ពីក្រោយជោគជ័យអ្នកណាក៏ធ្លាប់ឆ្លងកាត់លំបាកដែរ កុំឃើញគេសើចហើយគិតថាខ្លួនឯងជួបតែទុក្ខ

2019-09-12 09:30:00
ចំនួនមតិ 0 | ចំនួនចែករំលែក 0

មនុស្សតែងតែមានចំណុចដែលមិនពេញចិត្តខ្លួនឯង តែងតែប្រៀបធៀបខ្លួនឯងទៅនឹងមនុស្សដទៃ មិនដែលគ្រប់គ្រាន់ជាមួយខ្លួនឯងឡើយ។ ដោយមានពេលខ្លះ ស្ទើរតែបោះបង់ខ្លួនឯងពេលបាក់ទឹកចិត្តម្តងៗទៀតផង ព្រោះយើងបានបំភ្លេចគ្រប់យ៉ាងដែលយើងខំតស៊ូមក គ្រប់យ៉ាងដែលបានព្យាយាម ដើម្បីបានថ្ងៃនេះ។

ក្រឡេកមើលទៅក្រោយបន្តិចវិញ អ្នកខ្លះបាត់បង់ច្រើនជាងយើង លះបង់ជាងយើង ចំណាយពេលច្រើនជាងយើង ខិតខំច្រើនជាងយើង ប៉ុន្តែអ្នកមានទៅសួរគេដែរទេ ថាតើគេជោគជ័យគ្រប់សព្វដែរទេ? ចម្លើយគឺ មិនប្រាកដទេ គ្រប់យ៉ាងយើងមិនអាចទាយទុកនោះទេ ប៉ុន្តែពួកគេនៅតែតស៊ូធ្វើទោះបីជាមិនអាចសមបំណងទាំងស្រុងក៏ដោយ។ មានមនុស្សជាច្រើនដែលស្រលាញ់យើង ចង់បានជីវិតដូចយើង ទោះបីជាពួកគេមិនបានដឹងថា ជីវិតយើងបានឆ្លងកាត់អ្វីខ្លះក៏ដោយ ពួកគេដឹងត្រឹមជោគជ័យដែលយើងមានប៉ុណ្ណោះ ប៉ុន្តែសួរថាយើងជាម្ចាស់ខ្លួនរាល់ថ្ងៃនេះ ស្រលាញ់ខ្លួនឯងគ្រប់គ្រាន់ហើយឬនៅ?

ជារឿងធម្មតាទៅហើយ ដែលមនុស្សច្រើនតែទាមទារចង់បានលទ្ធផលដែល ឥតខ្ចោះ ប៉ុន្តែពេលរឿងទាំងនោះមិនល្អដូចរំពឹងទុក ពួកគេក៏ចង់បោះបង់គ្រប់យ៉ាង ពេលខ្លះក៏បោះបង់សូម្បីជីវិត។ បែបណាក៏ដោយ ជីវិតមនុស្សមានតម្លៃណាស់ ទុក្ខសោកមិននៅជាមួយយើងរហូតទេ ចំពោះរឿងខ្លះ បើអាចប្រលែងបាន ក៏រៀនប្រលែងដៃខ្លះទៅ ជីវិតមនុស្សម្នាក់ៗមិនដូចគ្នាទេ សុខទុក្ខក៏មិនដូចគ្នាដែរ បើអ្នកពេញចិត្តនឹងធ្វើអ្វី ក៏តាំងចិត្តធ្វើវាចុះ វាជាក្តីស្រមៃយើង មិនគួរទម្លាក់គ្រប់យ៉ាងដោយសារតែឧបសគ្គខ្លះនោះទេ៕