ដាច់ខាតកុំរៀបការជាមួយបុរសដែលមានទម្លាប់១០យ៉ាងនេះ
- 2019-12-04 02:50:00
- ចំនួនមតិ 0 | ចំនួនចែករំលែក 0
ដាច់ខាតកុំរៀបការជាមួយបុរសដែលមានទម្លាប់១០យ៉ាងនេះ
ការជ្រើសរើសបុរសណាម្នាក់ជាគូជីវិត គឺជារឿងសំខាន់បំផុតសម្រាប់មនុស្សស្រីគ្រប់រូប។ អ្នកត្រូវតែសម្រេចចិត្តឲ្យបានល្អិតល្អន់ មុននឹងឈានជើងចូលក្នុងចំណងអាពាហ៍ពិពាហ៍។ ដើម្បីជៀសវាងវិប្បដិសារី ការសិក្សាស្វែងយល់ពីចំនុចអាក្រក់ៗរបស់គាត់គឺជារឿងចាំបាច់ ដែលអ្នកត្រូវតែធ្វើ។ សម្រាប់ជាគំនិតបន្ថែម ខាងក្រោមនេះជាទម្លាប់១០យ៉ាងរបស់មនុស្សប្រុសដែលចាត់ទុកថាពិបាកក្នុងការទទួលយក ដូច្នេះបើអ្នកជួបបុរសប្រភេទនេះ ការដកខ្លួនថយគឺជារឿងប្រសើរ៖
១.មិនចូលចិត្តសត្វ
មនុស្សដែលស្អប់សត្វ អាចជាមនុស្សដែលមិនសូវចេះផ្ដល់ក្ដីស្រឡាញ់ ឬអាណិតអាសូរចំពោះអ្នកដទៃ។ ដូច្នេះប្រសិនអ្នកជាមនុស្សដែលចូលចិត្តចិញ្ចឹមសត្វ វាប្រហែលជារឿងពិបាកក្នុងការរស់នៅជាមួយគ្នា។
២.មិនគោរពពាក្យសន្យា
ជាទូទៅ អ្នកណាក៏ធ្លាប់ដែរ ប៉ុន្តែបើគាត់ក្បត់ពាក្យសន្យាខ្លួនឯងញឹកញាប់ពេក វាប្រហែលជារឿងដែលពិបាកនឹងទទួលយកណាស់។
៣.មិនផ្ដល់ភាពសំខាន់ចំពោះអ្នក
គាត់មិនសូវឲ្យតម្លៃ ឬផ្ដល់អាទិភាពចំពោះវត្តមានអ្នក។ ក្នុងសម្ពន្ធភាព ដែលដៃគូណាម្នាក់ទទួលបានក្ដីស្រឡាញ់តិចជាងគ្នាពេក ប្រាកដជាមិនអាចបន្តទៅមុនបានយូរអង្វែងនោះទេ។
**៤.គិតថាខ្លួនត្រូវគ្រប់ពេល**
មនុស្សប្រុសដែលអាត្មានិយម រឹងរូស គិតថាខ្លួនល្អគ្រប់ដប់ ត្រូវគ្រប់ពេល ដោយមិនខ្វល់ពីគំនិត យោបល់អ្នក មិនមែនជាជម្រើសដ៏ប្រពៃសម្រាប់អ្នកឡើយ។
៥.លេសដោះសាមិនឈប់
នៅពេលដែលគាត់តែងតែប្រើលេស ឬពាក្យដោះសាដើម្បីគេចវេសធ្វើរឿងផ្សេងៗមិនឲ្យអ្នកដឹង មានន័យថាគាត់មានរឿងសំខាន់ជាច្រើន ដែលចាំបាច់ជាងអ្នក។
៦.មិនខ្វល់ខ្វាយជាមួយជម្លោះ
គូស្នេហ៍ណាក៏ឈ្លោះគ្នាដែរ ប៉ុន្តែបើរាល់ពេលឈ្លោះគ្នា គាត់មិនដែលខ្វល់ចង់ដោះស្រាយឲ្យបានឆាប់ ឬទុកឲ្យអ្នកសម្រុះសម្រួលគ្រប់ពេល មានន័យថាគាត់មិនបានស្រឡាញ់អ្នកគ្រប់គ្រាន់ទេ។
៧.កុហក
ភាពស្មោះត្រង់គឺសំខាន់ណាស់ក្នុងរឿងស្នេហា។ កុហកច្រើនដងពេក ជាពិសេសរឿងសំខាន់ៗ តើអ្នកគិតថាអ្នកអាចលើកលែងទោសឲ្យគាត់បានពេញមួយជីវិតទេ?
៨.គ្មានម្ចាស់ការលើខ្លួនឯង
គាត់គ្មានភាពឯករាជ្យ តែងតែពឹងផ្អែកលើអ្នកច្រើនគ្រប់រឿង។ យូរៗទៅអ្នកប្រាកដជាមានអារម្មណ៍ហត់នឿយជាក់ជាមិនខាន។
៩.មិនសូវចាស់ទុំ
មនុស្សប្រុសដែលមានចរិតមិនសូវចាស់ទុំ ឧស្សាហ៍ជះកំហឹង ពូកែរករឿងដូចកូនក្មេង ដូច្នេះអ្នកប្រាកដជាត្រូវជួបរឿងរកាំរកូស ឈឺក្បាលមិនចេះចង់បើរៀបការជាមួយគាត់។
១០.ប្រើអំពើហិង្សា
វាជាទង្វើដែលមិនអាចទទួលយកបានសោះ ទោះក្នុងកាលៈទេសៈណាក៏ដោយ។ រៀបការជាមួយបុរសប្រភេទនេះ គឺដូចជាធ្លាក់នរកទាំងរស់អ៊ីចឹង៕