មេរៀនជីវិតសំខាន់ៗ គួរស្វែងយល់ឲ្យបានច្បាស់ មុនចូលដល់វ័យជាង ៣០ ឆ្នាំ

2019-12-26 08:40:00
ចំនួនមតិ 0 | ចំនួនចែករំលែក 0

ឈានចូលដល់ក្នុងវ័យនេះហើយ អ្នកប្រាកដជាឆ្លងកាត់រឿងរ៉ាវក្នុងជីវិតមិនតិចទេ។ ជីវិតក៏មមាញឹកជាងមុន អាចនឹងស្មុគស្មាញជាងមុន ពោរពេញដោយទំនួលខុសត្រូវ និងការចាត់ចែងទុកដាក់ជ្រើសរើសផ្លូវដើរជាក់លាក់សម្រាប់ខ្លួនឯង។ ហេតុនេះហើយ អ្នកគឺជាមនុស្សតែម្នាក់គត់ ដែលមានតួនាទី មើលថែរក្សាខ្លួនឯង ទទួលយកបទពិសោធន៍ថ្មីៗ និងរៀនសូត្របន្ថែមពីជីវិត។

ដើម្បីឲ្យការចំណាយអស់រយៈពេលប្រមាណ ៣ ទសវត្ស នៅលើភពផែនដី ប្រកបទៅដោយរលូន មិនអសារបង់ គួរដឹងមេរៀនសំខាន់ៗនិងចងចាំទុកប្រើជាប្រយោជន៍។

កុំនៅបន្តធ្វើការងារណា ដែលអាចបំពេញតែចំនួនទឹកប្រាក់ ប៉ុន្តែមិនសមស្របជាមួយនឹងគោលបំណងឬចំណង់ចំណូលចិត្តរបស់អ្នក។
រឿងអ្វីក៏ដោយ បើកើតឡើងហើយ វាតែងតែមានហេតុផលរបស់វា ដូច្នេះមិនចាំបាច់នៅបៀមទុក្ខព្រួយបារម្ភខ្លាំងពេកទេ។
ជួនកាលគួរចំណាយពេលនៅម្នាក់ឯងខ្លះក៏ល្អដែរ ព្រោះអ្នកនឹងមានឱកាសបានស្វែងយល់ពីបញ្ហានិងបរិយាកាសជុំវិញខ្លួន កាន់តែជ្រាលជ្រៅជាងមុន។

បើគិតចង់ឈប់ឬបោះបង់ចោលពាក់កណ្តាលផ្លូវ ត្រូវរំឭកប្រាប់ខ្លួនឯងឡើងវិញពីមូលហេតុដែលចាប់ផ្តើម រួមទាំងការលះបង់ទាំងកម្លាំងកាយចិត្ត នោះទើបអ្នកអាចបន្តក្តីសង្ឃឹមឆ្ពោះទោកាន់គោលដៅ ដូចអ្វីបានគ្រោងទុក។

កុំព្យាយាមរត់រកសុភមង្គល ដរាបណាអ្នកបានរៀនសូត្រស្វែងយល់ ចេះទទួលយកបទពិសោធន៍ដែលខ្លួនបានជួបប្រទះ ក្តីសុខសុភមង្គលនឹងរត់មករកអ្នកដោយឯងៗ។
ការគិតរបស់អ្នកប្រៀបបានដូចជាកញ្ចក់ឆ្លុះបញ្ចាំងពីខ្លួនឯង ដូច្នេះត្រូវរៀនគិតអ្វីឲ្យមានហេតុផលត្រឹមត្រូវ ប្រកបដោយភាពវិជ្ជមាន។
ឈប់ដើរបន្ទោសគេឯងតទៀត បើវាជាកំហុសរបស់អ្នកត្រូវហ៊ានទទួលស្គាល់ និងមានទំនួលខុសត្រូវជានិច្ច។
ក្នុងជីវិតទោះមានលុយហូរហៀរខ្លាំងយ៉ាងណា ត្រូវចាំថាអ្នកមិនអាចបញ្ជាមិនឲ្យបញ្ហាកើតឡើងបានឡើយ ដូច្នោះហើយមិនគួរបណ្តោយឲ្យខ្លួនអ្នកជាប់ផុងនឹងបញ្ហាងើបមិនរួច។

សើចឲ្យបានច្រើនជាងការធ្វើមុខក្រញេវក្រញូវ ទើបមិននាំអពមង្គលចូលក្នុងជីវិត។
ថែរក្សាសុខភាពឲ្យបានសមគួរ មិនត្រូវញ៉ាំតាមចិត្តចង់ ដោយមិនគិតពីផលប៉ះពាល់។
ធ្វើការខ្លះ លំហែកាយខ្លះ ទើបជីវិតមានន័យ។
នាវ័យខ្ទង់ ៣០ឆ្នាំនេះទៀតសោត បើអ្នកនៅលីវ ប្រាកដជាទទួលរងនូវសម្ពាធបន្តិច ដោយសារតែពេលក្រឡេកទៅមើល មិត្តភ័ក្តិ បងប្អូន រួមទាំងមនុស្សជុំវិញខ្លួន មានគូ មានកូន បង្កើតគ្រួសារអស់ទៅហើយ នៅឡើយតែខ្លួនឯង។ ទោះជាបែបនេះក្តី អ្នកពិតជាបានដឹងហើយថា ស្នេហាមិនអាចបង្ខំបានទេ កាលណាបានជួបបុរសល្អ ដែលអ្នកពេញចិត្តពិតប្រាកដ ទើបមិនបន្សល់ទុកវិប្បដិសារី នាថ្ងៃអនាគត៕