ធ្វើរឿងទាំងនេះឱ្យបានមុនម៉ោង៩ព្រឹក ជីវិតនឹងពេញដោយសុភមង្គល រស់ក៏បានយូរ

2019-04-24 07:41:58
ចំនួនមតិ 0 | ចំនួនចែករំលែក 0

ធ្លាប់អត់? កាលពីនៅតូច ម៉ាក់តែងមកដាស់ឱ្យក្រោកពីព្រឹក ដើម្បីរៀបចំខ្លួនទៅរៀនទាន់ពេល? ទម្លាប់បែបនេះបើអាចអនុវត្តបន្តរហូតដល់ចាស់បាន មិនមែនត្រឹមតែអាចជួយឱ្យយើងរៀបចំខ្លួនទៅរៀន ឬធ្វើការទាន់ពេលទេ ថែមទាំងអាចផ្ដល់ឱ្យជីវិតនូវសុភមង្គលបានទៀតផង។ សម្រាប់អ្នកក្រោកលឿន បើអាចធ្វើរឿងទាំងនេះបានម៉ោង៩ព្រឹក អ្នកនឹងឃើញភាពខុសគ្នានៃជីវិតដែលធ្លាប់មានពីមុន។

ផឹកទឹក

រូបតំណាង

ការញ៉ាំទឹកនៅពេលព្រឹក ក្រោកភ្ញាក់ពីគេង និងពេលមិនទាន់ញ៉ាំអាហារពេលព្រឹកអាចជួយឱ្យរាងកាយមានសុខភាពល្អ គ្រប់គ្រាន់សីតុណ្ហភាពក្នុងរាងកាយ សម្រួលចរន្តឈាម លាងតម្រងនោមបានស្អាតល្អ និងជម្រុះកាកសំណល់អាក្រក់ចេញពីរាងកាយ។

ហាត់ប្រាណតិចៗ

រូបតំណាង

ការហាត់ប្រាណពិតជាល្អសម្រាប់រាងកាយខ្លាំងណាស់។ ដោយសារពេលគេង រាងកាយយើងមិនបានធ្វើចលនា ដូច្នេះទើបពេលក្រោកឡើងគួរបញ្ចេញចលនាខ្លះដើម្បីសម្រួលសន្លាក់ សរសៃសសូង និងមុខងារឈាមឱ្យប្រសើរឡើងវិញ។

ចុចអាន៖ ១២ ក្បាច់សម្រកខ្លាញ់ងាយៗ អ្នកខ្ជិលៗនៅតែលើគ្រែក៏ហាត់បាន

បង្កើតស្នាមញញឹម

រូបតំណាង

ធម្មតាក្រោកពីគេងរាល់ថ្ងៃត្រូវឈរនៅមុខកញ្ចក់ ហោចណាស់ក៏ពេលសិតសក់ដែរ។ អ៊ីចឹងហេតុអីមិនសាកញញឹមខ្លះ? វាអាចជារឿងគួរឱ្យខ្មាសពេលដំបូង តែយូរៗទៅ វានឹងជួយឱ្យយើងមានអារម្មណ៍ល្អ ផ្ដល់ជំនឿចិត្តដល់ខ្លួនឯង និងអាចឱ្យយើងប្ដូរពីមនុស្សចូលចិត្តឯកោ មកជាងាយចុះសម្រុងជាមួយអ្នកដទៃក៏ថាបាន។

ចំណាយពេលជាមួយគ្រួសារ

រូបតំណាង

កុំទាន់ស្រែកថា ព្រឹកឡើងរកតែពេលរៀបចំខ្លួនទៅធ្វើការមិនទាន់ផង ឱ្យចំណាយពេលជាមួយគ្រួសារស្អី? បើអ្នកក្រោកពីព្រលឹម អ្នកច្បាស់ជាមានពេលគ្រប់គ្រាន់ដើម្បីចំណាយពេលជាមួយកូន ដូចជាងូតទឹកឱ្យកូន ដាំបាយធ្វើម្ហូបឱ្យអូនអូនញ៉ាំ ឬញ៉ាំអាហារពេលព្រឹកជាមួយគ្នា។ វាជួយឱ្យអ្នកបង្កើនភាពស្និទ្ធស្នាលជាមួយគ្រួសារបានមួយផ្នែក ព្រោះសម័យនេះ មនុស្សភាគច្រើនព្រលឹមចេញ ព្រលប់ចូល ហើយមិនសូវមានពេលផ្ដល់ភាពកក់ក្ដៅដល់កូន និងគ្រួសារឡើយ។ ដូច្នេះវិធីអាចជួយអ្នកបាន។

រៀបចំពូកខ្នើយឱ្យមានសណ្ដាប់ធ្នាប់

រូបតំណាង

ទម្លាប់បែបនេះនឹងជួយឱ្យអ្នកក្លាយជាមនុស្សមានសណ្ដាប់ធ្នាប់ និងរៀបរយ ព្រោះកន្លែងគេងជារឿងសំខាន់ បើពូកខ្នើយមានរបៀប គេងក៏លក់ស្រួល តែបើកន្លែងគេងសុកមម៉ុក ខោអាវរាយប៉ាយខ្ញិកខ្ញុក កុំឆ្ងល់ថាហេតុអីគេងមិនលក់ដូចគេ។

រៀបគម្រោងសម្រាប់ថ្ងៃនេះ

ការរៀបគម្រោងថាត្រូវធ្វើអ្វីខ្លះក្នុងថ្ងៃនេះ អាចជួយអ្នកឱ្យចំណាយថ្ងៃថ្មីដោយរលូន និងមិនសូវស្មុគស្មាញ។ គួរគិតដល់រឿងល្អៗ និងអ្វីដែលអាចជះឥទ្ធិពលល្អសម្រាប់ការងារក្នុងថ្ងៃនេះ ជាជាងរឿងអាក្រក់ដែលអាចប៉ះពាល់អារម្មណ៍ធ្វើការពេញមួយថ្ងៃ។

តាមដានព័ត៌មាន

រូបតំណាង

សម័យនេះស្រួលសឹងអី! ទាញតែទូរសព្ទមកក៏អាចដឹងព័ត៌មាន និងរឿងរ៉ាវដែលកំពុងកើតឡើងក្នុងសង្គមបាត់ទៅហើយ។ ការតាមដានព័ត៌មាននៅពេលព្រឹកអាចជួយឱ្យអ្នកបានដឹងការវិវត្តថ្មីៗ និងអាចត្រៀមខ្លួន ឬមានគំនិតថ្មីៗលេចឡើងក្នុងខួរក្បាលសម្រាប់ការងារថ្ងៃនេះក៏ថាបាន។

ដាច់ខាតហាមអត់ញ៉ាំអាហារពេលព្រឹក

មិនថាមានពេលតិច ឬច្រើនប៉ុណ្ណាទេ អាហារពេលព្រឹកមិនអាចរំលងបានឡើយ ព្រោះវាជាប្រភពថាមពលសំខាន់សម្រាប់ការបំពេញការងារថ្ងៃនេះ។ ដោយសាររាងកាយយើងត្រូវសម្រាកពេញមួយយប់ ហើយត្រូវក្រោកមកធ្វើការនៅថ្ងៃថ្មី ដូច្នេះបើមិនញ៉ាំអាហារចូលទៅបង្កើនថាមពលទេ យូរៗទៅរាងកាយនឹងទ្រុឌទ្រោម បាត់បង់កម្លាំងជាក់ជាមិនខាន ឬពេលខ្លះឈានដល់ការកើតជំងឺសាហាវៗទៀតផង៕

ប្រភព៖ Spiceee ប្រែសម្រួល៖ សរ សុគន្ធី