ស្មារតីវិជ្ជមាន គ្រប់គ្រងបានគ្រប់ស្ថានការណ៍ក្នុងជីវិត ជាមួយវិធីសាស្ត្រ ៥ យ៉ាងនេះ

2020-01-30 04:40:00
ចំនួនមតិ 0 | ចំនួនចែករំលែក 0

ជាធម្មតា ក្នុងជីវិតមនុស្សម្នាក់តែងជួបប្រទះនូវរឿងរ៉ាវផ្សេងៗគ្នា ហើយរឿងទាំងនោះទៀតសោត សុទ្ធសឹងតែមានលក្ខណៈស្រដៀងគ្នា គឺពោរពេញដោយក្តីសុខលាយនឹងក្តីទុក្ខ ពោលគឺមានឡើង មានចុះ។ ផ្ទុយទៅវិញ មិនថាជួបរឿងបែបណាក្នុងជីវិត មនុស្សម្នាក់ៗគប្បីមានស្មារតីនឹងន និង គិតទៅផ្លូវវិជ្ជមានជានិច្ច ទើបអាចគ្រប់គ្រងបានគ្រប់ស្ថានការណ៍ដែលខ្លួនកំពុងប្រឈម។ ខាងក្រោមគឺ វិធីសាស្រ្តទាំង ៥ ដែលជួយឱ្យអ្នកប្រមូលអារម្មណ៍ និង ស្មារតីបានល្អ ទោះស្ថិតក្នុងកាលៈទេសៈបែបណាក៏ដោយ៖

១. នៅក្បែរមនុស្សដែលមានស្មារតីសុទិដ្ឋិនិយម

រូបតំណាង

នៅពេលមានរឿងមិនល្អកើតឡើងចំពោះអ្នក ឬ អ្វីៗដែលនៅជុំវិញខ្លួន បុគ្គលដែលអ្នកគួរចំណាយពេលជាមួយគឺ ប្រភេទបុគ្គលដែលតែងគិតអ្វីៗក្នុងផ្លូវវិជ្ជមាន បុគ្គលដែលមិនធ្វើឱ្យរឿងកាន់តែពិបាក បុគ្គលដែលតែងផ្តល់យោបល់ល្អៗ និង ជួយអ្នកឱ្យមានស្មារតីសុទិដ្ឋិនិយមគ្រប់វេលា។ ខណៈមានរឿងឈឺក្បាលត្រូវដោះស្រាយ អ្នកមិនគួរនៅក្បែរមនុស្សដែលកាន់តែធ្វើឱ្យអ្នកឈឺក្បាលជាងនោះទៀតទេ ដូច្នេះ អ្នកគួរចំណាយពេលជាមួយប្រភេទបុគ្គលណាដែលនាំមកនូវអារម្មណ៍ល្អៗដល់អ្នក ស្របពេលអ្នកកំពុងត្រូវការកម្លាំងចិត្តបំផុត។

២. ទទួលយកការពិត ហើយ រកមធ្យោបាយដោះស្រាយ

រូបតំណាង

គ្មាននរណាម្នាក់មិនធ្លាប់ខុស ហើយ ក៏គ្មាននរណាម្នាក់មិនធ្លាប់ជួបការឈឺចាប់ដែរ តែអ្វីដែលអ្នកអាចប្រាប់ខ្លួនឯងបាននៅពេលជួបរឿងទាំងនោះគឺ ទទួលយកការពិត។ ពេលខ្លះ រឿងមួយចំនួនធ្វើឱ្យអ្នកពិបាកនឹងទទួលយក ប៉ុន្តែវាជារសជាតិនៃជីវិត ហើយគ្មានបុគ្គលណាអាចគេចផុតបានឡើយ។ ដូច្នេះ ជំនួសឱ្យការកើតទុក្ខមិនសុខចិត្តលើរឿងដែលបានកើតឡើង អ្នកគប្បីតាំងស្មារតីទទួលយកវា ហើយ ស្វែងរកនូវដំណោះស្រាយវិញទើបប្រសើរ។

៣. ហ្វឹកហាត់ស្មារតីឱ្យបានល្អ

រូបតំណាង

នៅគ្រប់កាលៈទេសៈ អ្នកគប្បីដឹងថា អ្នកមិនអាចគ្រប់គ្រងរឿងដែលអាចកើតឡើងចំពោះអ្នកឡើយ ក៏ប៉ុន្តែអ្នកអាចគ្រប់គ្រងការឆ្លើយតបរបស់អ្នកទៅនឹងរឿងអស់ទាំងនោះបាន មានន័យថា អ្វីដែលកើតឡើងលើអ្នកអាចមានល្អ មានអាក្រក់ ព្រោះអ្នកមិនមែនជាអ្នកកំណត់ តែចំពោះវិធីដោះស្រាយបញ្ហានីមួយៗ គឺអ្នកជាអ្នកកំណត់។ ដូចដែលអ្នកបានដឹង រឿងខ្លះដែលកើតឡើងហើយគឺមិនអាចបកថយក្រោយបានឡើយ ដូច្នេះវាអាស្រ័យទៅលើអ្នកជាអ្នកហ្វឹកហាត់ស្មារតីខ្លួនឯង ថាគួរយកវាជាមេរៀនសម្រាប់ជីវិតរួចបន្តដំណើរទៅមុខ ឬ ត្រូវមានវិប្បដិសារីជាមួយវារហូត។

៤. ត្រូវមានចិត្តអបអរនឹងអ្វីដែលខ្លួនមាន

រូបតំណាង

មូលហេតុចម្បងដែលនាំឱ្យមនុស្សមួយចំនួនគ្មានក្តីសុខក្នុងជីវិតរបស់ខ្លួន គឺព្រោះពួកគេមិនពេញចិត្តនឹងអ្វីដែលខ្លួនមាន។ ក្រុមគ្រួសារ មិត្តភក្តិ ទ្រព្យសម្បតិ្ត ការងារ និង បុណ្យសក្តិ សុទ្ធសឹងជាអ្វីៗដែលគ្រប់គ្នាប៉ងប្រាថ្នា ហើយ ពេលដែលវាមិនបានសម្រេចដូចការប៉ង វាធ្វើឱ្យអ្នកគ្មានក្តីរីករាយនឹងអបអរនូវឆាកជីវិតមួយនោះឡើយ។ បើមនុស្សម្នាក់ៗអាចបញ្ឈប់នូវការប្រៀបធៀបរវាងជីវិតខ្លួន និង អ្នកដទៃ ហើយចាប់ផ្តើមស្រឡាញ់ និង ពេញចិត្តនូវអ្វីដែលខ្លួនមាន ពេលនោះជីវិតរបស់អ្នកនឹងកាន់តែប្រសើរ។

៥. ធ្វើលំហាត់ប្រាណទាំងរាងកាយ និង ស្មារតី

រូបតំណាង

ការហាត់ប្រាណផ្នែករាងកាយគឺល្អប្រសើរស្រាប់ទៅហើយ តែពេលខ្លះអ្នកអាចនឹងភ្លេចខ្លួនថាខួរក្បាលរបស់អ្នកក៏ត្រូវការការហ្វឹកហាត់ផងដែរ។ ប្រសិនជាមានពេល អ្នកគួរសាកល្បងហាត់យោហ្គា ដែលជាលំហាត់ប្រាណមានអត្ថប្រយោជន៍ទាំងសម្រាប់រាងកាយ និង ខួរក្បាល។ ក្បាច់មួយចំនួននៃយោហ្គាគឺបង្កើតឡើយក្នុងគោលបំណងជួយសម្រាលនូវទុក្ខកង្វល់ និង ភាពតានតឹងនៃខួរក្បាល ភាគច្រើនសម្រាប់អ្នកគិតច្រើន ឬ គេងមិនលក់ជាដើម។ ដូច្នេះ មិនថាក្នុងស្ថានភាពបែបណា បើអាចឆ្លៀតពេលបាន អ្នកគួរថែរក្សាទាំងសុខភាពខួរក្បាល និង រាងកាយ៕