ទឹកដោះម្ដាយ អាចជួយទារកឲ្យកើនពិន្ទុ IQ រហូតដល់ ២.៦២ ពិន្ទុឯណោះ
- 2019-07-30 01:00:00
- ចំនួនមតិ 0 | ចំនួនចែករំលែក 0
ទឹកដោះម្ដាយ អាចជួយទារកឲ្យកើនពិន្ទុ IQ រហូតដល់ ២.៦២ ពិន្ទុឯណោះ
ឪពុកម្ដាយភាគច្រើន សម្រេចចិត្តទិញម្សៅទឹកដោះគោ មកជំនួសការបំបៅកូនដោយទឹកដោះ ព្រោះតែភ័ន្តច្រឡំថា ម្សៅទឹកដោះគោ អាចជួយឲ្យកូនរបស់ពួកគេមានសុខភាពល្អជាង ទឹកដោះរបស់ម្ដាយ។
ប៉ុន្តែអ្វីទាំងអស់នេះ គឺមិនពិតនោះទេ ទឹកដោះម្ដាយ អាចជួយឲ្យទារកមានការលូតលាស់កាន់តែល្អ ថែមទាំងមានសមត្ថភាពខ្ពស់ក្នុងការរៀនសូត្រ ក៏ដូចជាសមត្ថភាពរកប្រាក់ចំណូលបានខ្ពស់នាពេលអនាគត។
បើតាមការធ្វើបទបង្ហាញរបស់អង្គការ Hellen Keller និង World Vison ជាមួយក្រុមអ្នកសារព័ត៌មាន កាលពីថ្ងៃ ២៥ បានឲ្យដឹងថា ទារកដែលទទួលបានការបំបៅទឹកដោះពីម្ដាយ មានការកើនឡើងពិន្ទុ IQ រហូតដល់ ២.៦២ ឯណោះ បើធៀបទៅនឹងកុមារដែលបៅម្សៅទឹកដោះគោ។
លើសពីនេះទៅទៀតនោះ ការបំបៅទារក ១ ម៉ោងដំបូងក្រោយពេលកើត អាចជួយកាត់បន្ថយអត្រាមរណភាពរហូតដល់ ២០% ហើយប្រសិនជាអ្នកម្ដាយគ្រប់រូប អាចបំបៅដោះកូនរហូតមានអាយុ ៦ ខែ ទារកទាំងអស់នោះ នឹងគេចផុតពីអត្រាការស្លាប់ពីជំងឺរាគចំនួន ១១ ដង និងរលាកទងសួតចំនួន ១៥ ដង។
មិនត្រឹមតែប៉ុណ្ណោះ ខួរក្បាលរបស់កុមារ ដែលមិនបានបៅទឹកដោះម្ដាយ មានទំហំតូចជាងខួរក្បាលកុមារបៅទឹកដោះម្ដាយ។
បទបង្ហាញ ដែលមានលោក ហ៊ូ ក្រើន អនុប្រធាន អង្គការ Hellen Keller ដដែលនេះ បានឲ្យដឹងទៀតថា ការមិនបានបំបៅទារកដោយទឹកដោះ បានផ្ដល់ផលប៉ះពាល់រយះពេលយូមួយចំនួនដូចជា មានសមត្ថភាពខួលក្បាលខ្សោយ រៀនត្រួតថ្នាក់ចំនួន ១ ឆ្នាំ រកប្រាក់ចំណូលបានតិចជាងកុមារដទៃចំនួន ២២% បង្កើនការចំណាយលើការថែទាំសុខភាព ដោយសារតែលើសអាហារូបត្ថម្ភ និងជំងឺពាក់ព័ន្ធផ្សេងទៀតរហូតដល់ទៅ ២០%។