ជានារីដែលគួរឲ្យស្រឡាញ់ និងមើលទៅមានទំនុកចិត្តខ្ពស់ គួរកុំឲ្យមានចំណុចនេះ

2019-08-28 04:00:00
ចំនួនមតិ 0 | ចំនួនចែករំលែក 0

ទោះបីជាសម័យកាលជឿនលឿនដល់ណាក៏ដោយ ប៉ុន្តែមនុស្សស្រីនៅតែត្រូវបានគេវាយតម្លៃបែបនេះបែបនោះ បើសិនជាធ្វើអ្វីដែលមិនសមសួន។ ដើម្បីក្លាយខ្លួនជាមនុស្សស្រីដែលមានទាំងភាពស្រស់ស្អាត និងទំនុកចិត្តខ្ពស់ដែលអ្នកផងស្រឡាញ់រាប់អាន គួរកុំបណ្ដោយឲ្យមានចំណុចទាំងនេះជាប់ជាមួយច្រើនពេកអី។

រូបតំណាង

**១. អត់សណ្ដាប់ធ្នាប់ និងគ្មានអនាម័យ**

អនាម័យគឺជារឿងមួយសំខាន់បំផុត ដូចបើយើងជាមនុស្សស្រីឲ្យមិនសូវមានអនាម័យនោះ ភាពជឿជាក់ក៏ត្រូវបាត់បង់ទៅតាមហ្នឹងដែរ។ ម្យ៉ាងទៀតមនុស្សប្រុសនឹងអស់អារម្មណ៍មកលើយើងបន្ទាប់ពីឃើញយើងគ្មានរបៀបរៀបរយបែបនេះ។ ត្រូវចេះថែរក្សាខ្លួនឲ្យបានស្អាត ទាំងដៃទាំងជើង ក្លិនខ្លួន សក់ និងសំម្លៀកបំពាក់ជាដើម។

២. Make-up ក្រាស់ៗ

កុំគិតថា Make-up ខ្លាំងពេកអាចទាក់ចិត្តមនុស្សម្នាទាំងឡាយ និងផ្ដល់ភាពស្រស់ស្អាតឲ្យយើងនោះ គឺផ្ទុយស្រឡះតែម្ដង។ ជាពិសេសបើមនុស្សប្រុសវិញគឺចូលចិត្តបែបធម្មជាតិ និងសាមញ្ញៗ មិនមែន Make-up ក្រាស់ៗ ឈូសនៅថ្មមិនដាច់នោះទេ។ ព្យាយាមកាត់បន្ថយការ Make-up ក្រាស់ៗ មកជាបែបស្រាលៗ ធម្មជាតិវិញទើបមានចាប់អារម្មណ៍ច្រើន និងផ្ដល់ទំនុកចិត្តលើខ្លួនឯងពេលទៅណាម្ដងៗ។

៣. ចរិតស្រីស្អាត

ការលេងចរិតបែបព្រះនាងម្ចាស់ក៏ជាកំហុសឆ្គងមួយដែលធ្វើឲ្យយើងបាត់បង់ការស្រឡាញ់រាប់អានដែរ។កុំទម្លាប់មានចរិតស្រីស្អាតចូលខ្លួនពេកព្រោះវាអាចឲ្យគេដកខ្លួនចេញ ហើយថែមទាំងជ្រេញទៀតផង។ ទោះស្អាត ឬមិនស្អាតក៏ដោយគួរតែប្រកាន់ចរិតល្អៗ បែបសាមញ្ញៗ មិនក្រអើតក្រទម ឬគិតថាគេមិនដល់ខ្លួន។

រូបតំណាង

៤. ការរៀបចំខ្លួនមិនត្រូវកាលៈទេសៈ

គួរតែមើលតាមកាលៈទេសៈថាខ្លួនគួរស្លៀកពាក់យ៉ាងម៉េចទើបសម មិនមែនមកទាំងខុសគេខុសឯងនោះទេ។ ម្យ៉ាងទៀតការលេងខ្លួនបែបសិចស៊ី ស៊ីវិល័យពេកក៏មិនមែនជាប្រភេទដែលគេចូលចិត្តដែរ។ គួរតែចេះរៀបចំខ្លួនទៅតាមស្ថានការណ៍ដោយរក្សានូវភាពថ្លៃថ្នូរ និងស្រស់ស្អាត។

៥. រញ៉េរញ៉ៃ ឬចូលចិត្តនិយាយ និងសើចឮៗ

វាបង្ហាញពីឥរិយាបថមិនល្អប៉ុន្មានទេ ការដែលសើច ឬនិយាយឮៗអាចធ្វើឲ្យអ្នកជុំវិញខ្លួនមានអារម្មណ៍មិនល្អជាមួយយើងឡើយ។ ម្យ៉ាងទៀតចរិតបែបរញ៉េរញ៉ៃដូចក្មេងមិនទាន់ធំគឺគ្មានអ្នកណាចូលចិត្តទេ ដូច្នេះបើអាចគួរតែកែចេញ។

៦. ពូកែតែរឿងដើរលេង ផឹកស៊ី

ការសប្បាយគ្មានអ្នកណាឃាត់ឡើយ តែបើយើងពូកែតែរឿងហ្នឹងពេកក៏មិនមែនជាចំណង់ចំណូលចិត្តមនុស្សប្រុសដែរ។ គួរតែប្រឹងប្រែងឲ្យខ្លួនមានសមត្ថភាពខាងចំណេះដឹង ពូកែរកស៊ី និងមានមុខមាត់ក្នុងសង្គមទើបល្អ។ បើគ្រាន់តែស្គាល់គ្នាភ្លាមអួតពីក្លឹបនេះ ក្លឹបនោះ ស្រានេះស្រានោះ កុំគិតថាមនុស្សប្រុសសរសើរឲ្យសោះ៕