សម័យនេះ ប្រើចិត្តស្មោះក៏មិនប្រាកដប្ដូរបានស្នេហ៍ស្មោះរបស់គេ

2019-08-30 04:05:00
ចំនួនមតិ 0 | ចំនួនចែករំលែក 0

ជីវិតមួយនេះ ពេលខ្លះគឺលេងសើចនឹងយើងពេកហើយ ឲ្យយើងបានជួបមនុស្សដែលយើងគិតថានឹងដើរជាមួយគ្នាអស់មួយជីវិត ស្មានតែគូព្រេងជីវិតទៅហើយ។ តែតាមការពិតគ្រាន់តែសុបិន្តដែលមានរយៈពេលវែងមួយទៅវិញ ដឹងខ្លួនឡើងវិញ អ្វីៗគ្រប់យ៉ាងគ្រាន់តែជាអនុស្សាវរីយ៍ដែលបានកន្លងហួសអស់។

កែវកាហ្វេក្ដៅនៅលើតុ នៅមិនទាន់បាត់ហ៊ុយផ្សែងនៅឡើយ ក្រឡេកទៅក្រៅបង្អួច មនុស្សរាប់រយនាក់នៅតែមមាញឹកតកន្ទុយគ្នាលើផ្លូវដ៏ចង្អៀត តែខ្ញុំនៅតែស្ងប់ស្ងាត់ក្នុងហាងតែឯង។

ពេលខ្លះ ខ្ញុំដឹងគុណជីវិតមួយនេះខ្លាំងណាស់ ព្រោះឆ្លងកាត់ ព្យុះភ្លៀង ឧបសគ្គ ជំពប់ជើងច្រើនដងប៉ុណ្ណេះហើយ នៅតែអាចងើបឡើងវិញ ប្រៀបដូចជាគ្មានរឿងអ្វីទៅវិញ។ ព្រោះបើគេមិនស្រលាញ់យើងទៅហើយ អាចបន្ទោសអ្វីបានទៀត?

ដូចគេនិយាយពិតមែន យើងអាចប្រើមនោសញ្ចេតនាស្មោះអស់ពីចិត្ត ពីថ្លើម ក៏មិនប្រាកដថាគេនឹងតបស្នងវិញ ឬក៏អាចតបវិញនៅគ្រាដំបូង ហើយក៏ចាកចេញទៅប្រៀបដូចជាស្លឹកឈើជ្រុះដែរ។ នៅពេលនោះ ទោះបីជាខំចំណាយញើសឈាមច្រើនប៉ុណ្ណាក៏លែងសំខាន់ ព្រោះក្នុងកែវភ្នែកគេ ពេលនេះលែងមានយើងហើយ យើងប្រៀបដូចជារបស់ទើសភ្នែកគេមួយប៉ុណ្ណោះ ចេញឲ្យកាន់តែឆ្ងាយ កាន់តែប្រសើរ។

ទោះបីជាដឹងថាមិនមែននោសញ្ចេតនាណាក៏នឹងទទួលបានការតបស្នងរហូតដល់ទីបញ្ចប់ តែវាពិតជាឈឺខ្លាំងណាស់ ហើយពិបាកទទួលយក។ ពេលខ្លះហ៊ានដល់ថ្នាក់បន្លប់ចិត្តខ្លួនឯងថា ឲ្យតែព្យាយាមឲ្យខ្លាំង គេនឹងត្រលប់មកវិញជាមិនខាន។ ដល់ពេលភ្ញាក់ខ្លួនទើបដឹងថាខ្លួនល្ងង់ដល់ថ្នាក់ណា។ ស្រលាញ់អ្នកណាជាជម្រើសរបស់យើង ដល់ពេលឈឺក៏ជាយើងអ្នកទទួល។ ចង់ចាកចេញពីទីភក់ជ្រាំនេះ ក៏ត្រូវននៀលនឹងភាពធ្វើទុក្ខបុកម្នេញមិនស្ទើរដែរ។ ព្រោះតាំងពីដើមមក គឺខ្លួនឯងទាំងអស់ដែលជាអ្នកអូសខ្លួនចូល បើមិនលង់នឹងមនោសញ្ចេតនានេះទេ ក៏គ្មានអ្នកណាធ្វើបាបចិត្តយើងបានដែរ។

រឹតតែមិនអាចបន្ទោសគេដែលធ្វើឲ្យយើងឈឺ ព្រោះដោយសារតែរយៈពេលធ្លាប់មានសុភមង្គលនេះហើយ ទើបធ្វើឲ្យយើងឈឺបាន។ ការពិតទៅ គួរអរគុណគេ ដែលធ្វើឲ្យយើងស្គាល់ថាជាអ្វីជាការស្រលាញ់ ការស្អប់ ការប្រចណ្ឌ និងចុងក្រោយគឺការឈឺចាប់នេះឯង។ មេរៀនដ៏ធំមួយនោះគឺ មិនមែនគ្រប់ចិត្តស្មោះស្ម័គ្រ ទាំងអស់នឹងទទួលបានបេះដូងគេនោះឡើយ៕

ចុចអាន៖ នារី៣ប្រភេទចូលក្នុងបញ្ជីខ្មៅរបស់មនុស្សប្រុសមិនចង់រៀបការជាមួយ

ប្រភព៖ Guu ប្រែសម្រួល៖ Caramel