បើចិត្តហត់នឿយហើយសម្រាកទៅ បើបេះដូងកំពុងឈឺខ្លាំងក៏ត្រូវដោះលែងទៅ
- 2019-09-02 08:20:00
- ចំនួនមតិ 0 | ចំនួនចែករំលែក 0
បើចិត្តហត់នឿយហើយសម្រាកទៅ បើបេះដូងកំពុងឈឺខ្លាំងក៏ត្រូវដោះលែងទៅ
មានពេលខ្លះ យើងដឹងថាហេតុផលដែលមនុស្សមើលទៅដូចធុញៗដោយសារគេគិតច្រើនខ្លាំងពេក។ ផ្លូវចិត្តចាប់ផ្ដើមរងឥទ្ធិពល ហើយជ្រាបដល់សុខភាពរាងកាយនិងផ្លូវចិត្ត។ តាមនោះដែរ មនុស្សម្នាក់ៗជួនកាលធុញដោយសារតែរឿងរបស់អ្នកដទៃ ខ្លះទៀតដោយសារតែពួកគេបង្កើតឡើងដោយខ្លួនឯង។ ភាពស្មុគស្មាញទាំងនេះអាចរត់ចូលមករកអ្នកបានឬអត់ អាស្រ័យថាតើអ្នកយល់ព្រមឬទាត់វាចេញ?
ថ្វីដ្បិតជីវិតរបស់មនុស្សម្នាក់ៗពោរពេញដោយទុក្ខសោក និងការលំបាកខុសៗគ្នា តែបើអ្នកចង់រស់នៅដោយគ្មានការធុញទ្រាន់ ពេលខ្លះទទួលស្គាល់ថាវាពិតជាពិបាកបន្តិចហើយ។ ប៉ុន្តែទោះយ៉ាងណា វានូវតែមានច្រកចេញជានិច្ច។
ឆាកជីវិតមនុស្សយើងមិនខុសពីផ្លូវថ្នល់នោះទេ វាតែងតែមានអ្នកដំណើរឆ្លងកាត់ រហូតពេលខ្លះច្រឡំចង់ជិះរថភ្លើងតែទៅរកកំពង់ផែក៏មាន។ យ៉ាងណាក៏ដោយ គ្រប់កន្លែងសុទ្ធតែមានកន្លែងផ្អាកមួយៗ ដែលមនុស្សបានជួបប្រទះគឺប្រហែលជាអ្នកដើរឆ្លងកាត់។
ចិត្តអ្នកអស់កម្លាំងដោយសារប្រឹងខ្វល់លើរឿងដែលមិនចង់បោះបង់ចោល។ ប្រាកដណាស់ ពេញមួយជីវិតរបស់យើងអ្នកណាដែលថាគ្មានអនុស្សាវរីយ៍នោះ? វាច្បាស់ជាមានរឿងរ៉ាវបង្កប់ច្រើន ដែលខ្លះប្រឹងឱបក្រសោបទាំងឈឺចាប់មិនលែង។ តែពេលខ្លះ ការព្រមបោះបង់ចោល គឺជាកំណប់ទ្រព្យមហាសាល។
យ៉ាងណាក្ដី ទោះខួរក្បាលអ្នកល្អខ្លាំងក៏ដោយ ក៏រឿងខ្លះមិនគួរចងចាំទាំងអស់ពេកដែរ។ អ្នកត្រូវរៀនបំភ្លេចរឿងណាដែលគួរបំភ្លេចបាន ហើយចងចាំរឿងណាដែលគួរចងចាំទៅបានហើយ។ ជីវិតពិតគឺបែបនេះ មានបញ្ហាជាច្រើនត្រូវប្រឈម។ មានពេលខ្លះ អ្នកចង់រស់ដោយសប្បាយរីករាយនិងមិនខ្វល់ច្រើន តែអ្នកជិតខាងរបស់អ្នកបង្កបញ្ហា ជះសំឡេងលឺៗធ្វើឲ្យប៉ះពាល់អារម្មណ៍អ្នកខ្លាំងតែម្ដង។ ប៉ុន្តែយ៉ាងណាក៏ដោយ ជីវិតរបស់មនុស្សម្នាក់ៗ ត្រូវផ្ទុកនូវពាក្យពីរម៉ាត់ថា បំភ្លេច។
ពេលវេលាដើរលឿនណាស់ ដូច្នេះដល់ពេលណាមួយច្បាស់ជារឿងអាក្រក់នឹងរសាត់ចេញ ជំនួសមកនូវរឿងល្អជាមិនខាន។ អ្នកប្រាកដជាធ្លាប់លឺហើយនូវឃ្លាថា ពេលវេលាជាឱសថព្យាបាលរបួសផ្លូវចិត្តឲ្យជាសះស្បើយ។ ម្ល៉ោះហើយ បើចិត្តអ្នករងទុក្ខខ្លាំង សម្រាកឲ្យយូរសិនក៏បាន មុខអ្នករលោងស្រាប់ហើយមិនចាំបាច់បន្ថែមទឹកភ្នែកច្រើនដងលើថ្ពាល់ឲ្យសើមនោះឡើយ។ រៀនបោះបង់ រៀនបំភ្លេចចោល ជីវិតអ្នកនឹងធូរស្រាលជាងមុន៕
ចុចអាន៖ ៤ សំណួរជួយឲ្យអ្នកស្គាល់ខ្លួនឯងកាន់តែច្បាស់ លែងរសាត់អណ្តែតតទៅទៀត