វេរលុយឲ្យមិត្តស្រីអនឡាញ១ម៉ឺន៥ពាន់ដុល្លារ ដល់ជួបខាងក្រៅ បុរសម្នាក់ស្ដាយក្រោយលែងទាន់

2019-11-15 06:10:00
ចំនួនមតិ 0 | ចំនួនចែករំលែក 0

ជ្រុលដាក់ចិត្តស្រលាញ់ស្រីស្រស់ម្នាក់តាមរយៈបណ្ដាញអ៊ីនធឺណិត បុរសម្នាក់បានស្ម័គ្រចិត្តផ្ញើរលុយឲ្យនាងជាច្រើនលើកច្រើនសារ ដោយទទួលមកវិញត្រឹមការបោកប្រាស់។

អាចនិយាយបានថា ស្រលាញ់គ្នាតាមអនឡាញនៅសម័យនេះគឺជាល្បែងមួយដ៏ប្រថុយបំផុត ដ្បិតបើឈ្នះ អ្នកនឹងទទួលបានស្នេហាដែលខ្លួនកំពុងប៉ងចង់បាន តែបើចាញ់វិញ មិនត្រឹមតែបាត់បង់ភាពទុកចិត្តនោះទេ ពេលខ្លះអាចឈានដល់បញ្ហាហិរញ្ញវត្ថុក៏មាន។

ជាក់ស្ដែង បុរសម្នាក់មកពីប្រទេសចិន កំពុងទទួលបានការចាប់អារម្មណ៍យ៉ាងខ្លាំងក្រោយពេលចែករំលែកពីបទពិសោធន៍ដ៏ជូរចត់របស់ខ្លួននៅពេលស្រលាញ់នារីម្នាក់តាមបណ្ដាញសង្គម។

តាមនោះដែរ នារីដែលជាសង្សារខាងលើ ដែលទទួលស្គាល់ខ្លួនឯងថា សម្រស់បានពិន្ទុ៨លើ១០នោះ បានបង្ហោះសារស្វែងរកមិត្តប្រុសខ្លួនក្រោយពេលថ្ងៃណាត់ជួបលើកដំបូងរបស់ខ្លួន ខាងប្រុសមិនបង្ហាញមុខ។ នៅពេលឃើញសារនេះ ទស្សនិកជនជាច្រើនបានលួងលោមស្រីស្អាតនេះថា ប្រហែលមកពីខាងប្រុសរវល់បន្ទាន់ទើបមិនបានមក ឬមានធុរៈជាដើម។ យ៉ាងណាក្ដី ក្រោយបាត់មុខអស់មួយថ្ងៃគត់ ខាងប្រុសបានចេញមុខ លាតត្រដាងពីការពិតនៃមិត្តស្រីអនឡាញរបស់ខ្លួន។

ការពិតទៅ នៅថ្ងៃណាត់នោះ លោកបានឡើងយន្តហោះ ហើយមកជួបនាងរួចទៅហើយ ប៉ុន្តែនៅពេលកំពុងចាំសង្សាររបស់ខ្លួន លោកក៏ឃើញនារីមានរាងធាត់ម្នាក់ ពាក់ស្បែកជើងដែលលោកទិញឲ្យ កំពុងឈរចាំមនុស្សដូចលោកដែរ។ ក្រោយពេលតាមដានមួយសន្ទុះ ទើបលោកដឹងថា នាងគឺជាសង្សារអនឡាញរបស់លោក។ អ្វីដែលគួរឲ្យចាប់អារម្មណ៍នោះ នាងនៅខាងក្រៅ និងអនឡាញប្រៀបដូចមនុស្ស២នាក់ផ្សេងគ្នា ដែលធ្វើឲ្យលោកខកចិត្តមិនស្ទើរ។

លោកក៏បានបន្ថែមថា ដោយសារតែស្រលាញ់នាង លោកបានផ្ញើរលុយឲ្យនាងជាញឹកញាប់ ដោយសរុបគឺប្រមាណ១ម៉ឺន៥ពាន់ដុល្លារហើយ។ ដើមឡើយ លោកក៏មិនចង់ហែកហួងរឿងខ្លួនឯងឲ្យគេដឹងដែរ តែដោយសារតែខ្លាចអ្នកក្រោយ ត្រូវបោកដូចខ្លួនទៀត ទើបលោកកាត់កេរ្តិ៍កាត់ខ្មាសរឿងខ្លួនអស់លុយជាច្រើន លើមនុស្សស្រីម្នាក់ដែលពូកែកាត់តរូបទៅវិញ។ លោកសង្ឃឹមថា អ្នកដទៃនឹងមិនឆោតដូចជាលោកទៀតទេ៕