បើគេជាស្រីស្អាត ហើយបានប្តីអ្នកមាន ហេតុអ្វីយើងត្រូវទៅនិយាយរិះគន់ទើសគេធ្វើអី?
- 2019-10-09 08:15:00
- ចំនួនមតិ 0 | ចំនួនចែករំលែក 0
បើគេជាស្រីស្អាត ហើយបានប្តីអ្នកមាន ហេតុអ្វីយើងត្រូវទៅនិយាយរិះគន់ទើសគេធ្វើអី?
មិនមែនមនុស្សស្រីដែលស្អាតទាំងអស់ សុទ្ធតែអាចរៀបការជាមួយបុរសអ្នកមានឡើយ។ បើទោះជានាងបានប្តីអ្នកមានពិតមែន ក៏មិនមែនបញ្ជាក់ថា នាងសម្លឹងឃើញលុយតែមួយមុខដែរ។ វាជាជម្រើសផ្ទាល់ខ្លួនរបស់មនុស្សម្នាក់ៗ ចុះហេតុអ្វីមនុស្សមួយចំនួនចូលចិត្តទៅនិយាយរិះគន់ ចោទថាគេលក់សម្រស់ ហើយឆាប់វាយតម្លៃគេខ្លាំងម្ល៉េះ?
ហេតុផលគឺដោយសារតែក្នុងជីវិតរស់នៅប្រចាំថ្ងៃ គ្មាននរណាអាចជៀសផុត ពីប្រភេទមនុស្ស ដែលនៅចាំមើលតាមដាន មិនរីករាយ ពេលឃើញអ្នកសប្បាយចិត្តនិងមានទ្រព្យសម្បត្តិហូរហៀរច្រើនជាងលើសលប់។ ហេតុនេះហើយ ពួកគេនៅមិនសុខ ត្រូវតែរកវិធីលាបពណ៌ ដើម្បីមានឱកាសមើលងាយបន្ទាបតម្លៃរបស់អ្នក។
នៅពេលនារីមានរូបសម្ផស្សស្រស់ស្អាត រៀបការជាមួយអ្នកមាន ភាគច្រើនតែងលេចឮគេឯងនិយាយថា វាមិនមែនជាស្នេហ៍ពិត។ បើរៀបការជាមួយអ្នកក្រ ឬមិនសូវមានទ្រព្យ ទើបជាស្នេហាស្មោះស្ម័គ្រ។ ពួកគេយល់ថា ប្តីអ្នកមានគង់មានថ្ងៃធ្វើឲ្យប្រពន្ធឈឺចាប់ ទឹកភ្នែក ដោយសារអំណាចទឹកប្រាក់។ ទោះបីជាគូស្នេហ៍រៀបការត្រឹមត្រូវតាមផ្លូវច្បាប់ ស្រលាញ់គ្នាខ្លាំងយ៉ាងណា ក៏នៅមានគេវាយតម្លៃមិនល្អ។
អ្នកខ្លះមានមាត់ចេះតែនិយាយ ហើយភ្លេចវិនិច្ឆ័យឲ្យបានច្បាស់លាស់។ បានប្តីអ្នកក្រ មិនមែនសុទ្ធតែមានន័យថា អាចធ្វើឲ្យអ្នកមានសុភមង្គលបានរៀងរហូតឡើយ ហើយប្តីអ្នកមានក៏មិនមែនសុទ្ធតែធ្វើឲ្យអ្នកឈឺចាប់ទាំងអស់ដែរ។ គ្មាននរណាអាចទាយដឹងមុនទេ ព្រោះជីវិតត្រូវតែដើរដល់ចំណុចទុក្ខសោក ឈឺចាប់នៅពេលណាមួយ។
ក្នុងចំណោមបុរសអ្នកមានភាគច្រើន តែចង់ជ្រើសរើសប្រពន្ធដែលមានរូបសម្បត្តិស្រស់សោភា។ ទន្ទឹមគ្នានេះដែរ ចរិយាសម្បត្តិក៏ជាផ្នែកមួយ ដែលបុរសមិនដែលមើលរំលង។ គាត់ត្រូវការនារីដែលចេះយល់ចិត្ត អាចផ្តល់ក្តីស្រលាញ់សុភមង្គល និងមិនទាមទារការផ្គាប់ផ្គុនលើសលប់ពីគាត់។
មនុស្សស្រីកើតមកស្អាតស្រាប់ ជាអំណោយផលធម្មជាតិ ដែលអាចចាត់ទុកជាថាមពលមួយរបស់នាង។ ហេតុនេះហើយ បើឃើញនាងរៀបការជាមួយអ្នកមាន ហើយទទួលបានសុភមង្គល គួរចូលរួមត្រេកអរទៅ កុំរិះគន់គេអី។ ដូចពាក្យមួយឃ្លាពោលថា "ស៊ូអង្គុយយំនៅក្នុងឡានទំនើប ប្រសើរជាងអង្គុយយំលើកង់កញ្ចាស់"៕
ចុចអានបន្ត៖ កំហុសឆ្គងដ៏ធំរបស់មនុស្សស្រីពេលដាក់ចិត្តស្រលាញ់នរណាម្នាក់ ខ្លាំងពេក