ហេតុផល៥យ៉ាង ដែលអ្នកតែងគេងមិនលក់នៅពាក់កណ្ដាលយប់

2019-11-20 10:20:00
ចំនួនមតិ 0 | ចំនួនចែករំលែក 0

តើអ្នកកំពុងមានបញ្ហាជាមួយដំណេកមែនទេ? រៀងរាល់យប់ គេងមិនសូវស្កប់ ប្រែខ្លួនចុះឡើងញឹកញាប់ ហើយឧស្សាហ៍ភ្ញាក់ដឹងខ្លួននៅកណ្ដាលអធ្រាត្រ ពិតជារឿងរំខានខ្លាំងណាស់។ ដូច្នេះដំបូងអ្នកត្រូវដឹងឫសគល់នៃបញ្ហាឲ្យច្បាស់ មុននឹងឈានទៅរកដំណោះស្រាយ។ ខាងក្រោមនេះជាហេតុផលសាមញ្ញ៥យ៉ាង ដែលអាចជាតម្រុយល្អៗសម្រាប់អ្នកក្នុងការពិចារណាជុំវិញបញ្ហានេះ៖

រូបតំណាង

**១. ឥទ្ធិពលនៃជាតិកាហ្វេអ៊ីន**

ជាទូទៅជាតិកាហ្វេអ៊ីន ជួយឲ្យអ្នកស្វាង មិនងងុយគេង មានប្រយោជន៍សម្រាប់ការផ្ចង់អារម្មណ៍ធ្វើការ។ ប៉ុន្តែការផឹកកាហ្វេនៅពេលរសៀល ពិតជាជះឥទ្ធិពលដល់ដំណេករបស់អ្នកនៅពេលយប់ ដូច្នេះអ្នកគួរតែកែទម្លាប់ ព្យាយាមបន្ថយ ឬកុំផឹកក្រោយបាយថ្ងៃត្រង់ដាច់ខាត។

រូបតំណាង

២. គ្រឿងស្រវឹង

គ្រឿងស្រវឹងអាចឲ្យអ្នកគេងលក់ស្រួលមួយសន្ទុះ ប៉ុន្តែអ្នកប្រហែលជាត្រូវភ្ញាក់ពាក់កណ្ដាលយប់ រួចបញ្ឈរភ្នែកទល់ភ្លឺ។ ព្រឹកឡើង អ្នកក៏ត្រូវប្រឈមជាមួយអារម្មណ៍អស់កម្លាំងល្ហិតល្ហៃទៀត។ ជំនួសមកវិញ អ្នកគួរជ្រើសរើស តែសុខភាព ឬទឹកដោះគោក្ដៅវិញ ទើបជារឿងប្រសើរ។

៣. កន្លែងគេង

មនុស្សម្នាក់ៗចំណាយពេលប្រហែលមួយភាគបីក្នុងជីវិតសម្រាប់ការគេង ដូច្នេះអ្នកត្រូវយកចិត្តទុកដាក់ចំពោះពូក ខ្នើយ ភួយដែលអ្នកប្រើប្រាស់រាល់យប់។ អ្នកត្រូវឧស្សាហ៍ផ្លាស់ប្ដូរកម្រាល ឬជ្រើសរើសរបស់ល្អ ផ្ដល់ផាសុកភាពខ្ពស់ ជួយឲ្យអ្នកគេងលក់ស្រួល ទោះជាត្រូវចំណាយប្រាក់ច្រើនបន្តិចក៏ដោយ។

៤. បរិយាកាសជុំវិញ

ការរៀបចំបន្ទប់គេងឲ្យស្អាត សមជាកន្លែងគេងពិតជារឿងប្រពៃណាស់។ មួយវិញទៀត អ្នកត្រូវប្រាកដថារាល់យប់ គ្មានសំឡេង ឬពន្លឺរំខានពេលអ្នកគេងឡើយ។ កន្លែងកាន់តែងងឹត ការគេងកាន់តែស្កប់ល្អ ដូច្នេះទម្លាប់បើកភ្លើងពេលរាត្រីគួរតែត្រូវបានបញ្ឈប់។

រូបតំណាង

៥. វាអាចជាជំងឺ

ការគេងមិនលក់ ឧស្សាហ៍ភ្ញាក់ក៏ជាជំងឺដែលអ្នកមិនគួរមើលរំលងដែរ ព្រោះវាប៉ះពាល់យ៉ាងខ្លាំងដល់សុខភាពរបស់អ្នក។ ជាក់ស្ដែង មនុស្សដែលគេងមិនគ្រប់គ្រាន់ សមិទ្ធផលនៃការសម្រេចការងារក៏ធ្លាក់ចុះដូចគ្នា។ ហេតុនេះអ្នកត្រូវប្រញាប់ រួសរាន់ទៅជួបគ្រូពេទ្យដើម្បីព្យាបាលជំងឺនេះឲ្យទាន់ពេលវេលា ៕

ប្រភព៖ popsugar ប្រែសម្រួល៖ អូន បញ្ញា