អាហារ ៩ប្រភេទជួយធ្វើឲ្យប្រព័ន្ធភាពស៊ាំអ្នកកាន់តែរឹងមាំ សុខភាពល្អ

2019-09-02 02:20:00
ចំនួនមតិ 0 | ចំនួនចែករំលែក 0

ប្រព័ន្ធភាពស៊ាំ ពិតមានសារៈសំខាន់សម្រាប់រាងកាយណាស់។ វាមានតួនាទីជារនាំងប្រឆាំងការពារមេរោគដែលមកយាយីរាងកាយយើង។ ជាក់ស្ដែង រាល់ថ្ងៃយើងមិនអាចជៀសវាងពីការបំពុល និង មេរោគជុំវិញខ្លូនយើង អីច៊ឹងហើយ យើងត្រូវតែជ្រើសយកអាហារសុខភាពទាំងនេះ ដើម្បីជួយការពារប្រព័ន្ធភាពស៊ាំយើងមានភាពរឹងមាំ ប្រឆាំងការពារមេរោគបាន៖

១. ទឹកដោះគោជូ

ទឹកដោះគោជូរធ្វើឡើងពីមេទឹកដោះគោមានផ្ទុកបាក់តេរីល្អដែលបាក់តេរីនោះមាននាទីជួយឲ្យពោះវៀនតូចមានដំណើរការល្អ។ ហើយក្នុងទឹកដោះគោជូរ មានផ្ទុកអាស៊ីតឡាក់ទិចដែលជួយបង្កើនភាពស៊ាំរាងកាយឲ្យកាន់តែរឹងមាំ។

២. ឈីស

ឈីស មានផ្ទុករ៉ែកាល់ស្យូមដែលរក្សាធ្មេញឲ្យរ៉ឹងមាំ។ ជាពិសេស វាមានផ្ទុកវីតាមីន D ដែលជូយប្រព័ន្ធភាពស៊ាំរ៉ឹងមាំហើយកម្ចាត់កោសិកាចាស់ៗចោល ជាងនេះទៅនេះ វាជួយការពារជំងឺមហារីក និងធ្វើឲ្យរាងកាយរឹងមាំ។

៣. ខ្ទឹមស

ខ្ទឹមស មានផ្ទុកសារធាតុប្រឆាំងបាក់តេរីនិងវីរុសដែលមានមុខងារសំខាន់ជួយឲ្យប្រព័ន្ធភាពស៊ាំរឹងមាំ។ ម៉្យាងទៀត វាក៏ជួយធ្វើឲ្យផ្លូវដង្ហើមយើងមានដំណើរការល្អ និងជួយបង្កើនគ្រាប់ឈាមសក្នុងឈាម អីច៊ឹង បើអ្នកមានកោសិកាឈាមតិច ខ្ទឹមសជាជម្រើសដ៏ល្អរបស់អ្នក។

៤. ខ្ទឹមបារាំង

ខ្ទឹមបារាំង មានសារធាតុទប់ស្កាត់មេរោគ។ វាជួយប្រឆាំងជំងឺទឹកនោមផ្អែមនិងជំងឺក្រពះពោះវៀន ក៏ដូចជាជួយឲ្យភាពស៊ាំរាងកាយរឹងមាំ។

៥. ផ្លែក្រូច

ផ្លែក្រូច មានផ្ទុកសារធាតុដែលជួយឲ្យរាងកាយមានភាពស៊ាំរឹងមាំ។ វាមានផ្ទុកវីតាមីន C ដែលមានតួនាទីប្រឆាំងអុកស៊ីតកម្មដើម្បីការពារកុំឲ្យកើតជំងឺផ្លូវដង្ហើម និងជួយទប់ស្កាត់ការឈឺចាប់នៃរាងកាយ។

៦. ប្រេងសណ្ដែក

ប្រេងសណ្ដែក មានផ្ទុកអាស៊ីតខ្លាញ់ដែលមានប្រយោជន៍ដល់រាងកាយ។ វាផ្ទុកវីតាមីន E ដែលជួយឲ្យរាងកាយមានភាពរឹងមាំ។ ផ្ទុយពីនេះ ប្រេងសណ្ដែកជួយធ្វើឲ្យម្ហូបកាន់តែមានឱជារស។

៧. ផ្សិត

ផ្សិត មានផ្ទុកសារធាតុប្រឆាំងបាក់តេរីនិងវីរុស ដែលជួយធ្វើឲ្យរាងកាយមានសុខភាព។ វាក៏មានផ្ទុកប៉ូតាស្យូមដែលជួយធ្វើឲ្យចរន្តឈាមមានតុល្យភាព និងធ្វើឲ្យប្រដាប់រំលាយអាហារមានដំណើរការល្អ។

៨. ទឹកឃ្មុំ

ទឹកឃ្មុំ ជួយព្យាបាលការផ្ដាសាយ និងឈឺក ដោយអ្នកអាចយកទឹកឃ្មុំទៅលាយជាមួយទឹកក្រូចឆ្មារដើម្បីឲ្យយើងបានប្រសើរឡើង ក៏ដូចជាជួយឲ្យផ្លូវដង្ហើមមានដំណើរការល្អ។ មិនត្រឹមតែប៉ុណ្ណោះ វាជួយឲ្យប្រព័ន្ធរំលាយអាហារប្រតិបត្តិការបានល្អ និងធ្វើឲ្យរាងកាយមានភាពស៊ាំរឹងមាំ។ ទឹកឃ្មុំ ក៏ជួយធ្វើឲ្យសម្រស់អ្នកកាន់តែស្អាតផងដែរ។

៩. ត្រីធូណា

ត្រីធូណា មានផ្ទុកអាស៊ីតខ្លាញ់អូមេហ្គា ៣ ដែលជួយឲ្យកោសិកាភាពស៊ាំមានសារធាតុចិញ្ចឹមគ្រប់គ្រាន់។ វាជួយការពារបញ្ហារលាក ការពារជំងឺផ្សេងៗ ការពារជំងឺមហារីក និងបញ្ហាអាឡែរហ្សី។ ក្រៅពីនេះ វាព្យាបាលរបួសបានឆាប់រហ័ស។ បន្ថែមទៀត វាជួយឲ្យរាងកាយរឹងមាំ និងខួរក្បាលមានភាពឆ្លាតវៃ។

ចុចអានបន្ត៖ផឹកទឹកឃ្មុំក្រូចឆ្មារាល់ថ្ងៃ ស្រក២គីឡូក្នុងរយៈពេលត្រឹមតែ ១០ថ្ងៃ

ប្រភព៖ akerufeed ប្រែសម្រួល៖ ង៉ាន់ សុគុន