និយាយលេងធម្មតាបាន ប៉ុន្តែមិនគួររាប់អានជិតស្និទ្ធជាមួយមនុស្ស ៥ ប្រភេទនេះ

2019-10-31 03:00:00
ចំនួនមតិ 0 | ចំនួនចែករំលែក 0

មានមនុស្សមិនតិចប្រភេទ ដែលទៅមកឆ្លងកាត់ចុះឡើង នៅក្នុងជីវិតរបស់អ្នក។ អ្នកខ្លះចូលមកជាមួយនឹងក្តីសង្ឃឹម ការលើកទឹកចិត្ត ធ្វើឱ្យសប្បាយរីករាយ ប៉ុន្តែអ្នកខ្លះវិញ ហ៊ានតែរាប់អានមិនប្រុងប្រយ័ត្ន ច្បាស់ជានៅចាំចាក់ពីក្រោយខ្នងមិនខាន។ មុនសម្រេចចិត្តទៅជិតស្និទ្ធជាមួយនឹងនរណាម្នាក់ត្រូវសង្កេតមើលឱ្យបានជាក់លាក់សិន។ បើជួបមនុស្ស ៥ ប្រភេទនេះ គ្រាន់តែនិយាយលេងធម្មតាបានហើយ តែកុំជិតស្និទ្ធពេក ជៀសកាន់តែឆ្ងាយកាន់តែល្អ។

១. មនុស្សខ្ជិលច្រអូស

រូបតំណាង

មនុស្សដែលវៃឆ្លាត ឧស្សាហ៍ព្យាយាមច្បាស់ជាមិនអាចយល់ពីហេតុផលដែលត្រូវខ្ជិល ព្រោះពួកគេមានគោលដៅ និងការតាំងចិត្តពិតប្រាកដនៅក្នុងជីវិត មិនបោះបង់ចោលងាយៗ។ ពួកគេដឹងច្បាស់ថា បើរាប់អានប៉ះចំមនុស្សខ្ជិលអូសគូថមិនរួច វាអាចនឹងនាំឲ្យគេខ្ជិលតាម។ ហេតុនេះហើយទើបបានជាគេចូលចិត្តរាប់អានតែនរណា ដែលអាចផ្តល់កម្លាំងចិត្តនិងមានគោលបំណងដូចគ្នា។

២. មនុស្សមិនចេះគិតពិចារណាវែងឆ្ងាយ

មនុស្សប្រភេទនេះ ចូលចិត្តតែជជែកពីរឿងណាដែលមិនសំខាន់ និយាយដើមគេ ដែលគ្មានហុចផលប្រយោជន៍អីមកវិញបន្តិចសោះ។ ពួកគេតាំងខ្លួនជាមនុស្សឆ្លាតលើសគេ ដឹងគ្រប់រឿងទាំងអស់ ទោះវាមិនមែនជាការពិតក៏ដោយ។ មនុស្សបែបនេះ មិនគួរខ្ជះខ្ជាយពេលវេលា កម្លាំងថាមពល ទៅពាក់ព័ន្ធជាមួយ។

រូបតំណាង

៣. មនុស្សដែលសប្បាយមិនខ្វល់ពីអ្វីទាំងអស់

សម្រាប់មនុស្សប្រភេទនេះវិញ យល់ថាកើតមកជីវិតមានតែមួយ ត្រូវតែសប្បាយក្អាកក្អាយឲ្យអស់ដៃ។ អត្ថន័យនៃជីវិតរបស់ពួកគេ គឺការជប់លៀងស៊ីផឹក ដើរលេង ដោយមិនគិតខ្វល់ខ្វាយពីអ្វីទាំងអស់។ ពួកគេមិនអាចបែងចែកពេលវេលាសប្បាយរីករាយនិងសាច់ការ ឲ្យដាច់ស្រឡះពីគ្នា និងមិនចេះរៀបចំជីវិតឲ្យបានល្អ។

៤. មនុស្សអួត

យកអ្វីមកឃាំងក៏មិនអាចទៅរួចដែរ ព្រោះពួកគេមិនអាចបញ្ឈប់ការបង្អួតគ្នាបានឡើយ ព្រោះចង់ឱ្យគេឯងមើលមកអស្ចារ្យ តែធាតុពិតវាជាការខ្វះទំនុកចិត្តទៅវិញទេ។ ត្រូវចាំថា មនុស្សដែលព្យាយាមអួតពីអ្វីមួយ ដោយសារតែពួកគេខ្វះខាតត្រង់ចំណុចនោះ មានតែពាក្យបំផ្លើសទើបអាចជួយបាន។

រូបតំណាង

៥. មនុស្សមើលស្រាល

មនុស្សប្រភេទនេះក៏មិនគួរយកខ្លួនបៀតដែរ។ ក្នុងខួរក្បាលផ្ទុកទៅដោយគំនិតអវិជ្ជមាន គ្មានវិធីជំរុញទឹកចិត្តហើយ ថែមទាំងគិតថាអ្នកមិនអាចធ្វើអ្វីបានទៀត។ ការគិតរាក់ ភ្នែកសម្លឹងឃើញតែផ្លូវទាល់ មិនទូលំទូលាយ ប្រៀបបានដូចជារនាំងហាមឃាត់អ្នកមិនឲ្យឈានទៅដល់គោលដៅដែលខ្លួនប៉ងប្រាថ្នា។ បើជៀសបានគួរជៀសឱ្យឆ្ងាយ ទុកយូរនាំតែឆ្លងមេរោគចង្អៀតចិត្តតាម៕