ក្បាច់ម៉ាស្សា ៤ ជួយបង្កើតខូឡាជែននិងធ្វើឱ្យស្បែកមុខតឹងណែនក្មេងស្អាត

  • 2019-09-03 04:00:00
  • ចំនួនមតិ 8 | ចំនួនចែករំលែក 288

វ័យ​កាន់​តែ​កើន​ឡើង បញ្ហា​ស្បែក​ជ្រីវជ្រួញ​មិន​ស្រស់​ថ្លា ​មាន​ស្នាម​ខ្មៅ​ឬ​ដក់​ក្រោម​ភ្នែក​ នឹង​​កើត​មាន​ចំពោះ​មនុស្ស​គ្រប់​រូប។ នេះ​ដោយ​សារ​តែ ស្បែក​បាន​បាត់​បង់​ខូឡាជែន​ពី​មួយ​​ថ្ងៃ​ទៅ​មួយ​ថ្ងៃ។ បណ្តោយ​យូរ​ទៀត​មិន​បាន​ទេ គួរ​រក​វិធី​ការពារ​ឲ្យ​ហើយ ដោយ​គ្រាន់​តែ​ចេះ​ ក្បាច់​ម៉ាស្សា​ងាយៗ​ នោះ​​ស្នាម​ជ្រួញ​នឹង​មិន​ងាយ​លេច​ចេញ​មក​។ ជាពិសេស​​វា​អាច​ជួយ​ធ្វើ​ឱ្យ​ស្បែក​តឹង​ណែន និង​អាច​ជួយ​ជំរុញ​​នៃ​ការ​​ផលិត​ខូឡាជែន​ផង​ដែរ​។

មុន​នឹង​ធ្វើ​ការ​ម៉ាស្សា​អ្នក​អាច​ប្រើ​ប្រេង​ឬ​ឡេ​លាប​មុខ​ បន្ទាប់​ពី​​លាង​មុខ​​ស្អាត​ហើយ។

ក្បាច់​ទី​១​៖ ម៉ាស្សា​ផ្នែក​រង្វង់​ភ្នែក

យក​ម្រាម​ដៃ​ចង្អុល​ទៅ​ចុច​ត្រង់​​កៀន​ខ្ទង់​ច្រមុះ​ខាង​​លើ​ទាំង​សង​ខាង​ បន្ទាប់​មក​ធ្វើ​ការ​ម៉ាស្សា​​ថ្នមៗ ដោយ​ទាញ​ចេញ​ទៅ​ខាង​ក្រៅ​ជា​រង្វង់​ៗ​ ដើម្បី​ជួយ​ឲ្យ​ភ្នែក​មើល​ទៅ​ស្រស់​ថ្លា មិន​ហើម មិន​នឿយ​ហត់ និង​ជួយ​សម្រួល​ដល់​ចលនា​ភ្នែក​ទៀត​ផង​ ពិសេស​​សម្រាប់​អ្នក​ដែល​ធ្វើ​ការ​សម្លឹង​មើល​កុំព្យូទ័រ​យូរ​ម៉ោង។

ក្បាច់​ទី​២៖ ម៉ាស្សា​ផ្នែក​សៀត​ផ្កា

ត្រូវ​បិទ​ភ្នែក ហើយ​​ប្រើ​​ម្រាម​ដៃ​ដើម្បី​ញី​ម៉ាស្សា​ថ្នម​ៗ ត្រង់​បរិវេណ​សៀត​ផ្កា​ទាំង​សង​ខាង​។ បន្ទាប់​មក ប្រើ​ម្រាម​ដៃ​ចង្អុល​ដើម្បី​ចុច​​និង​អូស​បង្ហូត​​ចុះ​មក​ក្រោម​រហូត​ដល់​ចង្កា។

ក្បាច់​ទី​៣៖ ម៉ាស្សា​ផ្នែក​​​ក្រោម​ថ្ពាល់

​ក្បាច់​នេះ​អាច​ជួយ​ទប់​ស្កាត់​មិន​ឲ្យ​ស្បែក​មុខ​យារ​ធ្លាក់ និង​​តឹង​ណែន​ស្អាត​។ ដំបូង​គ្រាន់​​តែលាប​ឡេ​ឬ​គ្រីម​​លើ​មុខ បន្ទាប់​មក​​យក​ម្រាម​ដៃ​ម៉ាស្សា​ថ្នមៗ​ជា​រង្វង់​ៗ នោះ​ស្បែក​របស់​អ្នក​នឹង​អាច​ស្រូប​យក​សារធាតុ​ល្អ​ៗ​ពី​ផលិតផល​ដែល​បាន​ប្រើ​ប្រាស់ ជួយ​រំលាយ​ខ្លាញ់​​​ធាត់​នៅ​​​លើ​មុខ មិន​ងាយ​ចាស់​។

ក្បាច់​ទី​៤​៖ ម៉ាស្សា​ផ្នែក​ចង្កា

ក្បាច់​នេះ​មាន​នាទី​ ជួយបន្តឹង​ចង្កា​មិន​ឲ្យ​ឆាប់​ជ្រួញ​និង​យារ​ធ្លាក់​។ អ្នក​ត្រូវ​យក​ម្រាម​ដៃ​មេ ដាក់​លើ​គ្នា​ហើយ​សង្កត់​ចំ​​កណ្តាល​ចង្កា​និង​ធ្វើ​ការ​ម៉ាស្សា​ជា​រង្វង់​ៗ​ ជា​ការ​ស្រេច​។

ដើម្បី​ទទួល​បាន​ប្រសិទ្ធភាព អ្នក​អាច​ធ្វើ​​២-៣​ដង​ ក្នុង​មួយ​សប្តាហ៍ ​ឬ​​បើ​បាន​ធ្វើ​រាល់​ថ្ងៃ​កាន់​តែ​ល្អ៕​​

ចុចអានបន្ត៖ ស្អាតប្លែកទាំងសក់វែងនិងខ្លី ជាមួយនឹងម៉ូដមូរចុងតិចៗ

ប្រភព៖ akerufeed ប្រែ​សម្រួល៖ សរ សុគន្ធី

អត្ថបទថ្មី