៩ យ៉ាង ជាភាពអស្ចារ្យដែលមានតែនៅក្នុងខ្លួនមនុស្សស្រី

2019-06-06 04:40:00
ចំនួនមតិ 0 | ចំនួនចែករំលែក 0

រឿងដែលគួរឲ្យកោតស្ញប់ស្ញែងបំផុតចំពោះស្រ្តី គឺការពរពោះបង្កើតកូនចៅតៗគ្នាគ្រប់ជំនាន់។ មិនមែនមានតែប៉ុណ្ណឹងទេ បើសង្កេតមើលឲ្យជាក់លាក់ នៅមានរឿងរ៉ាវគួរឲ្យចាប់អារម្មណ៍ជាច្រើនទៀត សូម្បីតែមនុស្សស្រីខ្លួនឯង ពេលខ្លះដឹងមិនទាន់អស់ផង។ ហេតុដូច្នេះ ថ្ងៃនេះវេបសាយ "កញ្ញា" នឹងបង្ហើបប្រាប់ប្រិយមិត្តទាំងអស់គ្នាពីចំណុច ៩ យ៉ាង ជាភាពអស្ចារ្យនិងគួរឲ្យភ្ញាក់ផ្អើល ដែលមានតែនៅលើខ្លួនមនុស្សស្រីប៉ុណ្ណោះ។

១. ដើមទ្រូងតែងមានម្ខាងធំជាងម្ខាងទៀត

គ្មាននារីណាម្នាក់ដែលមានដើមទ្រូងទាំងសងខាងប៉ុនគ្នានោះទេ។ គ្រាន់តែពេលខ្លះ វាខុសគ្នាតិចតួចមិនអាចកត់សម្គាល់ដឹងបាន។ មូលហេតុដែលនាំឲ្យទំហំមិនស្មើគ្នា បណ្តាលមកពីកត្តាច្រើនយ៉ាងដូចជា ទំហំនៃជាលិកាសុដន់ ទំហំឬទម្រង់នៃកន្សោមសុដន់ ឬភាពបត់បែននៃស្បែកលើសុដន់ទាំងសងខាង។ គ្មានអ្វីគួរឲ្យបារម្ភទេ ព្រោះវាជារឿងធម្មជាតិទូទៅស្រាប់ទៅហើយ។

២. រាងកាយមនុស្សស្រីប្រែប្រួលខ្លាំងក្នុងអំឡុងពេលផ្តល់កំណើតដល់កូន

ក្នុងអំឡុងពេលផ្តល់កំណើត មនុស្សស្រីណាក៏ទទួលស្គាល់ថា វាពិតជាលំបាកគ្មានអ្វីប្រៀបបាន។ ក្រៅពីការឈឺចាប់ទាំងអស់នោះ រាងកាយមនុស្សស្រីក៏មានបម្រែបម្រួលច្រើនខ្លាំងណាស់ ជាពិសេសការរីកមាត់ស្បូន។ មាត់ស្បូនប្រែពីតឹងណែនទៅជារីកបើកធំ យ៉ាងហោចណាស់១០សង់ទីម៉ែត្រ (ដូចក្នុងរូបភាព) ដើម្បីអាចបង្កើតទារកចេញមកខាងក្រៅ។ ឬអាចរីកធំជាងនេះ អាស្រ័យលើទំហំក្បាលរបស់ទារក។

៣. ស្រ្តីអាចទ្រាំទ្រជាមួយការឈឺចាប់បានយ៉ាងល្អ

ស្រ្តីតែងតែឆ្លងកាត់នូវភាពឈឺចាប់ច្រើនជាងបុរស ថែមទាំងអាចនៅស៊ូទ្រាំបានយ៉ាងល្អទៀតផង។ វាមិនមែនមកពីភាពរឹងមាំនោះទេ ប៉ុន្តែដោយសារតែខួរក្បាលបញ្ជាមកបែបនេះ។ យោងតាមការចុះផ្សាយរបស់ New York Post បានបង្ហាញថា រវាងមនុស្សស្រីនិងមនុស្សប្រុស ការចងចាំនូវភាពឈឺចាប់កាលពីអតីតកាលគឺខុសគ្នាស្រឡះ។ មនុស្សប្រុសគ្រាន់តែគិតពីការឈឺចាប់ដែលធ្លាប់ឆ្លងកាត់ពីមុន ក៏ឈឺក្បាលកើតស្រ្តេសដែរ ស្រប់ពេលដែលមនុស្សស្រីឆាប់ភ្លេចពីវាបានរហ័សជាង។ ជាទូទៅ កម្រិតនៃភាពឈឺចាប់របស់ស្រ្តី លើសពីបុរសដល់ទៅ៩ដង។

៤. មនុស្សស្រីពូកែរៀបពាក្យពេចន៍និយាយ

បើនិយាយពីការរៀបពាក្យសម្តីវិញ គ្មានអ្វីអាចប្រៀបផ្ទឹមនឹងមនុស្សស្រីបានទេ។ ដោយសារតែ FOXP2 មានកម្រិតខ្ពស់ ឬហៅម្យ៉ាងទៀតថា "ប្រូតេអ៊ីនភាសា” ដែលជាហេតុបណ្តាលឲ្យមនុស្សស្រីនិយាយស្តីជាមធ្យម ប្រមាណ២ម៉ឺនពាក្យក្នុងមួយថ្ងៃ ច្រើនជាងមនុស្សប្រុស ១ម៉ឺន ៣ពាន់ ពាក្យ។

៥. មនុស្សស្រីមានសាច់ដុំរឹងមាំ

ថ្វីត្បិតតែកម្លាំងមិនអាចប្រៀបនឹងមនុស្សប្រុស ប៉ុន្តែមនុស្សស្រី អាចធ្វើលំហាត់ប្រាណដោយប្រើកម្លាំង បានយូរជាងប្រុសៗ ដល់ទៅ៧៥%។ ដោយសារតែក្នុងខ្លួនមនុស្សស្រីមានអ័រម៉ូនមួយឈ្មោះថា អេស្ត្រូសែនដែលមាននាទីជួយឲ្យសាច់ដុំមិនឆាប់ចុះខ្សោយ។

៦. ស្បែកមនុស្សស្រីឆាប់ប្រតិកម្មណាស់

ជាធម្មតា ស្បែកមនុស្សស្រីមានសភាពស្តើងជាងមនុស្សប្រុស ២៥% ជាហេតុធ្វើឲ្យស្បែកឆាប់ប្រតិកម្ម ពេលប៉ះនឹងអ្វីមួយ។ នេះក៏ជាសញ្ញាមិនល្អមួយដែរ ព្រោះស្បែកដែលឆាប់ប្រតិកម្មខ្លាំងពេក ធ្វើឲ្យបាត់បង់ខូឡាជែនលឿន បណ្តាលឲ្យស្បែកឆាប់លេចស្នាមជ្រីវជ្រួញចេញមក។

៧. អារម្មណ៍របស់មនុស្សស្រីប្រែប្រួលអាស្រ័យលើអ័រម៉ូន

មនុស្សស្រីភាគច្រើនបានដឹងហើយពីសញ្ញារបស់ PMS (កើតឡើង១-២សប្តាហ៍មុនពេលមករដូវ)។ យ៉ាងណាមិញ អ្នកខ្លះមិនបានកត់សម្គាល់ទេថា រាងកាយរបស់ខ្លួន ត្រូវទទួលរងឥទ្ធិពលរៀងរាល់ខែ។ កម្រិតនៃអ័រម៉ូន បានធ្វើឲ្យខួរក្បាល រាងកាយ ថាមពល និងអារម្មណ៍ប្រែប្រួល។ ជាពិសេស ចាប់ពី១២-២៤ម៉ោង មុនពេលមករដូវ អារម្មណ៍របស់នាងនឹងប្រែប្រួលទៅជាមិនល្អទាល់តែសោះ។

៨. យុវភាពរបស់មនុស្សស្រីមានដល់ទៅ២ដង

មនុស្សស្រីនឹងវិលត្រលប់ទៅរកភាពជាយុវវ័យម្តងទៀត ក្នុងវ័យខ្ទង់៤០ឆ្នាំ។ ដោយសារតែ រដូវមកមិនទៀតទាត់ បែកញើសនៅពេលយប់ ហើយអ័រម៉ូនក៏ប្រែប្រួលដែរ។ ក្នុងអំឡុងពេលនេះ ស្រ្តីអាចមានអារម្មណ៍និងអត្តចរិតដូចកាលនៅជាយុវវ័យដូច្នោះដែរ។

៩. មនុស្សស្រីជំនាញខាងមើលទឹកមុខអាចដឹងធ្លុះដល់បេះដូង

តាំងពីកំណើតមកម្ល៉េះ ស្រ្តីមានសមត្ថភាពអាចមើលចិត្តតាមរយៈទឹកមុខ។ ហេតុនេះហើយ ទើបបានជាមនុស្សស្រី ក្លាយជាអ្នកយល់ចិត្តដ៏ជំនិតម្នាក់ ហើយនាងក៏អាចចងចាំនូវទឹកមុខបានយ៉ាងល្អផងដែរ៕

ចុចអានបន្ត៖