ទាល់តែមាន Password គ្នាទើបបញ្ចាក់ថាស្រឡាញ់គ្នាពិត?
- 2019-12-17 10:05:00
- ចំនួនមតិ 0 | ចំនួនចែករំលែក 0
ទាល់តែមាន Password គ្នាទើបបញ្ចាក់ថាស្រឡាញ់គ្នាពិត?
មានគូស្នេហាច្រើនណាស់ដែលពេលស្រឡាញ់គ្នា តែងមិនទុកចិត្តដៃគូរបស់ខ្លួន ហើយទាមទារស្គាល់នូវ Password ទូរសព្ទ ឬ Password ហ្វេសប៊ុកគ្នា។ ពួកគេគិតថា ការធ្វើបែបនេះគឺមានន័យថា ដៃគូរបស់ខ្លួនមានចិត្តស្មោះត្រង់នឹងខ្លួន។ តើការដែលស្គាល់ Password គ្នាពិតជាបង្ហាញថាគូស្នេហា១គូនោះស្រឡាញ់គ្នាពិតឬ?
មិនថាភាគីជាបុរស ឬ នារី ភាគច្រើនមានចិត្តចង់ស្គាល់Password របស់ដៃគូរបស់ខ្លួន ដោយគេយល់ថា ពេលស្គាល់ Password ទៅ ពួកគេអាចចូលឆែកមើលអ្វីគ្រប់យ៉ាងដែលនៅក្នុងទូរសព្ទ ឬ គណនីហ្វេសប៊ុករបស់ដៃគូខ្លួន ដោយមិនមានការលាក់បាំងនឹងគ្នា។ មិនមែនជាការគិតអវិជ្ជមានទៅលើបុគ្គលណាម្នាក់នោះទេ តែបើអ្នកពិចារណាឱ្យច្បាស់ទៅ វាមានហេតុផលច្រើនដែលការផ្លាស់ប្តូរនូវ Password គ្នានេះគឺ មិនបានបញ្ចាក់ពីការស្រឡាញ់ពិត ឬ មិនពិតអ្វីនោះទេ រួមមាន៖
- គេប្រាប់Password នោះ ព្រោះបំពេញបំណងអ្នកប៉ុណ្ណោះ ៖ សម្រាប់អ្នកគឺពេញចិត្ត តែសម្រាប់គេគឺគេមានសំពាធក៏ថាបាន។ មិនមែនឱ្យតែគេឱ្យ មានន័យថាគេពេញចិត្តនោះទេ គេអាចគ្រាន់តែឱ្យដើម្បីបំពេញការទាមទាររបស់អ្នកប៉ុណ្ណោះ។ ដូចនេះ វាមិនបានបញ្ចាក់អ្វីនោះទេ។
- គេអាចលុបរឿងរ៉ាវ ឬ អ្វីៗដែលមិនចង់ឱ្យអ្នកឃើញ៖ អ្នកអាចគិតថា ការមាន Password គេ ហាក់បីដូចមានអ្វីគ្រប់យ៉ាង ហើយ អាចដឹងរឿងទាំងអស់បាន តែអ្នកគួរដឹងថាអ្នកមិនមែននៅជាមួយគ្នា ២៤ ម៉ោងនោះទេ។ ដូចនេះ បើសិនជាគេមិនចង់ឱ្យអ្នកឃើញរឿងអ្វីនោះ គេនៅតែអាចលុបចោលបាន។
- គេអាចលាក់បាំងនូវបណ្តាញសង្គមផ្សេង ឬ នៅក្រៅតែម្តង៖ មនុស្សបើចង់កុហកឬលាក់ គេអាចរកគ្រប់វិធីធ្វើទាល់តែបាន។ ជាក់ស្តែង ឧបមាថា អ្នកមានគណនីហ្វេសប៊ុករបស់គេ ដូចនេះ បើគេពិតជាមានចិត្តចង់ធ្វើអ្វីមួយមិនឱ្យអ្នកដឹង គេអាចប្រើប្រាស់នូវបណ្តាញសង្គមផ្សេងដូច Instagram; Telegram; Viber ឬ Line ជាដើម។
ជាក់ស្តែង ក៏មិនមែនមានន័យថា អ្នកដែលឱ្យ Password គ្នាសុទ្ធតែមានគំនិតបែបនេះទេ អ្នកខ្លះគេចង់បង្ហាញតាមវិធីហ្នឹងពិតមែន។ តែហេតុផលដែលលើកឡើងគឺ ចង់បញ្ចាក់ថា បើមនុស្សម្នាក់បំរុងនឹងមានចិត្តមិនស្មោះត្រង់ គេអាចរកគ្រប់វិធីទាំងអស់ មិនមែនគ្រាន់តែរឿងស្គាល់Password ប៉ុណ្ណឹងអាចឃាត់ឃាំងចិត្តគេនោះទេ។ លើសពីនេះទៅទៀត ចង់បញ្ចាក់ថា បើដៃគូរបស់អ្នកមិនព្រមឱ្យ Password ក៏មិនមែនមានន័យថាគេមានអ្វីលាក់បាំងនោះដែរ គឺគេគ្រាន់ចង់ស្រឡាញ់គ្នាដោយមានសេរីភាពរៀងខ្លួន មិនចង់មានអារម្មណ៍ដូចគេតាមដានគ្រប់សកម្មភាពនោះទេ។
គួរចាំថា អ្នកមិនអាចចងចិត្តអ្នកដែលចង់លាក់បាននោះទេ។ កាលបើអ្នកកាន់តែតាម គេកាន់តែរកវិធីថ្មី។ ដូចនេះ បើស្រឡាញ់គ្នាពិត កុំហួងហែងខ្លាំងជ្រុល ត្រូវផ្តល់សេរីភាព និង ពេលវេលាឱ្យគ្នាឱ្យបានគ្រប់គ្រាន់ នោះជាការល្អ៕
អានបន្ត៖ គ្មាននរណាម្នាក់ចង់បែកបាក់ពីមនុស្សដែលខ្លួនស្រឡាញ់ទេ លុះត្រាតែអស់ទ្រាំ