអ្នកមិនចង់អនុវត្តនូវវិធីណាមួយខាងលើ ឬ សាកល្បងហើយនៅតែងងុយ អ្នកអាចឆ្លៀតពេលបិទភ្នែកគេងសម្រាករយៈពេលខ្លី គឺ១០-២០នាទី។ ការសម្រាករយៈពេលខ្លីនេះអាចជួយដាស់តឿនស្មារតីអ្នកឱ្យត្រឡប់មកសភាពដើមវិញ និង បំបាត់ការងងុយគេងក្នុងពេលមិនសមស្រប។ ដូច្នេះ បើអ្នកអាចឆ្លៀតពេលសម្រាកបន្តិចបាន គួរតែសាកល្បងវិធីចុងក្រោយនេះ។ យ៉ាងណាមិញ អ្នកមិនគួរសម្រាកលើសពី ២០នាទីឡើយ ព្រោះពេលភ្ញាក់ឡើងវិញអាចនឹងធ្វើឱ្យអ្នកងងុយគេងលើសដើម៕

អានបន្ត៖ ស្មារតីវិជ្ជមាន គ្រប់គ្រងបានគ្រប់ស្ថានការណ៍ក្នុងជីវិត ជាមួយវិធីសាស្ត្រ ៥ យ៉ាងនេះ

ប្រភព៖ scribendi ប្រែសម្រួល៖ Siyou Tang