៨យ៉ាងកុំធ្វើឲ្យសោះ បើចង់ក្លាយជាមនុស្សមានតម្លៃ មានអ្នកប៉ងចង់បានជុំទិស

2018-04-26 08:16:21
ចំនួនមតិ 0 | ចំនួនចែករំលែក 0

១. កុំធ្វើខ្លួនអត់ប្រយោជន៍ មួយថ្ងៃៗមិនធ្វើអី អង្គុយខ្ជិល អូសក្រឡា ធ្វើតែរឿងមិនបានការ ប៉ុន្តែត្រូវឧស្សាហ៍ ធ្វើការ រហ័សរហួន បង្កើតអ្វីៗដែលមានប្រយោជន៍។ កុំកើតមក ដើម្បីឲ្យតែធ្ងន់ផែនដី ហើយក៏ស្លាប់ទៅវិញ ជីវិតនេះខ្លីណាស់ ដូច្នេះត្រូវធ្វើខ្លួនឲ្យមានតម្លៃ។

២. កុំពូកែតែអួត ធ្វើខ្លួនអឿ ដើរចុះដើរឡើង ប៉ុន្តែមិនដែលធ្វើឲ្យអ្វីរីកចម្រើន។ មនុស្សពូកែពិតប្រាកដគឺត្រូវនិយាយតិច ប៉ុន្តែធ្វើច្រើន អួតតិច តែរៀនច្រើន បូរបាច់តិច តែលទ្ធផលការងារច្រើន។ ត្រូវកាត់បន្ថយការឈ្លក់វង្វេងនឹងខ្លួនឯង ហើយបន្ថែមការអភិវឌ្ឍខ្លួនជំនួសវិញ។

៣. កុំកំសាក មនុស្សកំសាកនឹងមិនអាចធ្វើអ្វីបានឡើយ។ ចង់ធ្វើអ្វីមួយ កុំបាច់ខ្លាច ប៉ុន្តែត្រូវធ្វើទាំងខ្លួនខ្លាច។ កុំរវល់តែស្ដាប់សម្ដីមនុស្សកំសាក ដែលប្រាប់ថាកុំឲ្យធ្វើ ព្រោះទីបំផុតយើងនឹងក្លាយជាមនុស្សឆាប់ចុះចាញ់ដូចអ្នកដែលនិយាយប្រាប់អីចឹង។ ត្រូវមើលគំរូអ្នកដែលហ៊ានគិត ហ៊ានធ្វើ ហ៊ានបរាជ័យ ឲ្យបានច្រើនជាង។

៤. កុំគិតអវិជ្ជមាន បើគិតអវិជ្ជមាន ជីវិតនឹងងងឹតស្លុបគ្រប់យ៉ាង ខួរក្បាលនឹងអួអាប់ មានអារម្មណ៍មួម៉ៅ មើលឃើញពិភពលោកតែផ្លូវអាក្រក់។ ដូច្នេះសូមឈប់គិតអវិជ្ជមាន ព្រោះចុងក្រោយវាក៏ប្រៀបដូចជាបំផ្លាញខ្លួនឯងដែរ។

៥. កុំអាត្មានិយម រាល់ថ្ងៃនេះរស់នៅដើម្បីអ្នកណាខ្លះ? ស្រលាញ់អ្នកណាខ្លះ? នឹកដល់អ្នកណាខ្លះក្រៅពីខ្លួនឯង? មនុស្សអាត្មានិយម អាចនិយាយបានថាមានជីវិតរស់នៅក៏គ្មានតម្លៃដែរ បើមិនចេះបើកចិត្តទូលាយ គ្មានទឹកចិត្ត ឬធ្វើអ្វីដើម្បីអ្នកណាសោះ។

៦. កុំវីវក់តែរឿងស្នេហា គ្មានស្នេហា មិនស្លាប់ទេ ប៉ុន្តែបើខ្លួនយើងគ្មានអ្វីល្អ គ្មានតម្លៃ គ្មានអ្វីជាប់ខ្លួនឡើយនោះ បានហៅថាស្លាប់មែនទែនតែម្ដង។ ចង់បានស្នេហាល្អៗ ត្រូវធ្វើឲ្យជីវិតខ្លួនឯងល្អសិន។ ចង់បានគូស្នេហ៍ដែលល្អ ត្រូវធ្វើខ្លួនឲ្យសក្ដិសមនឹងគេសិន។ ឈប់ឈ្មុសឈ្មុលរកស្នេហាល្អទៀត បើដឹងថាខ្លួនឯងមិនទាន់មានតម្លៃក្នុងខ្សែភ្នែកអ្នកណា ព្រោះបើទោះបីមិនត្រូវបានគេមើលរំលង ប៉ុន្តែគង់តែត្រូវបានគេបោះបង់ចោលកណ្ដាលផ្លូវដដែល។

៧. កុំស្រលាញ់អ្នកដទៃច្រើនជាងខ្លួនឯង អ្នកណាមិនស្រលាញ់ មិនចាប់អារម្មណ៍ មិនឃើញតម្លៃយើង ក៏ស្រេចតែគេទៅចុះ កុំយំស្រែក តាមអង្វរករគេធ្វើអី។ បំភ្លេចគេចោល កុំស្ដាយ មនុស្សល្អៗលើលោកនេះមានច្រើនណាស់។ ត្រូវចាំថា បើចង់ឲ្យគេមើលឃើញតម្លៃយើង យើងត្រូវមើលឃើញតម្លៃខ្លួនឯងជាមុនសិន មិនមែនទម្លាក់តម្លៃខ្លួនឯង ហើយចង់ឲ្យគេមើលឃើញនោះទេ។

៨. កុំធ្វើអាក្រក់ច្រើនពេក កើតមកលើលោកនេះ មិនចាំបាច់ធ្វើជាមនុស្សល្អឥតខ្ចោះនោះទេ សុំត្រឹមតែកុំឲ្យធ្វើល្អតិច ហើយអាក្រក់ច្រើនទៅបានហើយ។ មនុស្សមានចំណុចខ្វះខាតខ្លះជារឿងធម្មតាទេ សំខាន់អ្វីដែលនៅសល់ពីនោះគឺត្រូវព្យាយាមធ្វើល្អឲ្យបានច្រើន ដើម្បីប៉ះប៉ូវនូវចំណុចមិនល្អទាំងនោះ។

មនុស្សមាន “តម្លៃ” លុះត្រាតែចេះ "បង្កើតតម្លៃ" ឲ្យខ្លួនឯង។ បើសិនមិនបានធ្វើអ្វីទេ សូមកុំយល់ច្រឡំថាខ្លួនមានតម្លៃឲ្យសោះ ៕

ចុចអាន៖

ប្រភព៖ chermarnratanapongtrakoon ប្រែសម្រួល៖ ស្វាយ វ៉ាន់ថន