ពាក្យ ៤ឃ្លា ចេញពីមាត់នារី ដែលធ្វើឱ្យបុរសធ្លាក់ក្នុងអន្លង់ស្នេហ៍ភ្លាមៗ

2020-01-14 10:15:00
ចំនួនមតិ 0 | ចំនួនចែករំលែក 0

ជាទូទៅ ថ្វីដ្បិតតែបុរសមិនសូវបញ្ចេញពីភាពទន់ខ្សោយរបស់ខ្លួន តែពួកគេក៏មានចំណុចខ្លះដែលពួកគេត្រូវការ ការលើកទឹកចិត្ត និង ការយល់ចិត្តពីនារីៗដែរ។ ជាពិសេស នៅពេលដែលនារីផ្តល់មតិយោបល់ដ៏មានន័យទៅលើរឿងអ្វីមួយនៃជីវិត ដែលធ្វើឱ្យបុរសមានសេចក្តីរំភើប អបអរ និង ភ្ញាក់ផ្អើល។ ដូច្នេះ ពាក្យទាំង ៤ឃ្លា ខាងក្រោមសុទ្ធសឹងជាឃ្លាដែលតែងតែធ្វើឱ្យបុរសមានការរំជួលចិត្ត និង អាចធ្លាក់ក្នុងអន្លង់ស្នេហ៍ភ្លាមតែម្តង មិនថាធ្លាប់ ឬ មិនធ្លាប់ស្គាល់គ្នាពីមុនមក៖

រូបតំណាង

១. "អ្នកមានចរិតស័ក្តិសមជាសុភាពបុរសមែន"៖ ពាក្យមួយឃ្លានេះគឺមានន័យណាស់សម្រាប់បុរស ជាពិសេសនៅពេលគាត់បានធ្វើទង្វើណាមួយដែលគួរឱ្យនារីយកចិត្តទុកដាក់ និង មិនសរសើរមិនបាន។ ការជួយយកអាសារនារី គឺជាទង្វើដែលសុភាពបុរសមួយចំនួនចូលចិត្តធ្វើ ដូចនេះពួកគេនឹងមានការរំជួលចិត្តខ្លាំង ប្រសិនណាបើនារីណាម្នាក់មើលឃើញនូវទង្វើល្អរបស់គាត់ ហើយ ប្រាប់ត្រង់ៗបែបនេះ។

២. “ការយល់ដឹងរបស់អ្នក ពិតជាគួរឱ្យទាក់ទាញ"៖ មួយឃ្លានេះវិញ បង្ហាញពីការស្ញប់ស្ញែងនូវលើទេពកោសល្យរបស់បុរសណាម្នាក់ដែលអ្នកគិតថាគាត់គឺ ពូកែ និង ចេះដឹងច្រើនលើផ្នែកអ្វីមួយ។ បុរសគាត់ចូលចិត្តការឱ្យតម្លៃទៅលើអ្វីដែលគាត់មាន ហើយ បើនារីណាម្នាក់និយាយបែបនេះទៅកាន់គាត់គឺបេះដូងលោតញាប់ញ័រតែម្តង។

រូបតំណាង

៣. “ខ្ញុំមិនដែលជួបបុរសណាដែលមានឆន្ទៈដូចអ្នកពីមុនមកឡើយ”៖ ចំណុចនេះក៏ស្រដៀងទៅនឹងចំណុចមុនដែរ។ បើបុរសម្នាក់នោះគាត់មានគោលចំហរឹងពឹង ឬ មានសមត្ថភាពខ្ពស់លើអ្វីមួយ មិនថានៅក្នុងការងារ ការសិក្សា ឬ មុខរបររបស់គាត់ គឺជានិច្ចកាលគាត់តែងចង់បានការមើលឃើញពីសំណាក់អ្នកដទៃ ឬ នៅក្នុងភ្នែកមនុស្សជុំវិញខ្លួន។ ដូចនេះ បើមាននរណាម្នាក់ផ្តល់នូវការលើកទឹកចិត្តនេះដល់គាត់ ក៏អាចមានឱកាសឆក់យកបេះដូងរបស់គាត់បានដែរ។

៤. “ខ្ញុំចង់មានឱកាសជួបអ្នកម្តងទៀត”៖ មួយឃ្លាចុងក្រោយនេះចាក់ដោតណាស់ ព្រោះវាបង្ហាញថាអ្នកចង់ជួប និង ចង់នៅក្បែរបុរសម្នាក់នោះ។ ការនិយាយបែបនេះធ្វើឱ្យពួកគេគិតថាអ្នកពេញចិត្តនូវវត្តមានរបស់គេ និង ធ្វើឱ្យគេមានអារម្មណ៍ថាគេជាមនុស្សពិសេស។ ដូចនេះ យូរមិនយូរ គេគង់មានចិត្តលើអ្នកជាមិនខាន៕