ដាក់ទឹកបន្តិចលើថ្នាំមុនដុសធ្មេញ ធ្វើឲ្យបាត់ជាតិផ្លអ័ររ៉ាយការពារធ្មេញមិនឲ្យពុកបានយ៉ាងងាយ
- 2020-01-10 08:25:00
- ចំនួនមតិ 0 | ចំនួនចែករំលែក 0
ដាក់ទឹកបន្តិចលើថ្នាំមុនដុសធ្មេញ ធ្វើឲ្យបាត់ជាតិផ្លអ័ររ៉ាយការពារធ្មេញមិនឲ្យពុកបានយ៉ាងងាយ
ជឿថាមនុស្សជាច្រើន ប្រាកដជាមានទម្លាប់តែងតែច្របាច់ថ្នាំដុសធ្មេញលើច្រាសសិនហើយដាក់ទឹកបន្តិចលើថ្នាំនោះ ឬក៏ដាក់ច្រាសក្នុងកែវទឹកបន្តិចមុននឹងដុសធ្មេញ។ ដោយសារពួកគេជឿថា ធ្វើបែបនេះ នឹងជួយឲ្យពេលដុសទៅងាយស្រួល និងបង្កើនភាពរលូនល្អពេលដុសធ្មេញ។ តាមពិតទៅ វិធីសាស្ត្រនេះមិនល្អសម្រាប់ធ្មេញរបស់អ្នកឡើយ។
តាមការណែនាំ វាអាចកាត់បន្ថយបរិមាណផ្លអ័ររ៉ាយ ( Fluoride ) ក្នុងថ្នាំដុសធ្មេញបាន។ អ្នកដឹងទេថា ផ្លអ័ររ៉ាយមានប្រសិទ្ធភាពបំផុតសម្រាប់ការពារធ្មេញមិនឲ្យពុកផុយ និងដង្កូវស៊ី។ មួយវិញទៀត សូម្បីតែក្រោយដុសធ្មេញរួច អ្នកខ្ពុលមាត់ច្រើនដងពេក ក៏អាចកាត់បន្ថយសារជាតិផ្លអ័ររ៉ាយនៅលើធ្មេញបានដែរ។
ម្ល៉ោះហើយ ទន្តពេទ្យបានផ្ដល់ដំបូន្មានថា វិធីល្អបំផុតត្រូវដុសធ្មេញជាមួយថ្នាំដុសធ្មេញតែមួយគត់ ដោយគ្មានការបន្ថែមទឹកលាយឡំ។ អ្នកដឹងទេ ពេលកំពុងដុសធ្មេញ ទឹកមាត់គឺមានសមត្ថភាពគ្រប់គ្រាន់ក្នុងការបង្កើតភាពរលូនជាមួយថ្នាំដុសធ្មេញរួចហើយ។ មួយទៀត ពេលស្តោះថ្នាំដុសធ្មេញក្រោយដុសរួច ខ្ពុលមាត់ជាមួយទឹកត្រឹមតែម្ដងគត់ គឺសមល្មមហើយ ដើម្បីរក្សាសារធាតុផ្លអ័ររ៉ាយឲ្យបានច្រើននៅលើធ្មេញ។
សម្រាប់ការដុសធ្មេញឲ្យអស់កំទិចកំទី អ្នកគួរតែដុសធ្មេញទាំងខាងក្នុងនិងខាងក្រៅ ក្នុងរយៈ ពេល ២ - ៣ នាទី។ លើសពីនេះ មិនត្រូវភ្លេចដុសអណ្ដាតនោះទេ ដើម្បីកាត់បន្ថយបាក់តេរីនៅក្នុងមាត់។ ដើម្បីឲ្យសុខភាពមាត់ធ្មេញកាន់តែប្រសើរថែមទៀត ត្រូវទៅមន្ទីរពេទ្យធ្មេញរៀងរាល់ ៦ខែម្ដងឲ្យបានទៀងទាត់ ដើម្បីសម្អាតធ្មេញឲ្យបានស្អាតល្អ៕
អានបន្ត៖ ទទួលទានទឹកក្តៅឧណ្ហៗជួយទាំងសុខភាព ជួយទាំងសម្រស់