ប្រយ័ត្នលង់! ទង្វើ៥យ៉ាងរបស់បុរសដែលធ្វើឲ្យស្រីៗគិតជ្រៅ តែការពិតគ្មានអីសោះ!

2020-01-21 03:00:00
ចំនួនមតិ 0 | ចំនួនចែករំលែក 0

មនុស្សស្រីមិនងាយដាក់ចិត្តស្រឡាញ់អ្នកណាឡើយ តែណាស់តែបុរសៗមួយចំនួនចូលចិត្តធ្វើឲ្យនាងគិតដល់វែងឆ្ងាយ។ អ្នកណាក៏ចង់មានស្នេហា ដូច្នេះហើយនៅពេលមានអ្វីកើតឡើងបន្តិច ក៏ធ្វើឲ្យគិតខ្លួនឯងភ្លាមថាគេស្រឡាញ់ខ្លួន។ មុននឹងចាញ់បញ្ឆោតទៅលង់ស្នេហ៍គេម្នាក់ឯង ដោយសារគិតថាគេមានចិត្តលើខ្លួនឯងដែរ នារីៗសូមងាកមកមើលទង្វើ៥យ៉ាងរបស់បុរសដែលអ្នកអាចយល់ច្រឡំថាគេស្រឡាញ់អ្នក តែតាមការពិតវាមិនដូច្នោះទេ។

១. មកជួយរហូត

ជឿថាមាននារីជាច្រើនដែលធ្លាប់ចិត្តទន់ដោយសារបុរសបែបនេះ គឺថាដំបូងៗក៏មិនបានគិតអ្វីទេ ប៉ុន្តែពេលសង្កេតមើលយូរៗក៏យល់ថា ហេតុអ្វីបុរសម្នាក់នេះចូលចិត្តមកជួយខ្លួនឯងរហូត ទិញនេះទិញនោះឲ្យ អង្គុយញ៉ាំបាយជាមួយគ្នាក៏ដួសនេះ ថែមនេះថែមនោះឲ្យ។ តែមុននឹងចិត្តទន់បាក់ចិត្តលើគេ ត្រូវមើលឲ្យបានល្អិតល្អន់សិនថា ការពិតគេធ្វើបែបនេះដាក់មិត្តភ័ក្ដិស្រីៗគ្រប់គ្នា ឬក៏អត់។

២. តិចៗប៉ះ តិចៗវាយក្បាល

ទង្វើបែបនេះក៏ធ្វើឲ្យមនុស្សស្រីគិតច្រើនដែរ។ បុរសឯណាសុខៗមកវាយប្រលែងស្រីៗ បើមិនបានគិតអ្វីសោះ? តែតាមការពិតការវាយ ការប៉ះតិចតួច ឬហៅថាស្និទ្ធស្នាលនេះ ជួនកាលគឺគេគ្មានបានគិតអ្វីទេ។ បើគេធ្វើបែបនេះដាក់អ្នក អាចមានន័យពីរយ៉ាង ទីមួយគេអាចចាប់អារម្មណ៍អ្នក ទីពីរគឺគេមិនបានចាត់ទុកអ្នកជាមនុស្សស្រីទេ តែចាត់ទុកដូចជាមិត្តភ័ក្ដិប្រុសៗស្និទ្ធស្នាលធម្មតា។

៣. ញញឹមដាក់រហូត

បើអត់គិតអីទេ ម៉េចក៏ញញឹមដាក់គេញឹកម្ល៉េះ? មនុស្សស្រីជាច្រើនប្រាកដជាគិតបែបនេះហើយមែនអត់។ ប៉ុន្តែសាកគិតឲ្យបានល្អិតល្អន់សិនថា ជាមួយមនុស្សដែលយើងមិនធ្លាប់ស្គាល់ ពេលជួបគ្នាដំបូង យើងក៏ញញឹមដាក់ដែរ។ ដែលញញឹមដាក់គឺដើម្បីកុំឲ្យគេមើលមកថាយើងឫក មិនគួរឲ្យចង់រាប់អានប៉ុណ្ណឹងឯង។ ដូច្នេះបើគេញញឹមដាក់ញឹកញាប់នោះ គឺអាចមានន័យថាគេគ្រាន់តែចង់រាប់អានយើងធម្មតា ឬគ្រាន់តែចង់បង្ហាញការគោរព ឬក្រែងចិត្តយើងប៉ុណ្ណោះ។

៤. សម្លឹងមើលភ្នែកគេហ្នឹង គិតអីមែន?

ទង្វើមួយទៀតដែលធ្វើឲ្យស្រីៗគិតច្រើនបំផុត គឺការសម្លឹងមើលកែវភ្នែកគ្នាយូរៗនេះឯង។ ធម្មតាមនុស្សនិយាយគ្នាគឺមិនសម្លឹងមើលភ្នែកគ្នា លើសពី ៥វិនាទីទេ។ ភាគច្រើនក៏ធ្វើជាសម្លឹងទៅនេះទៅនោះខ្លះ ប៉ុន្តែបើអ្នកណាដែលរាងពូកែនិយាយ និងមានជំនឿចិត្តលើខ្លួនឯង គឺអាចនឹងសម្លឹងមកត្រង់ៗ យូរៗ ពេលនិយាយគ្នា ដោយមិនដាក់ភ្នែក រហូតធ្វើឲ្យភាគីម្ខាងទៀតត្រូវងាកចេញដោយខ្លួនឯង។

៥. ឆាតមកញឹកញាប់

ចំណុចនេះកាន់តែធ្វើឲ្យមនុស្សស្រីគិតច្រើនទៀតហើយ។ មិត្តភ័ក្ដិធម្មតាឯណា ដែលឆាតមកគ្នារហូតបែបនេះ ហើយបើជាមនុស្សប្រុសនិងមនុស្សស្រី គឺកាន់តែគួរឲ្យសង្ស័យ។ តែសម្រាប់គេ គេអាចមិនគិតអីក៏ថាបានដែរ។ ជួនកាលគេគ្រាន់តែចង់បាននរណាម្នាក់មកស្ដាប់រឿងដែលគេនិយាយធម្មតាៗប៉ុណ្ណោះ។

គិតៗទៅបុរសមួយចំនួនធ្វើអ្វីមិនគិតពីចិត្តនារីៗសោះ ប៉ុន្តែបន្ទោសគេក៏មិនបានដែរ ព្រោះជួនកាលគេគ្រាន់តែ Friendly។ ដូច្នេះហើយស្រីៗយើងកុំឆាប់ងាយលង់ដោយសារទង្វើរបស់គេឲ្យសោះ ត្រូវសង្កេតមើលតាមបរិបទផ្សេងៗផងទើបទទួលបានចម្លើយកាន់តែច្បាស់ ៕

ប្រភព៖ sistacafe ប្រែសម្រួល៖ ស្វាយ វ៉ាន់ថន